Soye Hue Palang Ke Saaye Jaga Gaya

Soye hue palang ke saaye jaga gaya,
Khidki khuli to aasman kamre mein aa gaya,

Aangan mein teri yaad ka jhonka jo aa gaya,
Tanhaai ke darakht se patte uda gaya,

Hanste chamakte khwaab ke chehre bhi mit gaye,
Batti jali to man mein andhera sa chha gaya,

Aaya tha kaale khoon ka sailaab pichhli raat,
Barson puraani jism ki deewar dhha gaya 

Tasweer mein jo qaid tha wo shakhs raat ko,
Khud hi frame tod ke pahlu mein aa gaya,

Wo chaay pi raha tha kisi doosre ke saath,
Uujh par nigaah padte hi kuchh jhenp sa gaya..!!

"Adil Mansuri"

Phir Kisi Khwaab Ke Parde Se Pukara Jaaun

Phir kisi khwaab ke parde se pukara jaaun,
Phir kisi yaad ki talwaar se maara jaaun,

Phir koi wusat-e-aafaaq pe saaya daale,
Phir kisi aankh ke nuqte mein utara jaaun,

Din ke hangaamon mein daaman kahin maila ho jaaye,
Raat ki nuqrai aatish mein nikhaara jaaun,

Khushk khoye hue gumnaam jazeere ki tarah,
Dard ke kaale samandar se ubhaara jaaun,

Apni khoi hui jannat ka talabgaar banun,
Dast-e-yazdaan se gunahgaar sanwara jaaun..!!

"Adil Mansuri"

Phaile Hue Hain Shahar Mein Saaye Nidhhaal Se

Phaile hue hain shahar mein saaye nidhhaal se,
Jaayein kahaan nikal ke khyaalon ke jaal se,

Mashriq se mera raasta maghrib ki samt tha,
Us ka safar junoob ki jaanib shumaal se,

Kaisa bhi talkh zikr ho kaisi bhi tursh baat,
Un ki samajh mein aayegi gul ki misaal se,

Chup-chaap baithe rahte hain kuchh bolte nahin,
Bachche bigad gaye hain bahut dekh-bhaal se,

Rangon ko bahte dekhiye kamre ke farsh par,
Kirnon ke waar rokiye sheeshe ki dhhaal se,

Aankhon mein aansuon ka kahin naam tak nahin,
Ab joote saaf kijiye un ke rumaal se,

Chehra bujha bujha sa pareshaan zulf zulf,
Allah dushmanon ko bachaaye wabaal se,

Phir paaniyon mein nuqrai saaye utar gaye,
Phir raat jagmaga uthi chaandi ke thaal se..!!

"Adil Mansuri"
___
Tursh = sour, acid, harsh, ill-tempered,
Nuqrai = silver bells,

Paani Ko Patthar Kahte Hain

Paani ko patthar kahte hain,
Kya kuchh deeda-war kahte hain,

Khush-fahmi ki had hoti hain,
Khud ko danish-war kahte hain,

Kaun lagi-lipti rakhta hai,
Hum tere munh par kahte hain,

Theek hi kahte honge phir to,
Jab ye professor kahte hain,

Sab un ko andar samjhe the,
Wo khud ko baahar kahte hain,

Tera is mein kya jaata hai,
Apne khandar ko ghar kahte hain,

Nazm samajh mein kab aati hai,
Dekh is ko mantar kahte hain..!!

"Adil Mansuri"

Pahlu Ke Aar-paar Guzarta Hua Sa Ho

Pahlu ke aar-paar guzarta hua sa ho,
Ek shakhs aaine mein utarta hua sa ho,

Jeeta hua sa ho kabhi marta hua sa ho,
Ek shahar apne aap se darta hua sa ho,

Saare kabeera aap hi karta hua sa ho,
Ilzaam doosre hi pe dharta hua sa ho,

Har ek naya khyaal jo tapke hai zehn se,
Yoon lag raha hai jaise ki barta hua sa ho,

Qailoola kar rahe hon kisi neem ke tale,
Maidaan mein rakhsh-e-umr bhi charta hua sa ho,

Ma'ashooq aisa dhundhiye qahtur-rijaal mein,
Har baat mein agarta magarta hua sa ho,

Phir baad mein wo qatl bhi kar de to harj kya,
Lekin wo pahle pyaar bhi karta hua sa ho,

Gar daad tu na de na sahi galiyaan sahi,
Apna bhi koi aib hunarta hua sa ho..!!

