Shaam se pahle ghar gaye hote,
Ya sar-e-shaam mar gaye hote...
Is gadayana zindagi se to,
Waz'a-darana mar gaye hote...
Yoon bhi ek umr rayegaa'n guzri,
Yoon bhi kuchh din guzar gaye hote...
Tu jo dil se utar gaya hota,
Zakhm dil ke ubhar gaye hote...
Hum na hote to hadsaat-e-jahaan,
Jaane kis kis ke sar gaye hote...
Koi daaman-kash-e-khyaal na tha,
Warna hum bhi thehar gaye hote...
Shamm-e-mahfil na the ke mahfil mein,
Le ke hum zakhm-e-sar gaye hote.!!
"Rasa Chughtai"
Tere aane ka intizaar raha,
Umr bhar mausam-e-bahaar raha..
Paa-ba-zanjeer zulf-e-yaar rahi,
Dil aseer-e-khyaal-e-yaar raha..
Saath apne ghumon ki dhoop rahi,
Saath ek sarw-e-saya-daar raha..
Main pareshan-haal aashufta,
Surat-e-rang-e-rozgaar raha..
Aaina aaina raha phir bhi,
Laakh dar-parda-e-ghubaar raha..
Kab hawaaen tah-e-kamand aayin,
Kab nigaahon pe ikhtiyaar raha..
Tujh se milne ko be-qaraar tha dil,
Tujh se mil kar bhi be-qaraar raha.!!
"Rasa Chughtai"
zehn o dil ke faasle the hum jinhein sahte rahe,
Ek hi ghar mein bahut se ajnabi rahte rahe..
Door tak saahil pe dil ke aablon ka aks tha,
Kashtiyan sholon ki dariya mom ke bahte rahe..
Kaise pahunche manzilon tak wahshaton ke qaafile,
Hum saraabon se safar ki dastaan kahte rahe..
Aane waale mausamon ko taazgi milti gayi,
Apni fasl-e-aarzu ko hum khizaa'n kahte rahe..
Kaise mit payengi 'Zareen' ye hadein afkaar ki,
Toot kar dil ke kinaare door tak bahte rahe.!!
"Iffat Zareen"
Rooh jismo'n se baahar bhatakti rahi,
Zakhmi yaadon ko aanchal se dhhakti rahi..
Mere haathon mein thin gard ki chaadarein,
Zindagi thi ke daaman jhatakti rahi..
Chaandni mein haseen zahar ghulta raha,
Sar ko marmar pe naagin patakti rahi..
Main ghataon se khud ko bachaati rahi,
Tegh bijli ki sar pe latakti rahi..
Mere honthon ko kab mil saki baansuri,
Saans 'Zareen' labo'n pe atakti rahi.!!
"Iffat Zareen"
Khwab aankhon se zabaan se har kahani le gaya,
Mukhtasar ye hai wo meri zindagaani le gaya..
Phool se mausam ki barsaatein hawaon ki mahak,
Ab ke mausam ki wo sab shaamein suhani le gaya..
De gaya mujh ko saraabon ka sukoot-e-mustaqil,
Mere ashkon se wo dariya ki rawaani le gaya..
Khaak ab udne lagi maidaan sahra ho gaye,
Ret ka tufaan dariyaon se paani le gaya..
Kaun pahchanega 'Zareen' mujh ko itni bheed mein,
Mere chehre se wo apni har nishaani le gaya.!!
"Iffat Zareen"
Ghabra gaye hain waqt ki tanhaaiyon se hum,
Ukta chuke hain apni hi parchhaaiyon se hum...
Saaya mere wajood ki had se guzar gaya,
Ab ajnabi hain aap shanasaaiyon se hum...
Ye soch kar hi khud se mukhatib rahe sada,
Kya guftugu karenge tamashaaiyon se hum...
Ab denge kya kisi ko ye jhonke bahaar ke,
Maangenge dil ke zakhm bhi purwaaiyon se hum...
'Zareen' kya bahaaron ko mud mud ke dekhiye,
Manoos the khizaa'n ki dil-aasaaiyon se hum.!!
"Iffat Zareen"
__________
Dil-aasaaiyon = access to heart,
Be-samt raaston pe sada le gayi mujhe,
Aahat magar junoon ki bacha le gayi mujhe...
