Wasl ki baat aur hi kuchh thi,
Un dinon raat aur hi kuchh thi,
Pahli pahli nazar ke afsaane,
Wo mulaqaat aur hi kuchh thi,
Aap aaye the zindagi meri,
Raat ki raat aur hi kuchh thi,
Dil ne kuchh aur hi liya matlab,
Aap ki baat aur hi kuchh thi,
'Saif' pi kar bhi tishnagi na gayi,
Ab ke barsaat aur hi kuchh thi..!!
"Saifuddin Saif"
Baat phoolon ki suna karte the,
Hum kabhi sheyr kaha karte the,
Mish'alein le ke tumhaare ghum ki,
Hum andheron mein chala karte the,
Ab kahaan aisi tabiyat waale,
Chot kha kar jo dua karte the,
Tark-e-ahsaas-e-mohabbat mushkil,
Haan magar ahl-e-wafa karte the,
Bikhri bikhri hui zulfon waale,
Qaafile rok liya karte the,
Aaj gulshan mein shagoofe 'Saghar',
Shikwa-e-baad-e-saba karte the.!!
"Saghar Siddiqui"
___
Shagoofe = buds,
Bhooli hui sada hun mujhe yaad kijiye,
Tum se kahin mila hun mujhe yaad kijiye,
Manzil nahin hun khizr nahin raahzan nahin,
Manzil ka raasta hun mujhe yaad kijiye,
Meri nigaah-e-shauq se har gul hai dewta,
Main ishq ka khuda hun mujhe yaad kijiye,
Naghmon ki ibtida thi kabhi mere naam se,
Ashkon ki intiha hun mujhe yaad kijiye,
Gum-sum khadi hain donon jahaan ki haqeeqaten,
Main un se kah raha hun mujhe yaad kijiye,
'Saghar' kisi ke husn-e-taghaful-shiaar ki,
Bahki hui ada hun mujhe yaad kijiye.!!
"Saghar Siddiqui"
___
Khizr = name of a Prophet who is said to have discovered the fountain of life and drunk it, guide, leader,
Raahzan = a robber,
Husn-e-taghaful-shiaar = habitually negligent beauty,
Hai dua yaad magar harf-e-dua yaad nahin,
Mere naghmaat ko andaaz-e-nawa yaad nahin,
Main ne palkon se dar-e-yaar pe dastak di hai,
Main wo saail hun jise koi sada yaad nahin,
Main ne jin ke liye raahon mein bichhaya tha lahu,
Hum se kahte hain wahi ahd-e-wafa yaad nahin,
Kaise bhar aayin sar-e-shaam kisi ki aankhein,
Kaise tharraai charaghon ki ziya yaad nahin,
Sirf dhundlaye sitaaron ki chamak dekhi hai,
Kab hua kaun hua kis se khafa yaad nahin,
Zindagi jabr-e-musalsal ki tarah kaati hai,
Jaane kis jurm ki paai hai saza yaad nahin,
Aao ek sajda karein aalam-e-madhoshi mein,
Log kahte hain ki 'Saghar' ko khuda yaad nahin.!!
"Saghar Siddiqui"
Har marhala-e-shauq se lahra ke guzar ja,
Aasaar-e-talatum hon to bal kha ke guzar ja,
Bahki hui makhmoor ghataon ki sada sun,
Firdaus ki tadbeer ko bahla ke guzar ja,
Maayus hain ahsaas se uljhi hui raahein,
Paayel dil-e-majboor ki chhanka ke guzar ja,
Yazdaan o ahrman ki hikayaat ke badle,
Insaan ki riwayat ko dohra ke guzar ja,
Kahti hain tujhe may'kada-e-waqt ki raahein,
Bigdi hui taqdeer ko suljha ke guzar ja,
Bujhti hi nahin tishnagi-e-dil kisi soorat,
Ai abr-e-karam aag hi barsa ke guzar ja,
Kaante jo lagein haath to kuchh ghum nahin 'Saghar',
Kaliyon ko har ek gaam pe bikhra ke guzar ja.!!
