Tum Ne To Kah Diya Ke Mohabbat Nahi Mili,
Mujh Ko To Ye Kahne Ki Bhi Mohlat Nahi Mili...
Neendo'n Ke Des Jaate Koi Khwaab Dekhte,
Lekin Diya Jalane Se Fursat Nahi Mili...
Tujh Ko To Khair Shahar Ke Logo'n Ka Khauf Tha,
Aur Mujh Ko Apne Ghar Se Ijazat Nahi Mili...
Phir Ikhtilaaf Raaye Ki Soorat Nikal Padi,
Apni Yahaan Ksi Se Bhi Aadat Nahi Mili...
Be-Zaar Yoon Hue Ke Tere Ahd Mein Humein,
Sab Kuch Mila Sukoon Ki Daulat Nahi Mili..!!
"Noshi Gilani"
Ye Dil Bhulaata Nahi Hai Mohabbatein Us Ki,
Padi Hui Thin Mujhe Kitni Aadatein Us Ki..
Ye Mera Saara Safar Us Ki Khushbu Mein Kata,
Mujhe To Raah Dikhaati Thin Chaahatein Us Ki..
Ghiri Hui Hun Main Chehron Ki Bheed Mein Lekin,
Kahin Nazar Nahi Aati Shabahatein Us Ki..
Main Dard Se Rone Lagi Hun To Aisa Lagta Hai,
Ke Chhaanw Jaisi Thin Mujh Par Rafaqatein Us Ki..
Ye Kis Gali Mein Ye Kis Shahar Mein Nikal Aaye,
Kahaan Pe Rah Gayin Logon Sadaqatein Us Ki..
Main Baarishon Mein Juda Ho Gayi Hun Us Se Magar,
Ye Mera Dil, Meri Saansain Amanatein Us Ki..!!
"Noshi Gilani"
Hisaar-e-Lafz-o-Bayaan Mein Gum Hoon,
Abhi Teri Daastan Mein Gum Hoon...
Mein Dekh Sakti Hoon Doston Ko,
Magar Saf-e-Dushmanan Mein Gum Hoon...
Badan Ka Apna azaab Hai Aur,
Isi Azaab-e-Ziaan Mein Gum Hoon...
Ye Log Ghar Kah Rahe Hain Jis Ko,
Main Ek Aise Makaan Mein Gum Hoon...
Kahaan Wo Lazzat Musaafaton Ki,
Main Manzilon Ke Nishaan Mein Gum Hoon...
Khabar Nahi Mauj-e-Dast-e-Jaan Ki,
Hawa Hoon Aur Baadbaan Mein Gum Hoon...
Abhi Kahaan Fursat-e-Mohabbat,
Abhi Main Kaar-e-Jahaan Mein Gum Hoon..!!
"Noshi Gilani"
Rukta Bhi Nahi Theek Se Chalta Bhi Nahi Hai,
Ye Dil Ke Tere Baad Sambhalta Bhi Nahi Hai...
Ye Shahar Kisi Aaina-Kirdaar Badan Par,
Ilzaam Lagate Hue Darta Bhi Nahi Hai...
Ek Umr Se Hum Us Ki Tamanna Mai Hain Be-Khwaab,
Wo Chaand Jo Aangan Main Utarta Bhi Nahi Hai...
Phir Dil Mein Teri Yaad Ke Manzar Hain
Firozaa'n,
Aise Mein Koi Dekhne Waala Bhi Nahi Hai...
Is Umr Ke Sahra Main Teri Yaad Ka Baadal,
Talta Bhi Nahi Aur Barasta Bhi Nahi Hai...
Humraah Bhi Khwahish Se Nahi Rahta Humare,
Aur Baam-e-Rafaaqat Se Utarta Bhi Nahi Hai..!!
"Noshi Gilani"
Bila-jawaaz rakhein khud ko be-qaraar bhi kyun,
Jo tu nahin hai to phir tera intizaar bhi kyun..
Akelepan ka safar jab mera muqaddar hai,
To phir ai waada-shikan teri rahguzaar bhi kyun..