"Adil Mansuri"
___
Qaiqoola = siesta, afternoon nap,
Rakhsh-e-umr = horse of life, the stead,
Qahtur-rijaal = drought, सूखा,

Na Koi Rok Saka Khwaab Ke Safeeron Ko

Na koi rok saka khwaab ke safeeron ko,
Udaas kar gaye neendon ke rahgeeron ko,

Wo mauj ban ke uthi yaad ke samandar se,
Tabaah kar gayi tanhaai ke jazeeron ko,

Laraz ke toot gayin haft-rang deewarein,
Hawa chali to rihaai mili aseeron ko,

Dafeene paanw tale se guzar gaye kitne,
Main dekhta hi raha haath mein lakeeron ko..!!

"Adil Mansuri"
___
Safeeron = ambassadors,
Haft-rang = seven colors,
Dafeene = buried,

Mujhe Pasand Nahin Aise Karobaar Mein Hun

Mujhe pasand nahin aise karobaar mein hun,
Ye jabr hai ki main khud apne ikhtiyaar mein hun,

Hudood-e-waqt se baahar ajab hisaar mein hun,
Main ek lamha hun sadiyon ke intezaar mein hun,

Abhi na kar meri tashkeel mujh ko naam na de,
Tere wajood se baahar mein kis shumaar mein hun,

Main ek zarra meri haisiyat hi kya hai magar,
Hawa ke saath hun udte hue ghubaar mein hun,

Bas aas-paas ye sooraj hai aur kuchh bhi nahin,
Mahak raha to hun lekin main regzaar mein hun..!!

"Adil Mansuri"
___
Tashkeel = formation, organisation,

Jo Cheez Thi Kamre Mein Wo Be-rabt Padi Thi

Jo cheez thi kamre mein wo be-rabt padi thi,
Tanhaai-e-shab band-e-qaba khol rahi thi,

Aawaz ki deewar bhi chup-chaap khadi thi,
Khidki se jo dekha to gali oongh rahi thi,

Baalon ne tera lams to mahsoos kiya tha,
Lekin ye khabar dil ne badi der se di thi,

Haathon mein naya chaand pada haanp raha tha,
Raanon pe barahna si nami reng rahi thi,

Yaadon ne use tod diya maar ke patthar,
Aaine ki khandaq mein jo parchhaai padi thi,

Duniya ki guzarte hue padti thin nigaahein,
Sheeshe ki jagah khidki mein ruswaai jadi thi,

Tooti hui mehraab se gumbad ke khandar tak,
Ek boodhe mo'azzin ki sada goonj rahi thi..!!

"Adil Mansuri"

Jeeta Hai Sirf Tere Liye Kaun, Mar Ke Dekh

Jeeta hai sirf tere liye kaun, mar ke dekh,
Ek roz meri jaan ye harkat bhi kar ke dekh,

Manzil yahin hai aam ke pedon ki chhanw mein,
Ai shahsawaar ghode se neeche utar ke dekh,

Toote pade hain kitne ujaalon ke ustukhwaa'n,
Saaya-numa andhere ke andar utar ke dekh,

Phoolon ki tang-daamani ka tazkira na kar,
Khushbu ki tarah mauj-e-saba mein bikhar ke dekh,

Tujh par khulenge maut ki sarhad ke raaste,
Himmat agar hai us ki gali se guzar ke dekh,

Dariya ki wus'aton se use naapte nahin,
Tanhaai kitni gahri hai ek jaam bhar ke dekh..!!

"Adil Mansuri"
___
Ustukhwaa'n = bone/ skeleton,

Jalne Lage Khala Mein Hawaaon Ke Naqsh-e-pa

Jalne lage khala mein hawaaon ke naqsh-e-pa,
Sooraj ka haath shaam ki gardan pe ja pada,

Chhat par pighal ke jam gayi khwaabon ki chaandni,
Kamre ka dard haanpte saayon ko kha gaya,

Bistar mein ek chaand tarasha tha lams ne,
Us ne utha ke chaay ke cup mein dubo diya,

Har aankh mein thi toot'te lamhon ki tishnagi,
Har jism pe tha waqt ka saaya pada hua,

Dekha tha sab ne doobne waale ko door door,
Paani ki ungliyon ne kinaare ko chhu liya,

Aayegi raat munh pe siyaahi male hue,
Rakh dega din bhi haath mein kaghaz phata hua.!!

"Adil Mansuri"

Hua Khatm Dariya To Sahra Laga

Hua khatm dariya to sahra laga,
Safar ka tasalsul kahaan ja laga,

Ajab raat basti ka naqsha laga,
Har ek naqsh andar se toota laga,

Tumhaara hazaaron se rishta laga,
Kaho saai'n ka kaam kaisa laga,

Abhi khinch hi jaati lahu ki dhanak,
Miyaan teer tuk tera tirchha laga,

Lahu mein utarti rahi chaandni,
Badan raat ka kitna thanda laga,

Ta'ajjub ke suraakh se dekhte,
Andhere mein kaise nishana laga.!!