Patthar ke jism mom ke chehre dhuaan dhuaan,
Kis shahar mein uda ke hawa le gayi mujhe...
Maathe pe us ke dekh ke laali sindoor ki,
Zakhmon ki anjuman mein hina le gayi mujhe...
Khushbu pighalte lamhon ki saanson mein kho gayi,
Khushbu ki waadiyon mein saba le gayi mujhe...
Jo log bheekh dete hain chehre ko dekh kar,
'Zareen' unhin ke dar pe ana le gayi mujhe.!!
"Iffat Zareen"
Ajeeb karb-e-musalsal dil-o-nazar mein raha,
Wo raushni ka musafir andhere ghar mein raha...
Wo chaandni ka muraqqaa nahin tha jugnu tha,
Charaagh ban ke jala aur shajar shajar mein raha...
Kahawaton ki tarah wo bhi shahar-e-maani tha,
Bujha bujha sa diya jo kisi khandar mein raha...
Wo jis ko khoj saraabon mein thi samandar ki,
Wo apne dasht-e-dil-o-jaan ki rahguzar mein raha...
Wahi to naqsh-e-qadam the jo saare mit te gaye,
Wo daagh-e-sajda tha baaqi jo sang-e-dar mein raha...
Yahi tilism tha 'Zareen' jise na tod saki,
Wajood us ka to taqdeer ke bhanwar mein raha.!!
"Iffat Zareen"
__________
Karb-e-musalsal = Continuous agony,
Muraqqaa = album, portfolio,
Agar wo mil ke bichhadne ka hausla rakhta,
To darmiyaan na muqaddar ka faisla rakhta..
Wo mujh ko bhool chuka ab yaqeen hai warna,
Wafa nahin to jafaon ka silsila rakhta..
Bhatak rahe hain musafir to raaste gum hain,
Andheri raat mein dipak koi jala rakhta..
Mahak mahak ke bikharti hain us ke aangan mein,
Wo apne ghar ka dareecha agar khula rakhta..
Agar wo chaand ki basti ka rahne waala tha,
To apne saath sitaron ka qaafila rakhta..
Jise khabar nahin khud apni zaat ki 'Zareen',
Wo doosron ka bhala kis tarah pata rakhta.!!
"Iffat Zareen"
Roz wahshat koi nayi mere dost,
Is ko kahte hain zindagi mere dost..
Alam ahsaas aagahi mere dost,
Saari baatein hain kaaghzi mere dost..
Dekh izhaariye badal gaye hain,
Ye hai ikkiswin sadi mere dost..
Kya charaghon ka tazkira karna,
Raushni ghut ke mar gayi mere dost..
Haan kisi almiye se kam kahaan hai,
Meri haalat teri hansi mere dost..
Saath dene ki baat saare karein,
Aur nibhaye koi koi mere dost..
Itni galiyan ug aain basti mein,
Bhool baitha teri gali mere dost..
Laazmi hai khirad ki bedaari,
Neend lekin kabhi kabhi mere dost.!!
"Abdurrahman Wasif"
Mez qalam qirtaas dareecha sannata,
Kamra khidki zard ujaala sannata..
Meri aankhon mein dhundlaai gahri chup,
Aur chehre par utra peela sannata..
Meri aankhon mein likkhi tahreer padho,
Hijr tamanna wahshat sahra sannata..
Goonj uthi hai mere andar khamoshi,
Nas nas mein ghut ghut kar bahta sannata..
Us ke saath chali aati thin qilqaarein,
Us ke baad hua hai kitna sannata..
Pahle meri zaat mein tha maujood koi,
Ab hai meri zaat ka hissa sannata..
Jhaag udate dariya ke hangame par,
Naqsh hua dil par afsurda sannata..
Main ne ghanton is ummid pe chup saadhi,
Shayad ke wo tod hi dega sannata..
Mil kar bain karein sab meri hijrat par,
Chaand udaasi jheel kinara sannata.!!
"Abdurrahman Wasif"
__________
Qirtaas = paper,
Bain = lamentation, wailing for the dead,
Tum Ke Sunte Rahe Auron Ki Zabani Logo,
Hum Sunate Hain Tumhein Apni Kahani Logo..
Kaun Tha Dushman-e-jaan Wo Koi Apna Tha Ke Ghair,
Haan Wahi Dushman-e-jaan Dilbar-e-jaani Logo..