"Saghar Siddiqui"
Is darja ishq maujib-e-ruswaai ban gaya,
Main aap apne ghar ka tamashaai ban gaya,
Dair o haram ki raah se dil bach gaya magar,
Teri gali ke mod pe saudaai ban gaya,
Bazm-e-wafa mein aap se ek pal ka saamna,
Yaad aa gaya to ahd-e-shanasaai ban gaya,
Be-saakhta bikhar gayi jalwon ki kaayenat,
Aaina too kar teri angdaai ban gaya,
Dekhi jo raqs karti hui mauj-e-zindagi,
Mera khyaal waqt ki shahnaai ban gaya.!
"Saghar Siddiqui"
___
Maujib-e-ruswaai = Reason; motive of dishonour; notoriety; humiliation,
Kaliyon ki mahak hota taaron ki ziya hota,
Main bhi tere gulshan mein phoolon ka khuda hota,
Har cheez zamaane ki aaina-dil hoti,
Khamosh mohabbat ka itna to sila hota,
Tum haal-e-pareshaan ki pursish ke liye aate,
Sahra-e-tamanna mein mela sa laga hota,
Har gaam pe kaam aate zulfon ke teri saaye,
Ye qaafila-e-hasti be-rahnuma hota,
Ahsaas ki daali par ek phool mahakta hai,
Zulfon ke liye tum ne ek roz chuna hota.!!
"Saghar Siddiqui"
Khata'waar-e-murawwat ho na marhoon-e-karam ho ja,
Masarrat sar jhukayegi parastaar-e-alam ho ja,
Inhi be-rabt khwaabon se koi tabeer niklegi,
Inhi uljhi hui raahon pe mera hum-qadam ho ja,
Kisi zardaar se jins-e-tabassum maangne waale,
Kisi bekas ke laashe par sharik-e-chashm-e-nam ho ja,
Kisi din in andheron mein charaghaa'n ho hi jayega,
Jala kar daagh-e-dil koi ziya-e-shaam-e-ghum ho ja,
Tujhe suljhayega ab inqilaab-e-waqt ka shaana,
Taqaza-e-junoon hai gesu-e-dauraa'n ka kham ho ja,
Tajassus markaz-e-taqdeer ka qaail nahin hota,
Shaoor-e-bandagi! begana-e-dair-o-haram ho ja,
Ye manzil aur gard-e-karwaan 'saghar' kahaan apne,
Simat kar rahguzaar-e-waqt par naqsh-e-qadam ho ja.!!
"Saghar Siddiqui"
Ek waada hai kisi ka jo wafa hota nahin,
Warna in taaron bhari raaton mein kya hota nahin,
Ji mein aata hai ulat dein un ke chehre se naqaab,
Hausla karte hain lekin hausla hota nahin,
Shama jis ki aabru par jaan de de jhoom kar,
Wo patinga jal to jaata hai fana hota nahin,
Ab to muddat se raah-o-rasm-e-nazara band hai,
Ab to un ka toor par bhi saamna hota nahin,
Har shanawar ko nahin milta talatum se khiraaj,
Har safeene ka muhafiz nakhuda hota nahin,
Har bhikhari pa nahin sakta maqaam-e-khwajgi,
Har kas-o-na-kas ko tera ghum ata hota nahin,
Haaye ye begaanagi apni nahin mujh ko khabar,
Haaye ye aalam ke tu dil se juda hota nahin,
Baarha dekha hai 'Saghar' rahguzaar ishq mein,
Karwaan ke saath aksar rahnuma hota nahin.!!
"Saghar Siddiqui"
___
Shanawar = swimmer/ expert,
Talatum = dashing of waves, sea-storm, high tide, upheaval,
Khiraaj = paying obeisance,
Kas-o-na'kas = all and sundry, 05 everybody, great and small,
Rudaad-e-mohabbat kya kahiye kuchh yaad rahi kuchh bhool gaye,
Do din ki masarrat kya kahiye kuchh yaad rahi kuchh bhool gaye,
Jab jaam diya tha saaqi ne jab daur chala tha mahfil mein,
Ek hosh ki saa'at kya kahiye kuchh yaad rahi kuchh bhool gaye,
Ab waqt ke naazuk honthon par majrooh tarannum raqsaa'n hai,
Bedaad-e-mashiyyat kya kahiye kuchh yaad rahi kuchh bhool gaye,
Ahsaas ke may-khaane mein kahaan ab fikr-o-nazar ki qandeelein,
Aalam ki shiddat kya kahiye kuchh yaad rahi kuchh bhool gaye,
Kuchh haal ke andhe saathi the kuchh maazi ke ayyaar sajan,
Ahbaab ki chahat kya kahiye kuchh yaad rahi kuchh bhool gaye,
Kaanton se bhara hai daaman-e-dil shabnam se sulagti hain palkein,
Phoolon ki sakhawat kya kahiye kuchh yaad rahi kuchh bhool gaye,
Ab apni haqeeqat bhi 'Saghar' be-rabt kahaani lagti hai,
Duniya ki haqeeqat kya kahiye kuchh yaad rahi kuchh bhool gaye.!!
