Mere Chehre Se Ghum Aashkara Nahin

Mere chehre se ghum aashkara nahin,
Ye na samjho ki mein ghum ka maara nahin..

Chashm-e-saaqi pe bhi haq humara nahin,
Ab ba-juz tark-e-may koi chaara nahin..

Bahr-e-ghum mein kisi ka sahaara nahin,
Ye koi aasman ka sitara nahin..

Doobne ko to doobe magar naaz hai,
Ahl-e-saahil ko hum ne pukara nahin..

Ghuncha-o-gul ko chaunka gayi hai khizaa'n,
Fasl-e-gul ne chaman ko sanwara nahin.. 

Ghair ke saath kis tarah dekhun tujhe,
Apni qurbat bhi mujh ko gawara nahin..

Yun dikhata hai aankhein humein baghbaan,
Jaise gulshan pe kuchh haq humara nahin..

Zikr-e-saaqi hi kaafi nahin ai 'Fana',
Be-piye may-kade mein guzara nahin.!!

"Fana Nizami Kanpuri"

Wo Khaanuma'n-kharaab Na Kyun Dar-ba-dar Phire

Wo khaanuma'n-kharaab na kyun dar-ba-dar phire,
Jis se teri nigaah mile ya nazar phire..

Raah-e-junoon mein yun to hain laakhon hi sar-phire..
Ya-rab meri tarah na koi umr bhar phire..

Raftaar-e-yaar ka agar andaaz bhool jaaye,
Gulshan mein khaak udaati naseem-e-sahar phire..

Saaqi ko bhi sikhate hain aadab-e-may-kashi,
Milte hain may-kade mein kuchh aise bhi sar-phire..

Tark-e-watan ke baad hi qadr-e-watan hui,
Barson meri nigaah mein deewar-o-dar phire..

Rah jaaye chand roz jo beemar-e-ghum ke paas,
Khud apna dil dabaye hue chaara-gar phire..

Main apna raqs-e-jaam tujhe bhi dikhaunga,
Ai gardish-e-zamana mere din agar phire.. 

Meri nigaah mein to ghazal hai usi ka naam,
Jis ki ragon mein daudta khoon-e-jigar phire..

Qaid-e-ghum-e-hayat bhi kya cheez hai 'Fana',
Raah-e-faraar mil na saki umr-bhar phire.!!

"Fana Nizami Kanpuri"
__________

Khaanuma'n-kharaab = wretched/ anguished/ broken hearted,

Ya Rab Meri Hayat Se Ghum Ka Asar Na Jaaye

Ya rab meri hayat se ghum ka asar na jaaye,
Jab tak kisi ki zulf-e-pareshaan sanwar na jaaye,

Wo aankh kya jo aariz o rukh par thehar na jaaye,
Wo jalwa kya jo deeda o dil mein utar na jaaye,

Mere junoon ko zulf ke saaye se door rakh,
Raste mein chhaanw pa ke musafir thehar na jaaye,

Main aaj gulistaan mein bula lun bahaar ko,
Lekin ye chahta hun khizaa'n rooth kar na jaaye,

Paida hue hain ab to maseeha naye naye,
Beemar apni maut se pahle hi mar na jaaye,

Kar li hai tauba is liye waaiz ke saamne,
Ilzaam-e-tishnagi mere saaqi ke sar na jaaye,

Saaqi pila sharaab magar ye rahe khyaal,
Aalam-e-rozgaar ka chehra utar na jaaye,

Main us ke saamne se guzarta hun is liye,
Tark-e-ta'alluqaat ka ahsaas mar na jaaye,

Masroor-e-deed-e-husn hai is waaste 'Fana',
Duniya ke aib par kabhi meri nazar na jaaye.!!

"Fana Nizami Kanpuri"

Wo Jaane Kitna Sar-e-bazm Sharmsaar Hua

Wo jaane kitna sar-e-bazm sharmsaar hua,
Suna ke apni ghazal main qusoor-waar hua..

Hazaar baar wo guzra hai be-niyazana,
Na jaane kyun mujhe ab ke hi na-gawaar hua..

Hazaron haath meri samt ek saath uthe,
Magar main ek hi patthar mein sangsaar hua..

Main teri yaad mein gum tha ki kha gaya thokar,
Ye haadsa meri raahon mein baar baar hua.!! 

"Fana Nizami Kanpuri"

Tu Phool Ki Maanind Na Shabnam Ki Tarah Aa

Tu phool ki maanind na shabnam ki tarah aa,
Ab ke kisi be-naam se mausam ki tarah aa,

Har martaba aata hai maah-e-nau ki tarah tu,
Is baar zara meri shab-e-ghum ki tarah aa,

Hal karne hain mujh ko kai pecheeda masaail,
Ai jaan-e-wafa gesu-e-pur-kham ki tarah aa,

Zakhmon ko gawara nahin yak-rangi-e-halaat,
Nashtar ki tarah aa kabhi marham ki tarah aa,

Nazdeeki o doori ki kashakash ko mita de,
Is jang mein tu sulah ke parcham ki tarah aa,

Maana ke mera ghar teri jannat to nahin hai,
Duniya mein meri laghzish-e-aadam ki tarah aa,

Tu kuchh to mere zabt-e-mohabbat ka sila de,
Hangaam-e-fana deeda-e-pur-nam ki tarah aa.!!

