Us Ki Ek Duniya Hun Main Aur Meri Ek Duniya Hai Wo

Us ki ek duniya hun main aur meri ek duniya hai wo,
Dasht mein tanha hun main aur shahar mein tanha hai wo..

Main bhi kaisa aaina hun aaina-dar-aaina,
Door tak chehra-ba-chehra bas nazar aata hai wo..

Us ki khushbu se mahak kar phool ban jaata hai dil,
Mausam-e-gul ki tarah aata hai wo jaata hai wo..

Zindagi apni musalsal chahaton ka ek safar,
Is safar mein baar-ha mil kar bichhad jaata hai wo..

Khwab kya hai ek khandar hai ye khandar kitna haseen,
Is khandar mein sair karne ke liye aata hai wo..

Main sarapa aarzu hun aarzu-e-na-tamaam,
Mujh ko har manzil se aage ki khabar deta hai wo..

Husn kya hai ek ghazal hai 'Ashk' ek taaza ghazal,
Jam hai meena hai wo saaghar hai wo sahba hai wo.!!

"Ibrahim Ashk"

Teri Zameen Se Uthenge To Aasmaan Honge

Teri zameen se uthenge to aasmaan honge,
Hum aise log zamane mein phir kahaan honge..

Chale gaye to pukaregi har sada hum ko, 
Na jaane kitni zabaanon se hum bayaan honge..

Lahu lahu ke siwa kuchh na dekh paoge, 
Humare naqsh-e-qadam is qadar ayaan honge..

Samet lijiye bheege hue har ek pal ko,
Bikhar gaye jo ye moti to rayegaan honge..

Uchaat dil ka thikana kisi ko kya maloom,
Hum apne aap se bichhde to phir kahaan honge..

Hain apni mauj ke bahte hue samandar hum,
Tamaam dasht-e-junoon mein rawaan-dawaan honge..

Ye bazm-e-yaar hai qurbaan jaaiye is par,
Suna hai 'Ashk' yahaan dil sabhi jawaan honge.!!

"Ibrahim Ashk"

Sheeshe Ka Aadmi Hun Meri Zindagi Hai Kya

Sheeshe ka aadmi hun meri zindagi hai kya,
Patthar hain sab ke haath mein mujh ko kami hai kya..

Ab shahar mein wo phool se chehre nahin rahe,
Kaisi lagi hai aag ye basti hui hai kya..

Main jal raha hun aur koi dekhta nahin,
Aankhein hain sab ke paas magar bebasi hai kya..

Tum dost ho to mujh se zara dushmani karo,
Kuchh talkhiyan na hon to bhala dosti hai kya..

Ai gardish-e-talaash na manzil na raasta,
Mera junoon hai kya meri aawaargi hai kya..

Khush ho ke har fareb zamane ka kha liya,
Ye dil hi jaanta hai ke dil par bani hai kya..

Do bol dil ke hain jo har ek dil ko chhu sakein,
Ai 'Ashk' warna sheyr hain kya shaairi hai kya.!!

"Ibrahim Ashk"

Ru-ba-ru Un Ke Koi Harf Ada Kya Karte

Ru-ba-ru un ke koi harf ada kya karte,
Dard to hum ko chhupana tha sada kya karte..

Bewafaai bhi wafa hi ki tarah ki us ne,
Aise insaan se karte to gila kya karte..

Chhin gayin haath uthane se duaaen mahngi,
Hausla phir wo duaaon ka bhala kya karte..

Kuchh to aate rahe ummid ke jhonke warna,
Itna shadaab mujhe aab o hawa kya karte..

Apne meyaar se girna nahin aaya hum ko,
Apne kirdaar ko hum is se siwa kya karte.. 

Jab bhi aaya koi achchha hi khyaal aaya hai,
'Ashk' hum jaise zamane ka bura kya karte.!!

"Ibrahim Ashk"

Raat Bhar Tanha Raha Din Bhar Akela Main Hi Tha

Raat bhar tanha raha din bhar akela main hi tha,
Shahar ki aabaadiyon mein apne jaisa main hi tha..

Main hi dariya main hi tufaan main hi tha har mauj bhi,
Main hi khud ko pi gaya sadiyon se pyasa main hi tha..

Kis liye katra ke jaata hai musafir dam to le,
Aaj sookha ped hun kal tera saaya main hi tha..

Kitne jazbon ki niraali khushbuein thin mere paas,
Koi un ka chaahne waala nahin tha main hi tha..

Door hi se chaahne waale mile har mod par,
Faasle saare mitane ko tadapna main hi tha..

Meri aahat sunne waala dil na tha duniya ke paas,
Raaste mein 'Ashk' be-maqsad jo bhatka main hi tha.!!