"Saghar Siddiqui"
___
Majrooh = wounded, hurt, smitten,
Tarannum = modulation, a kind of song,
Bedaad-e-mashiyyat = tyranny of destiny,
Qandeelein = Hanging branched candlesticks; candlesticks; sconces,
Ayyaar = Artful, Cunning, Crafty, Imposter,
Sakhawat = generosity,
Saaqi ki ek nigaah ke afsaane ban gaye,
Kuchh phool toot kar mere paimane ban gaye,
Kati jahaan tasawwur-e-jaanaa mein ek shab,
Kahte hain log us jagah but-khaane ban gaye,
Jin par na saaye zulf-e-ghazalaan ke pad sake,
Ahsaas ki nigaah mein viraane ban gaye,
Jo pi sake na surkh labon ki tajalliyaan,
Duniya ke tajrabaat se anjaane ban gaye,
'Saghar' wahi maqaam hai ek manzil-e-faraaz,
Apne bhi jis maqaam pe begaane ban gaye.!!
"Saghar Siddiqui"
Wo bulaayen to kya tamasha ho,
Hum na jaayen to kya tamasha ho,
Ye kinaaron se khelne waale,
Doob jaayen to kya tamasha ho,
Banda-parwar jo hum pe guzri hai,
Hum bataayen to kya tamasha ho,
Aaj hum bhi teri wafaaon par,
Muskurayen to kya tamasha ho,
Teri soorat jo ittifaaq se hum,
Bhiil jaayen to kya tamasha ho,
Waqt ki chand saa'aten 'Saghar',
Laut aayen to kya tamasha ho.!!
"Saghar Siddiqui"
Ye jo deewane se do-chaar nazar aate hain,
In mein kuchh saahab-e-asraar nazar aate hain,
Teri mahfil ka bharam rakhte hain so jaate hain,
Warna ye log to bedaar nazar aate hain,
Door tak koi sitaara hai na koi jugnu,
Marg-e-ummeed ke aasaar nazar aate hain,
Mere daaman mein sharaaron ke siwa kuchh bhi nahin,
Aap phoolon ke kharidaar nazar aate hain,
Kal jinhein chhu nahin sakti thi farishton ki nazar,
Aaj wo raunaq-e-bazaar nazar aate hain,
Hashr mein kaun gawaahi meri dega 'Saghar',
Sab tumhaare hi taraf-daar nazar aate hain.!!
"Saghar Siddiqui"
Zakhm-e-dil par bahaar dekha hai,
Kya ajab laala-zaar dekha hai,
Jin ke daaman mein kuchh nahin hota,
Un ke seenon mein pyaar dekha hai,
Khaak udti hai teri galiyon mein,
Zindagi ka waqaar dekha hai,
Tishnagi hai sadaf ke honthon par,
Gul ka seena figaar dekha hai,
Saqiya! Ahtimam-e-baada kar,
Waqt ko sogwaar dekha hai,
Jazba-e-ghum ki khair ho 'Saghar',
Hasraton par nikhaar dekha hai.!!
"Saghar Siddiqui"
Waqt ki umr kya badi hogi,
Ek tere wasl ki ghadi hogi,
Dastaken de rahi hai palkon par,
Koi barsaat ki jhadi hogi,
Kya khabar thi ki nok-e-khanjar bhi,
Phool ki ek pankhudi hogi,
Zulf bal kha rahi hai maathe par,
Chaandni se saba ladi hogi,
Ai adam ke musafiro hushyaar,
Raah mein zindagi khadi hogi,
Kyun girah gesuon mein daali hai,
Jaan kisi phool ki adi hogi,
Iltija ka malaal kya kijiye,
Un ke dar par kahin padi hogi,
Maut kahte hain jis ko ai 'Saghar',
Zindagi ki koi kadi hogi..!!