"Fana Nizami Kanpuri"
__________

Kashakash = Contention, Dilemma, Grief And Pain , Struggle,
Hangaam-e-fana = time of destruction,

Tu Phool Ki Maanind Na Shabnam Ki Tarah Aa

Tu phool ki maanind na shabnam ki tarah aa,
Ab ke kisi be-naam se mausam ki tarah aa,

Har martaba aata hai maah-e-nau ki tarah tu,
Is baar zara meri shab-e-ghum ki tarah aa,

Hal karne hain mujh ko kai pecheeda masaail,
Ai jaan-e-wafa gesu-e-pur-kham ki tarah aa,

Zakhmon ko gawara nahin yak-rangi-e-halaat,
Nashtar ki tarah aa kabhi marham ki tarah aa,

Nazdeeki o doori ki kashakash ko mita de,
Is jang mein tu sulah ke parcham ki tarah aa,

Maana ke mera ghar teri jannat to nahin hai,
Duniya mein meri laghzish-e-aadam ki tarah aa,

Tu kuchh to mere zabt-e-mohabbat ka sila de,
Hangam-e-fana deeda-e-pur-nam ki tarah aa.!!

"Fana Nizami Kanpuri"

Duniya-e-tasawwur Hum Aabaad Nahin Karte

Duniya-e-tasawwur hum aabaad nahin karte,
Yaad aate ho tum khud hi hum yaad nahin karte..

Wo jaur-e-musalsal se baaz aa to gaye lekin,
Be-daad ye kya kam hai be-daad nahin karte..

Saahil ke tamashaai har doobne waale par,
Afsos to karte hain imdaad nahin karte..

Kuchh dard ki shiddat hai kuchh paas-e-mohabbat hai,
Hum aah to karte hain fariyaad nahin karte..

Sahra se bahaaron ko le aaye chaman waale,
Aur apne gulistaan ko aabaad nahin karte.!!

"Fana Nizami Kanpuri"
__________

Jaur-e-musalsal = continuous tyranny,
Be-daad = unjust, without praise,

Doobne Waale Ki Mayyat Par Laakhon Rone Waale Hain

Doobne waale ki mayyat par laakhon rone waale hain,
Phoot phoot kar jo rote hain wahi dubone waale hain..

Kis kis ko tum bhool gaye ho ghaur se dekho baada-kasho,
Sheesh-mahal ke rahne waale patthar dhhone waale hain..

Sone ka ye waqt nahin hai jaag bhi jao be-khabro,
Warna hum to tum se zyaada chain se sone waale hain..

Aaj suna kar apna fasana hum ye karenge andaza,
Kitne dost hain hansne waale kitne rone waale hain..

Main bhi unhein pahchaan raha hun ghaur se dekho baada-kasho,
Shayad shaikh-e-haram baithe hain wo jo kone waale hain.!!

"Fana Nizami Kanpuri"

Dil Se Agar Kabhi Tera Armaan Jayega

Dil se agar kabhi tera armaan jayega,
Ghar ko laga ke aag ye mehmaan jayega..

Sab honge us se apne taaruf ki fikr mein,
Mujh ko mere sukoot se pahchaan jayega..

Is kufr-e-ishq se mujhe kyun rokte ho tum,
Imaan waalo mera hi imaan jayega..

Aaj us se main ne shikwa kiya tha shararatan,
Kis ko khabar thi itna bura maan jayega..

Ab is maqaam par hain meri be-qarariyaan,
Samjhane waala ho ke pashemaan jayega..

Duniya pe aisa waqt padega ke ek din,
Insaan ki talaash mein insaan jayega.!! 

"Fana Nizami Kanpuri"

Ai Husn Zamane Ke Tewar Bhi To Samjha Kar

Ai husn zamane ke tewar bhi to samjha kar,
Ab zulm se baaz aa ja ab jaur se tauba kar..

Toote hue paimane bekaar sahi lekin,
May-khane se ai saaqi baahar to na phenka kar..

Jalwa ho to jalwa ho parda ho to parda ho,
Tauhin-e-tajalli hai chilman se na jhaanka kar..

Arbaab-e-junoon mein hain kuchh ahl-e-khirad shaamil,
Har ek musafir se manzil ko na poochha kar.!!

"Fana Nizami Kanpuri"
__________

Tauhin-e-tajalli = humiliation of effulgence,
Arbaab-e-junoon = people of frenzy,
Ahl-e-khirad = wise people,