Use ganwa ke raho ab khizaaon ki zad mein,
Jo wo nahin hai to phir mausam-e-bahaar bhi kyun..
Agar bhulaaye hue us ko ek umr hui,
To phir ye aaj tabiyat hai sogwaar bhi kyun..
Wo jin labo'n pe yaqeen-e-wafa mahak na sake,
Phir un ke lams ki khwahish ho ek baar bhi kyun..
Jab us ko shauq tha rasto'n ki dhhool hone ka,
Palat ke dekhta jaata tha baar baar bhi kyun..!!
"Noshi Gilani"
Kuch Bhi Kar Guzarne Mein Der Kitni Lagti Hai,
Barf Ke Pighalne Mein Der Kitni Lagti Hai,
Us Ne Hans Kar Dekha To Muskura Diye Hum Bhi,
Zaat Se Nikalne Mein Der Kitni Lagti Hai,
Hijr Ki Tamaazat Se Wasl Ke Alaaw Tak,
Ladkiyon Ke Jalne Mein Der Kitni Lagti Hai,
Baat Jaisi Be-Ma'ani Baat Aur Kya Hogi,
Baat Ke Mukarne Mein Der Kitni Lagti Hai,
Za'am Kitna Karte Ho Ek Charaagh Par Apne,
Aur Hawa Ke Chalne Mein Der Kitni Lagti Hai,
Jab Yaqeen Ki Baanhon Per Shak Ke Paanw Pad Jaayein,
Choodiyan Bikharne Mein Der Kitni Lagti Hai.!!
"Noshi Gilani"
Kuch Bhi Kar Guzarne Mein Der Kitni Lagti Hai,
Barf Ke Pighalne Mein Der Kitni Lagti Hai,
Us Ne Hans Kar Dekha To Muskura Diye Hum Bhi,
Zaat Se Nikalne Mein Der Kitni Lagti Hai,
Hijr Ki Tamaazat Se Wasl Ke Alaaw Tak,
Ladkiyon Ke Jalne Mein Der Kitni Lagti Hai,
Baat Jaisi Be-Ma'ani Baat Aur Kya Hogi,
Baat Ke Mukarne Mein Der Kitni Lagti Hai,
Za'am Kitna Karte Ho Ek Charaagh Par Apne,
Aur Hawa Ke Chalne Mein Der Kitni Lagti Hai,
Jab Yaqeen Ki Baanhon Per Shak Ke Paanw Pad Jaayein,
Choodiyan Bikharne Mein Der Kitni Lagti Hai.!!
"Noshi Gilani"
Aankhein Bhi Wahi Hain To Dareecha Bhi Wahi Hai,
Aur Soch Ke Aangan Mein Utarta Bhi Wahi Hai..
Jis Ne Mere Jazbon Ki Sadaaqat Ko Na
Jaana,
Ab Meri Rafaaqat Ko Tarasta Bhi Wahi Hai..
Is Dil Ke Kharaabe Se Guzar Kis Ka Hua Hai,
Aankhain Bhi Wahi, Honth Bhi, Lahja Bhi Wahi Hai..
Jo Kuch Bhi Kaha Tha Meri Tanhaai Ne Tujh Se,
Is Shahar Ki Deewar Pe Likkha Bhi Wahi Hai..
Wo Jis Ne Diye Mujh Ko Mohabbat Ke Khazaane,
Baadal Ki Tarah Aankh Se Barsaa Bhi Wahi Hai..!!
"Noshi Gilani"
Kahin Karte Nahi izhaar, Chup Hain,
Humein To Hukm Hai Sarkaar, Chup Hain..
Kahani Kuch Batana Chahti Hai,
Magar Is Ke Sabhi Kirdaar Chup Hain..
Bahut Hai Barish-e-Sung-e-Malaamat,
Magar Hum Surat-e-Kohsaar, Chup Hain..
Abhi Tak Hai Bahut Mahfooz Qatil,
Ke maqtal Ke Dar-o-Deewar Chup Hain..