"Saghar Siddiqui"
Taaron se mera jaam bharo main nashe mein hun,
Ai sakinaan-e-khuld suno main nashe mein hun,
Kuchh phool khil rahe hain sar-e-shaakh-e-may'kada,
Tum hi zara ye phool chuno main nashe mein hun,
Thehro abhi to subah ka maara hai zau-fishaa'n,
Dekho mujhe fareb na do main nashe mein hun,
Nashsha to maut hai ghum-e-hasti ki dhoop mein,
Bikhra ke zulf saath chalo main nashe mein hun,
Mela yun hi rahe ye sar-e-rahguzaar-e-zeest,
Ab jaam saamne hi rakho main nashe mein hun,
Paayel chhanak rahi hai nigaar-e-khyaal ki,
Kuchh ahtimaam-e-raqs karo main nashe mein hun,
Main dagmaga raha hun bayabaan-e-hosh mein,
Mere abhi qareeb raho main nashe mein hun,
Hai sirf ek tabassum-e-rangeen bahut mujhe,
'Saghar' ba-dosh laala-rukho main nashe mein hun.!!
"Saghar Siddiqui"
Poochha kisi ne haal kisi ka to ro diye,
Paani mein aks chaand ka dekha to ro diye,
Naghma kisi ne saaz pe chheda to ro diye,
Ghuncha kisi ne shaakh se toda to ro diye,
Udta hua ghubaar sar-e-raah dekh kar,
Anjaam hum ne ishq ka socha to ro diye,
Baadal faza mein aap ki tasveer ban gaye,
Saaya koi khyaal se guzra to ro diye,
Rang-e-shafaq se aag shagoofon mein lag gayi,
'Saghar' humare haath se chhalka to ro diye.!
"Saghar Siddiqui"
Main talkhi-e-hayaat se ghabra ke pi gaya,
Ghum ki siyah raat se ghabra ke pi gaya,
Itni daqeeq shai koi kaise samajh sake,
Yazdaa'n ke waqiaat se ghabra ke pi gaya,
Chhalke hue the jaam pareshan thi zulf-e-yaar,
Kuchh aise haadsaat se ghabra ke pi gaya,
Main aadmi hun koi farishta nahin huzoor,
Main aaj apni zaat se ghabra ke pi gaya,
Duniya-e-haadsaat hai ek dardnaak geet,
Duniya-e-haadsaat se ghabra ke pi gaya,
Kaante to khair kaante hain is ka gila hi kya,
Phoolon ki waardaat se ghabra ke pi gaya,
'Saghar' wo kah rahe the ki pi lijiye huzoor,
Un ki guzarishaat se ghabra ke pi gaya.!!
"Saghar Siddiqui"
Main talkhi-e-hayaat se ghabra ke pi gaya,
Ghum ki siyah raat se ghabra ke pi gaya,
Itni daqeeq shai koi kaise samajh sake,
Yazdaa'n ke waqiaat se ghabra ke pi gaya,
Chhalke hue the jaam pareshan thi zulf-e-yaar,
Kuchh aise haadsaat se ghabra ke pi gaya,
Main aadmi hun koi farishta nahin huzoor,
Main aaj apni zaat se ghabra ke pi gaya,
Duniya-e-haadsaat hai ek dardnaak geet,
Duniya-e-haadsaat se ghabra ke pi gaya,
Kaante to khair kaante hain is ka gila hi kya,
Phoolon ki waardaat se ghabra ke pi gaya,
'Saghar' wo kah rahe the ki pi lijiye huzoor,
Un ki guzarishaat se ghabra ke pi gaya.!!
"Saghar Siddiqui"
Ai dil-e-be'qaraar chup ho ja,
Ja chuki hai bahaar chup ho ja,
Ab na aayenge ruthne waale,
Deeda-e-ashk'baar chup ho ja,
Ja chuka kaarwaan-e-laal-o-gul,
Ud raha hai ghubaar chup ho ja,
Chhoot jatai hai phool se khushbu,
Rooth jaate hain yaar chup ho ja,
Hum faqeeron ka is zamane mein,
Kaun hai ghum-gusaar chup ho ja,
Haadso'n ki na aankh khul jaaye,
Hasrat-e-sogwaar chup ho ja,
Geet ki zarb se bhi ai 'Saghar',
Toot jaate hain taar chup ho ja.!
"Saghar Siddiqui"