Zulf Zanjeer Thi Zaalim Ki To Shamsheer Badan,
Roop Sa Roop Jawani Si Jawani Logo..
Samane Us Ke Dikhe Nargis-e-shehla Beemar,
Ru-Ba-Ru Us Ke Bhare Sarw Bhi Paani Logo,
Us Ki Guftaar Mein Khanda Tha Shagfat-e-gul Ka,
Us Ki Raftaar Mein Chashme Ki Rawani Logo..
Us Ke Malboos Se Sharminda Qaba-e-laala,
Us Ki Khushbu Se Jale Raat Ki Raani Logo..
Hum Jo Paagal The To Be-wajah Nahi The Paagal,
Ek Dunia Thi Magar Us Ki Deewani Logo,
Ishq Aur Mushk Chhupaye Nahi Chhupte Yoon Bhi,
Kab Raha Raaz Koi Raaz-e-nihani Logo,
Ek To Ishq Kiya Ishq Bhi Phir 'Meer' Sa Ishq,
Is Pe 'Ghalib' Ki Si Aashafta-Bayani Logo..
Dastan Koi Bhi Ho Zikr Kisi Shakhs Ka Ho,
Hum Ne Us Naam Se Taheed Uthani Logo..
Haan Wahi Naam Ke Jis Naam Se Wabasta Hai,
Har Mohabbat Wo Nayi Ho Ke Purani Logo..
Hum Hi Sada The Kiya us Pe Bharosa Kya Kya,
Hum Hi Nadaan The Kd Logo Ki Na Maani Logo..
Hum To Us Ke Liye Ghar Baar Bhi Taj Bithe The,
Us Sitamgar Ne Magar Qadar Na Jaani Logo..
Kis Tarah Bhool Gya Qaul-O-Qasam Wo Apne,
Kitni Be-Sarfa Gayi Yaad Dahani Logo..
Jis Tarha Titlian Baghon Se Safar Kar Jain,
Jise Alfaz Mein Mar Jain Mafi Logo,
Ab Ghazal Koi Utarti Hai To Nohe Ki Tarah,
Shayeri Ho Gayi Hai Marsia-Khwani Logo..
Shama-Rawayyon Ki Mohabbat Mein Ye Hi Hota Hai,
Rah Gaya Daag Faqat Dil Ki Nishani Logo..!
تم کہ سنتے رہے اوروں کی زبانی لوگو
ہم سُناتے ہیں تمہیں اپنی کہانی لوگو
کون تھا دشمنِ جاں وہ کوئی اپنا تھا کہ غیر
ہاں وہی دُشمنِ جاں دلبرِ جانی لوگو
زُلف زنجیر تھی ظالم کی تو شمشیر بدن
رُوپ سا رُوپ جوانی سی جوانی لوگو
سامنے اُسکے دِکھے نرگسِ شہلا بیمار
رُو برو اُسکے بھرے سَرو بھی پانی لوگو
اُسکے ملبوس سے شرمندہ قبائے لالہ
اُس کی خوشبو سے جلے رات کی رانی لوگو
ہم جو پاگل تھے تو بے وجہ نہیں تھے پاگل
ایک دُنیا تھی مگر اُس کی دِوانی لوگو
ایک تو عشق کیا عشق بھی پھر میر سا عشق
اس پہ غالب کی سی آشفتہ بیانی لوگو
ہم ہی سادہ تھے کِیا اُس پہ بھروسہ کیا کیا
ہم ہی ناداں تھے کہ لوگوں کی نہ مانی لوگو
ہم تو اُس کے لئے گھر بار بھی تج بیٹھے تھے
اُس ستمگر نے مگر قدر نہ جانی لوگو
کس طرح بھُول گیا قول و قسم وہ اپنے
کتنی بے صرفہ گئی یاد دہانی لوگو
اب غزل کوئی اُترتی ہے تو نوحے کی طرح
شاعری ہو گئی اب مرثیہ خوانی لوگو
شمع رویوں کی محبت میں یہی ہوتا ھے
رہ گیا داغ فقط دل کی نشانی لوگو...
Jo Nafrato'n Ka Jamaal Thehra,
Mohabbato'n Ka Zawaal Thehra..
Na Aankh Roi Na Dil Paseeja,
Tumhaara Jaana Kamaal Thehra..
Tumhaari Yaadein Jahaan Bhi Thehri,
Wahin Pe Dil Mein Malaal Thehra..