"Ibrahim Ashk"

Na Ku-e-yaar Mein Thehra Na Anjuman Mein Raha

Na ku-e-yaar mein thehra na anjuman mein raha,
Ada-e-naaz se ye dil sara-e-fan mein raha.. 

Hazaron tufaan uthaye hain waqt aane par,
Lahu bhi khaas ada se mere badan mein raha..

Main ek rang tha rang-e-khyaal-e-aawaara,
Kisi dhanak mein kisi rut ke pairahan mein raha..

Ana hi thi ke na jhukne diya kabhi mujh ko,
Pahaad sar pe utha kar bhi baankpan mein raha..

Wo main hi tha ke koi aur tha nahin maloom,
Tamaam umr jo mere hi jaan o tan mein raha..

Safeer-e-jaan ke liye manzilein nahin hotin,
Koi padao bhi aaya to wo thakan mein raha..

Uthi jo saif-e-sitam be-niyaz-e-maut-o-hayat,
Qalam-ba-dast khada waadi-e-sukhan mein raha.!!

"Ibrahim Ashk"

Mujhe Na Dekho Mere Jism Ka Dhuaan Dekho

Mujhe na dekho mere jism ka dhuaan dekho,
Jala hai kaise ye aabaad sa makaan dekho...

Na chaat jaaye kadi dhoop surkhiyan lab ki,
Shajar ki chhaanw kisi ghar ka sayebaan dekho...

Mohabbaton ki tasalli bahut zaroori hai,
Sitam ke shahar mein ek yaar mehrbaan dekho...

Koi bharosa nahin abr ke barasne ka,
Badhegi pyaas ki shiddat na aasmaan dekho...

Tumhaara waqt nahin sach ke bolne waalo,
Na chup rahoge to kat jaayegi zabaan dekho...

Koi haseen abhi raaste se guzra hai,
Lagao aankh se qadmon ke jo nishaan dekho...

Hunar to roz hi bikta hai chand sikkon mein,
Khareed le na zamana tumhein amaa'n dekho...

Nahin hai tum mein saleeqa jo ghar banane ka,
To 'Ashk' jaao parindon ke aashiyan dekho.!!

"Ibrahim Ashk"

Mohabbaton Mein Jo Mit Mit Ke Shahkaar Hua

Mohabbaton mein jo mit mit ke shahkaar hua,
Wo shakhs kitna zamane mein yaadgaar hua..

Teri hi aas mein guzre hain dhoop chhaanw se hum,
Teri hi pyaas mein sahra bhi khush-gawaar hua..

Na jaane kitni bahaaron ki de gaya khushbu,
Wo ek badan jo humare gale ka haar hua.. 

Tumhaare baad to har ek qadam hai ban-baas,
Humara shahar ke logon mein kab shumaar hua..

Khud apne aap se lena tha intiqaam mujhe,
Main apne haath ke patthar se sangsaar hua..

Ye ek jaan bhi leta hai 'Ashk' qiston mein,
Zara sa kaam bhi us se na ek baar hua.!!

"Ibrahim Ashk"

Main Kab Raheen-e-reg-e-bayabaan-e-yaas Tha

Main kab raheen-e-reg-e-bayabaan-e-yaas tha,
Sad-khema-e-bahaar mere aas paas tha..

Toda hai baar-ha mujhe dil ki shikast ne,
Chehra magar zara bhi na mera udaas tha..

Sahra-e-jaan ki dhoop mein thin wahshatein bahut,
Lekin na mera azm kahin bad-hawaas tha..

Ye aur baat hai ke barahna thi zindagi,
Maujood phir bhi mere badan par libaas tha..

Main ne har ek lamhe ko chaaha hai toot kar,
Tha zindagi-parast mohabbat-shanaas tha..

Mausam kuchh aaye aise bhi shahar-e-khyaal mein,
Mujh ko na jin ka ilm na koi qayaas tha..

Fikr-e-sukhan hi 'Ashk' hai zauq-e-amal mera,
Is ke siwa na kaar-e-jahaan koi raas tha.!!

"Ibrahim Ashk"
__________

Raheen-e-reg-e-bayabaan-e-yaas = Pledged to the sand of wilderness of sorrow,

Labon Par Pyaas Ho To Aas Ke Baadal Bhare Rakhiyo

Labo'n par pyaas ho to aas ke baadal bhare rakhiyo,
Saraabo'n ke safar mein is tarah gulshan hare rakhiyo..

Ye bazaar-e-jahaan hai be-gharaz koi nahin milta,
Parakh kar jab talak dekho nahin sab ko pare rakhiyo..