"Adil Mansuri"

Hone Ko Yoon To Shahar Mein Apna Makaan Tha

Hone ko yoon to shahar mein apna makaan tha,
Nafrat ka regzaar magar darmiyaan tha,

Lamhe ke tootne ki sada sun raha tha main,
Jhapki jo aankh sar pe naya aasmaan tha,

Kahne ko haath baandhe khade the namaaz mein,
Poochho to doosri hi taraf apna dhyaan tha,

Allah jaane kis pe akadta tha raat din,
Kuchh bhi nahin tha phir bhi bada bad-zabaan tha,

Shole ugalte teer baraste the charkh se,
Saaya tha paas mein na koi saaebaan tha,

Sab se kiya hai wasl ka waada alag alag,
Kal raat wo sabhi pe bahut mehrbaan tha,

Munh-phat tha be-lagaam tha ruswa tha Dhheet tha,
Jaisa bhi tha wo dosto mahfil ki jaan tha..!!

"Adil Mansuri"

Har Khwaab Kaali Raat Ke Saanche Mein Dhhaal Kar

Har khwaab kaali raat ke saanche mein dhhaal kar,
Ye kaun chhup gaya hai sitaare uchhaal kar,

Aise dare hue hain zamaane ki chaal se,
Ghar mein bhi paanw rakhte hain hum to sambhaal kar,

Khana-kharabiyon mein tera bhi pata nahin,
Tujh ko bhi kya mila humein ghar se nikaal kar,

Jhulsa gaya hai kaaghzi chehron ki dastaan,
Jalti hui khamoshiyan lafzon mein dhhaal kar,

Ye phool khud hi sookh kar aayenge khaak par,
Tu apne haath se na inhein paaemaal kar.!!

"Adil Mansuri"

Ek Qatra Ashk Ka Chhalka To Dariya Kar Diya

Ek qatra ashk ka chhalka to dariya kar diya,
Ek musht-e-khaak jo bikhri to sahra kar diya,

Mere toote hausle ke par nikalte dekh kar,
Us ne deewaron ko apni aur ooncha kar diya,

Wardaat-e-qalb likkhi hum ne farzi naam se,
Aur haathon-haath us ko khud hi le ja kar diya,

Us ki naraazi ka sooraj jab sawa neze pe tha,
Apne harf-e-ijz hi ne sar pe saaya kar diya,

Duniya bhar ki khaak koi chhaanta phirta hai ab,
Aap ne dar se utha kar kaisa ruswa kar diya,

Ab na koi khauf dil mein aur na aankhon mein ummeed,
Tu ne marg-e-na-gahaa'n beemar achchha kar diya,

Bhool ja ye kal tere naqsh-e-qadam the chaand par,
Dekh un haathon ko kis ne aaj kaasa kar diya,

Hum to kahne ja rahe the hamza-e-ye wassalam,
Beech mein us ne achanak noon-ghunna kar diya,

Hum ko gaali ke liye bhi lab hila sakte nahin,
Ghair ko bosa diya to munh se dikhla kar diya,

Teergi ki bhi koi had hoti hai aakhir miyaan,
Surkh parcham ko jala kar hi ujala kar diya,

Bazm mein ahl-e-sukhan taqtia farmaate rahe,
Aur hum ne apne dil ka bojh halka kar diya,

Jaane kis ke muntazir baithe hain jhaadu pher kar,
Dil se har khwaahish ko 'Adil' hum ne chalta kar diya..!!

"Adil Mansuri"
___
Harf-e-ijz = words of modesty,
Marg-e-na-gahaa'n = untimely death,
Hamza-e-ye = the orthographical sign of wassalam,
Wassalam = reply to salam, may peace be upon you too,
Noon-ghunna = Alphabet nun without point,
Taqtia = diacritical marks on text,

Darwaza Band Dekh Ke Mere Makaan Ka

Darwaza band dekh ke mere makaan ka,
Jhonka hawa ka khidki ke parde hila gaya,

Wo jaan-e-nau-bahaar jidhar se guzar gaya,
Pedon ne phool patton se rasta chhupa liya,

Us ke qareeb jaane ka anjaam ye hua,
Main apne-aap se bhi bahut door ja pada,

Angdaai le rahi thi gulistaan mein jab bahaar,
Har phool apne rang ki aatish mein jal gaya,

Kaante se toot'te hain mere ang ang mein,
Rag rag mein chaand jalta hua zahr bhar gaya,

Aankhon ne us ko dekha nahin is ke bawajood,
Dil us ki yaad se kabhi ghaafil nahin raha,

Darwaza khatkhata ke sitaare chale gaye,
Khwaabon ki shaal odh ke main oonghta raha,

Shab chandni ki aanch mein tap kar nikhar gayi,
Sooraj ki jalti aag mein din khaaak ho gaya,

Sadkein tamaam dhoop se angara ho gayin,
Andhi hawa'en chalti hain in par barhana-paa,

Wo aaye thodi der ruke aur chale gaye,

'Adil' main sar jhukaaye hue chup khada raha..!!