Pata Rahzan Ka Khalqat Poochhti Hai,
Magar Basti Ke Pahre'Daar Chup Hain..
Wahi Mausam, Wahi Zanjeer-e-Shab Hai,
Magar Ye Log Kyun Is Baar Chup Hain.?..
"Noshi Gilani"
Mohabbat se riha hona zaroori ho gaya hai,
Mera tujh se judaa hona zaroori ho gaya hai...
Wafa ke tajaribe karte hue to umr guzri,
Zara sa bewafa hona zaroori ho gaya hai...
Meri awaaz tanhaai main marti ja rahi hai,
Kisi ka hum-nawaa hona zaroori ho gaya hai...
Azaab zulmat-e-shab hai ke ab dil ke labo'n par,
Koi harf-e-duaa hona zaroori ho gaya hai...
Kahaan tak hum yunhi bojhal fizaaon mein rahein ge,
Koi ek faisla hona zaroori ho gaya hai...
Bhanwar mein kayi barson se apni kashti-e-jaan,
Kisi ka nakhuda hona zaroori ho gaya hai...
Yahaan chaaron taraf khauf badhta ja raha hai,
Sukhan na-aashna hona zaroori ho gaya hai.!!
"Noshi Gilani"
Humare Bas Mein Agar Apne Faisle Hote,
To Hum Kabhi Ke Gharon Ko Palat Gaye Hote..
Qareeb Rah Ke Sulagne Se To Kitna Behtar Tha,
Kisi Muqaam Par Hum Tum Bichhad Gaye Hote..
Kabhi To Ret Ko Hum Mutthiyon Mein Bhar Lete,
Kabhi Hawaaon Se Apne Mukaalme Hote..
Humare Naam Pe Koi Charaagh To Jalta,
Kisi Zabaan Pe Humare Bhi Tazkire Hote..
Hum Apna Koi Alag Raasta Bana Lete,
Humare Dil Ne Agar Hausle Kiye Hote..!!
"Noshi Gilani"
Kabhi ye chup mein kabhi meri baat baat mein tha,
Tumhara aks meri saari kayenaat mein tha..
Hum ahl-e-ishq bahut bad-gumaan hote hain,
Isi tarah ka koi wasf teri zaat mein tha..!!
"Noshi Gilani"
Shab-e-wahshat ki aadat ho gayi hai,
Mujhe tum se mohabbat ho gayi hai..
Kisi ka lams hai jis ke hunnar se,
Mukammal sab ibaadat ho gayi hai,
Koi din ke liye deewangi bhi,
Mere dil ko ghaneemat ho gayi hai..
Bahut behaal rahte the magar ab,
Humain hijrat ki aadat ho gayi hai..
Gulaab-aasaar raste muntazir hai,
Ke mausam ki inaayat ho gayi hai..
Zameen se aasman tak roshni hai,
Meharbaan hum pe fitrat ho gayi hai.!!
"Noshi Gilani"
Aalam-e-mohabbat mein,
Ek kamaal wahshat mein,
Be-sabab rafaaqat ka,
Dukh uthaana padta hai,
Titliyaan pakadney ko,
Door jaana padta hai..!!
"Noshi Gilani"
Kaise Aayega Tere Khad-o-Khaal Ka
Mausam.?..
Qismaton Mein Jab Likha Hai Zawaal Ka
Mausam...
Kis Ne Khel Khela Hai Kis Ne Hijr Jhela Hai,
Ab Guzar Gaya Jaanaa Is Sawaal Ka
Mausam...
Kis Tarah Se Mumkin Tha Ek Shaakh Par Khilte,
Main Ke Hijr Ka Lamha, Tu Wisaal Ka
Mausam...
Dil Ke Ab To Sahra Hai Aur Aise Sahra Mein,
Jaane Kab Talak Thehre Ab Malaal Ka
Mausam...
Aaj Tak Bhi Thehra Hai Dil Ki Rah-guzaaron Par,
Tere Lams Ka, Tere Khad-o-Khaal Ka
Mausam...