Wafa ke bol par be-mol bik jaati hai ye duniya,
Agar ho be-sar-o-saamaa'n to ye sikke khare rakhiyo..

Kisi ke saamne daaman pasaare se milega kya,
Agar insaan ho khuddariyon se ghar bhare rakhiyo..

Sharaabo'n se bhare pyaale mujhe takne ki aadat hai,
Badan bheega raseele honth naina mad-bhare rakhiyo..

Na jaane kab kisi ke khwaab se ye dil dhadak jaaye,
Agar sone lago to haath seene par dhare rakhiyo.!!

"Ibrahim Ashk"

Gulshan Mein Le Ke Chal Kisi Sahra Mein Le Ke Chal

Gulshan mein le ke chal kisi sahra mein le ke chal,
Ai dil magar sukoon ki duniya mein le ke chal..

Koi to hoga jis ko mera intizaar hai,
Kahta hai dil ke shahar-e-tamanna mein le ke chal..

Ye pyaas bujh na paai to main doob jaaunga,
Saahil se door tu mujhe dariya mein le ke chal..

Pahchanta nahin hai mera naam 'Qais' bhi,
Ai khizr-e-raah koocha-e-laila mein le ke chal.!!

"Ibrahim Ashk"

Ghazal Ho Gayi Jab Bhi Socha Tumhein

Ghazal ho gayi jab bhi socha tumhein,
Fasane bane jab bhi likkha tumhein..

Kabhi dhoop ho tum kabhi chaandni,
Samajh kar bhi koi na samjha tumhein..

Gharaz koi suraj se hum ko nahin,
Sahar ho gayi jab bhi dekha tumhein..

Mujhe apne dil par bada naaz hai,
Bade naaz se jis ne rakkha tumhein..

Kabhi meri aankhon mein jhaanko zara, 
Yahaan koi tum sa milega tumhein..

Ye thi 'Ashk' saahab ki deewangi,
The tum ru-ba-ru phir bhi dhundha tumhein.!!

"Ibrahim Ashk"

Duniya Luti To Door Se Takta Hi Rah Gaya

Duniya luti to door se takta hi rah gaya,
Aankhon mein ghar ke khwab ka naqsha hi rah gaya..

Us ke badan ka loch tha dariya ki mauj mein,
Saahil se main bahao ko takta hi rah gaya..

Duniya bahut qareeb se uth kar chali gayi,
Baitha main apne ghar mein akela hi rah gaya..

Wo apna aks bhool ke jaane laga to main, 
Aawaz de ke us ko bulata hi rah gaya..

Humrah us ke saari bahaarein chali gayin,
Meri zabaqn pe phoil ka charcha hi rah gaya..

Kuchh is ada se aa ke mila hum se 'Ashk' wo,
Aankhon mein jazb ho ke sarapa hi rah gaya.!!

"Ibrahim Ashk"

Dekha To Koi Aur Tha Socha To Koi Aur

Dekha to koi aur tha socha to koi aur,
Jab aa ke mila aur tha chaha to koi aur..

Us shakhs ke chehre mein kayi rang chhupe the,
Chup tha to koi aur tha bola to koi aur..

Do chaar qadam par hi badalte hue dekha,
Thehra to koi aur tha guzra to koi aur..

Tum jaan ke bhi us ko na pahchaan sakoge,
Anjaane mein wo aur hai jaana to koi aur..

Uljhan mein hun kho dun ke use pa lun karun kya,
Khone pe wo kuchh aur hai paaya to koi aur..

Dushman bhi hai humraaz bhi anjaan bhi hai wo,
Kya 'Ashk' ne samjha use wo tha to koi aur.!!

"Ibrahim Ashk"

Ana Ne Toot Ke Kuchh Faisla Kiya Hi Nahin

Ana ne toot ke kuchh faisla kiya hi nahin, 
Bayaan apna kabhi muddaa kiya hi nahin.. 

Har ek shakhs ko insaan hi rakha hum ne,
Ke aadmi ko nazar mein khuda kiya hi nahin..

Bas ek baar hi toda jahaan ne ahd-e-wafa, 
Kisi se hum ne phir ahd-e-wafa kiya hi nahin..

Kayi dishaaon se guzra hai karwaan-e-hayat,
Thehar ke dil ko kahin mubtala kiya hi nahin..

Pahaad zulm-o-sitam ke hansi mein kaat diye,
Ada-e-naaz ke koi gila kiya hi nahin..

Chhua jise bhi wahi lafz ban gaya tareekh,
Ke be-asar koi jumla ada kiya hi nahin..

Tamaam umr sanwara ghazal ki duniya ko,
Ke 'Ashk' hum ne kuchh is ke siwa kiya hi nahin.!!

"Ibrahim Ashk"