"Adil Mansuri"

Chaaron Taraf Se Maut Ne Ghera Hai Zeest Ko

Chaaron taraf se maut ne ghera hai zeest ko,
Aur us ke saath hukm ke ab zindagi karo,

Baahar gali mein shor hai barsaat ka suno,
Kundi laga ke aaj to ghar mein pade raho,

Chhod aaye kis ki chhat pe jawaan-saal chaand ko,
Khamosh kis liye ho sitaaro jawaab do,

Kyun chalte chalte ruk gaye viraan raasto,
Tanha hun aaj main zara ghar tak to saath do,

Jis ne bhi mud ke dekha wo patthar ka ho gaya,
Nazrein jhukaaye dosto chup chup chale chalo,

Allah rakkhe teri sahar jaisi kam-sini,
Dil kaanpta hai jab bhi tu aati hai shaam ko,

Viraan chaman pe roi hai shabnam tamaam raat,
Aise mein koi nannhi kali muskuraye to,

'Adil' hawa'en kab se bhi deti hain dastakein
Jaldi se uth ke kamre ka darwaza khol do.!!

"Adil Mansuri"

Bismil Ke Tadapne Ki Adaaon Mein Nasha Tha

Bismil ke tadapne ki adaaon mein nasha tha,
Main haath mein talwaar liye jhoom raha tha,

Ghunghat mein mere khwaab ki taabeer chhupi thi,
Mehndi se hatheli mein mera naam likha tha,

Lab the ki kisi pyaali ke honthon pe jhuke the,
Aur haath kahin gardan-e-mina mein pada tha,

Mammam ke aaine mein shab doob rahi thi,
Cigarette se naye din ka dhuaan phail raha tha,

Dariya ke kinaare pe meri laash padi thi,
Aur paani ki tah mein wo mujhe dhundh raha tha,

Ma'aloom nahin phir wo kahaan chhup gaya 'Adil'
Saaaya sa koi lams ki sarhad pe mila tha.!!

"Adil Mansuri"

Badan Par Nayi Fasl Aane Lagi

Badan par nayi fasl aane lagi,
Hawa dil mein khwahish jagaane lagi,

Koi khud-kushi ki taraf chal diya,
Udaasi ki mehnat thhikane lagi,

Jo chup-chaap rahti thi deewar par,
Wo tasveer baatein banaane lagi,

Khyaalon ke taareek khandaraat mein,
Khamoshi ghazal gungunaane lagi,

Zara der baithe the tanhaai mein,
Teri yaad aankhein dukhaane lagi.!!

"Adil Mansuri"

Ab Tootne Hi Waala Hai Tanhaai Ka Hisaar

Ab tootne hi waala hai tanhaai ka hisaar,
Ek shakhs cheekhta hai samandar ke aar-paar,

Aankhon se raah nikli hai tahtush-shu'oor tak,
Rag rag mein rengta hai sulagta hua khumaar,

Girte rahe nujoom andhere ki zulf se,
Shab bhar rahin khamoshiyan saayon se hum-kanaar,

Deewar-o-dar pe khushbu ke haale bikhar gaye,
Tanhaai ke farishton ne choomi qaba-e-yaar,

Kab tak pade rahoge hawaaon ke haath mein,
Kab tak chalega khokhle shabdon ka karobaar..!!

"Adil Mansuri"
___
Tahtush-shu'oor = subconscious,
Hum-kanaar = Embracing,
Haale = Halo,

Aashiq The Shahar Mein Jo Purane Sharaab Ke

Aashiq the shahar mein jo purane sharaab ke,
Hain un ke dil mein waswase ab ehtisaab ke,

Wo jo tumhaare haath se aa kar nikal gaya,
Hum bhi qateel hain usi khana-kharaab ke,

Phoolon ki sej par zara aaram kya kiya,
Us gul-badan pe naqsh uth aaye gulaab ke,

Soye to dil mein ek jahaan jaagne laga,
Jaage to apni aankh mein jaale the khwaab ke,

Bas tishnagi ki aankh se dekha karo unhein,
Dariya rawaan-dawaan hain chamakte saraab ke,

Okara itni door na hota to ek din,
Bhar laate saans saans mein gul aaftaab ke,

Kis tarah jama kijiye ab apne aap ko,
Kaaghaz bikhar rahe hain puraani kitaab ke.!!

"Adil Mansuri"