Hum Kubhi To Dekhein Ge Wahshaton Ke Sahra Mein,
Ai Khuda Mohabbat Ke Aitedaal Ka Mausam..!!
"Noshi Gilani"
Hai Mohabbat Azaab-e-Barbaadi,
Dil Ko Ye Baat Kis Ne Samjha Di.?..
Be-Wafaai Ne Khaak Kar Daali,
Chaahaton Ki Hari Bhari Daali..
Ik Shab-e-Wasl Ki Guzaarish Thi,
Us Ne Tasveer Apni Bhijwa Di..
Tere Ghum Ke Jazeerah-e-Dil Mein,
Phailti Jaa Rahi Hai Aabaadi..
Kis Qadar Baanjh Hoti Jaati Hai,
Takht-e-Ikhlaas Teri Shahzaadi..
Waqt Zaalim Tha Meri Har Khwahish,
Us Ne Deewaar-e-Ghum Mein Chunwa Di..!!
"Noshi Gilani"
Lahoo Tak Aankh Se Ab Bah Liya Hai,
Bahut Tha Jabr Lekin Sah Liya Hai..
Azaab-e- Hijr Ab Waapas Palat Ja,
Bahut Din Saath Mere Rah Liya Hai..
Nami Aankhon Se Jaati Hi Nahi Hai,
Sitam Is Dil Ne Itna Sah Liya Hai..
Tujhe Kahna Tha Jo Ahwaal Dil Ka,
Dar-o-Deewaar Se Hi Kah Liya Hai..!!
"Noshi Gilani"
Umr Rayegaa'n Kar Di Tab Ye Baat Maani Hai,
Maut Aur Mohabbat Ki Ek Hi Kahani Hai,
Khel Jo Bhi Tha Jaanaa Ab Hisaab Kya Karna,
Jeet Jis Kisi Ki Ho Hum Ne Haar Maani Hai,
Wasl Par Bhi Naadim The Hijr Par Bhi Sharminda,
Wo Bhi Rayegaani Thi Ye Bhi Rayegaani Hai,
Ye Mera Hunar Teri Khusbuoun Se Wabasta,
Mere Saare Lafzon Par Teri Hukmarani Hai,
Jaane Kaun Shahzada Kab Chura Ke Le Jaaye,
Wo Jo Apne Aangan Mein Khusbuoun Ki Raani Hai.!!
"Noshi Gilani"
Meri Aankhon Ko Soojhta Hi Nahi,
Ya Muqaddar Mein Raasta Hi Nahi..
Wo Bhare Shahar Mein Kisi Se Bhi,
Mere Baare Mein Poochhta Hi Nahi..
Phir Wahi Shaam Hai Wahi Hum Hain,
Haan Magar Dil Mein Hausla Hi Nahi..
Ham Chale Us Ki Bazm Se Uth Kar,
Aur Wo Hai Ke Rokta Hi Nahi..
Dil Jo Ek Dost Tha Magar Wo Bhi,
Chup Ka Patthar Hai Bolta Hi Nahi..
Mein To Us Ki Talaash Mein Gum Hun,
Wo Kubhi Mujh Ko Dhundhta Hi Nahi.!!
"Noshi Gilani"
Jo dard ke sahra mein akela bhi bahut hai,
Us ke liye deewar ka saaya bhi bahut hai,
Dekha nahi tanhaai mein tum ne kabhi us ko,
Bichhde hue logon ke liye roya bhi bahut hai,
Kuch tujh ko mohabbat par yaqeen tha na
wafa par,
Kuch dukh meri taqdeer mein likha bhi bahut hai,
Beenaai andheron se bhala kaise bachata,
Ek shakhs tere hijr mein jaaga bahut hai,
Wo aur hai jo chhu kar tujhe dekhna chahte,
Mujh ko tere khwab ki duniya bhi bahut hai,
Kirdaar se mahroom tha ye shahar to us ne,
Hum ko dar-o-deewar par likha bhi bahut hai..!!
"Noshi Gilani"