Jawaab Kyunkar.? Daleel Kis Ko.?
Humare Lab Pe Ye Sawaal Thehra..
Jo Hum Ne Socha Tha Ishq Hoga,
Faqat Humara Khyaal Thehra..
Wo Sun Ke Chup Hain Kahani "chup" Ki,
Ye Humara Jaah-o-jamaal Thehra..
Wo Hum Se Mil Kar Bhi Mil Na Paaye,
Ajab Humara Wisaal Thehra..
Wo Khud Ke Jaisa Hi Doosra Hai,
Wo Aap Apni Misaal Thehra..
Na Neend Aaye, Na Chain Paayen,
Adhoora Sapna Wabaal Thehra..
'Ali' Ko Ya Rab, Bulao Waapas,
Ke Is Ka Jeena Muhaal Thehra.!
"Ali Sarmad"
جو نفرتوں کا جمال ٹھہرا
محبتوں کا زوال ٹھہرا...
نہ آنکھ روئی ، نہ دل پسیجا
تمہارا جانا کمال ٹھہرا !!!...
تمہاری یادیں جہاں بھی ٹھہریں
وہیں پہ دِل میں ملال ٹھہرا...
جواب کیونکر ؟ دلیل کس کو؟
ہمارے لب پہ سوال ٹھہرا؟...
جو ہم نے سوچا تھا عشق ہو گا
فقط ہمارا خیال ٹھہرا !!!...
وہ سُن کے چُپ ہیں کہانی "چُپ" کی
یہ ہمرا جاہ و جلال ٹھہرا...
وہ ہم سے مل کر بھی مل نہ پائے
عجب ہمارا وصال ٹھہرا !!!...
وہ خود کے جیسا ہی دوسرا ہے
وہ آپ اپنی مثال ٹھہرا...
نہ نیند آوے ، نہ چین پاویں
ادھورا سپنا وَبال ٹھہرا...
علیؔ کو یارب! بلاؤ واپس
کہ اِس کا جینا محال ٹھہرا !
علیؔ سرمد
Mera Sukoon Mera Aitibaar Waapas Kar,
Mujhe Tu Mera Wo Khoya Qaraar Waapas Kar..
Tere Sulook Ne Dil Kar Diya Supurd-e-khizaa'n,
Na Chheen Mujh Se Tu Meri Bahaar Waapas Kar..
Milega Kya Tujhe Le Kar Mere Shafaq Rukhsaar,
Ai Umr-e-rafta Tu Mera Nikhaar Waapas Kar..
Mera Khuloos Tha Meri Ibaadaton Jaisa,
Hai Qarz Tujh Pe Tu Mera Udhaar Waapas Kar..
Tujhi Ko Tera Ye Patthar Ka Dil Mubarak Ho,
Mujhe Tu Mera Dil-e-laala-zaar Waapas Kar.!
میرا سکون میرا اعتبار واپس کر
مجھے تُو میرا وہ کھویا قرار واپس کر
ترے سلوک نے دل کر دیا سپردِ خزاں
نہ چھین مجھ سے تو میری بہار واپس کر
ملےگا کیا تجھے لے کر میرے شفق رخسار؟
اے عمرِ رفتہ تو میرا نکھار واپس کر
میرا خلوص تھا میری عبادتوں جیسا
ہے قرض تجھ پہ تو میرا اُدھار واپس کر
تجھی کو یہ تیرا پتھر کا دل مبارک ہو
مجھے تُو میرا دلِ لالہ زار واپس کر __ !!
Guzar Gaye Hain Bahut Din Rafaqat-e-shab Mein,
Ek Umr Ho Gayi Chehra Wo Chaand Sa Dekhe,
Tere Siwa Bhi Kayi Rang Khush-Nazar The Magar,
Jo Tujh Ko Dekh Chuka Ho Wo Aur Kya Dekhe..!!
"Parween Shakir"
Aaj Takra Gaya Tha Main Khud Se...
Aaj Main Be'hisaab Toota Hoon..!!
Tu Ab Ke Baad Jo Mera Khuloos Parkhega,
Main Tere Saamne Saare Hisaab Rakh Dunga...
Meri Aankhon Ko Raas Aa Gaya Hai Khaali-pan,
Main Tere Haath Pe Tere Ye Khwaab Rakh Dunga..!!
