Tum Ne Jo Phool Mujhe Rukhsat Hote Waqt Diya Tha

* Nazm *
__________

Tum ne jo phool mujhe rukhsat hote waqt diya tha,

Wo nazm main ne tumhaari yaadon ke saath lifafe mein band kar ke rakh di thi,

Aaj dino'n baad bahut akele main use khol kar dekha hai,

Phool ki nau pankhudiyan hain,

Nazm ke nau misre,

Yaadein bhi kaisi ajeeb hoti hain,

Pahli pankhudi yaad dilati hai us lamhe ki jab main ne,

Pahli baar tumhein bhari mahfil mein apni taraf musalsal takte hue dekh liya tha,

Dusri pankhudi jab hum pahli bar ek dusre ko kuchh kahe baghair,

Bas yunhi jaan bujh kar nazar bachate hue ek rahdaari se guzar gaye the.!!

"Iftikhaar Arif"

Abhi Kuchh Din Lagenge

* Nazm *
__________

Abhi kuchh din lagenge...

Dil aise shahar ke paamaal ho jaane ka manzar bhoolne mein,

Abhi kuchh din lagenge...

Jahaan-e-rang ke saare khas-o-khashaak sab sarw-o-sanobar bhoolne mein,

Abhi kuchh din lagenge...

Thake haare hue khwabon ke saahil par kahin ummid ka chhota sa ek ghar,

Bante bante rah gaya hai..

Wo ek ghar bhoolne mein,
Abhi kuchh din lagenge...

Magar ab din bhi kitne rah gaye hain,

Bas ek din dil ki lauh-e-muntazir par,
Aachanak,
Raat utregi,

Meri be-noor aankhon ke khazane mein,  Chhupe har khwab ki takmeel kar degi,

Mujhe bhi khwab mein tabdeel kar degi,

Ek aisa khwab jis ka dekhna mumkin nahin tha,

Ek aisa khwab jis ke daaman-e-sad-chaak mein koi mubarak koi raushan din nahin tha,

Abhi kuchh din lagenge.!!

"Iftikhaar Arif"

Ye Bastiyan Hain Ke Maqtal Dua Kiye Jaayen

Ye bastiyan hain ke maqtal dua kiye jaayen,
Dua ke din hain musalsal dua kiye jaayen..

Koi fughaa'n koi naala koi buka koi bain,
Khulega baab-e-muqaffal dua kiye jaayen.. 

Ye iztiraab ye lamba safar ye tanhaai,
Ye raat aur ye jangal dua kiye jaayen..

Bahaal ho ke rahegi faza-e-khitta-e-khair,
Ye habs hoga moattal dua kiye jaayen..

Guzishtagaan-e-mohabbat ke khwab ki saugand,
Wo khwab hoga mukammal dua kiye jaayen..

Hawa e sarkash o saffaak ke muqaabil bhi,
Ye dil bujhenge na mish'al dua kiye jaayen..

Ghubaar udaati jhulasti hui zameenon par,
Umand ke aayenge baadal dua kiye jaayen..

Qubool hona muqaddar hai harf-e-khaalis ka,
Har ek aan har ek pal dua kiye jaayen.!!

"Iftikhaar Arif"
___________

Baab-e-muqaffal = locked door,
Faza-e-khitta-e-khair = weather, atmosphere of region of wellbeing,
Habs = suffocation,
Moattal = suspended, fired,
Guzishtagaan-e-mohabbat = predecessors of love,
Sarkash = refractory, rebellious,
Saffaak = cruel, tyrant,
Harf-e-khaalis = pure word,

Zara Si Der Ko Aaye The Khwab Aankhon Mein

Zara si der ko aaye the khwab aankhon mein,
Phir us ke baad musalsal azaab aankhon mein..

Wo jis ke naam ki nisbat se raushni tha wajood,
Khatak raha hai wahi aaftaab aankhon mein..

Jinhein mata-e-dil-o-jaan samajh rahe the hum,
Wo aaine bhi hue be-hijaab aankhon mein..

Ajab tarah ka hai mausam ke khaak udti hai,
Wo din bhi the ke khile the gulaab aankhon mein..

Mere ghazal teri wahshaton ki khair ke  hai,
Bahut dino'n se bahut iztiraab aankhon mein..

Na jaane kaisi qayamat ka pesh-khema hai,
Ye uljhanein teri be-intisaab aankhon mein..

Jawaaz kya hai mere kam-sukhan bata to sahi,
Ba-naam-e-khush-nigehi har jawaab aankhon mein.!!

"Iftikhaar Arif"
__________

Pesh-khema = a tent or other baggage sent in advance, a prelude,
Be-intisaab = without dedication,
Jawaaz = lawfulness, permit, permission,
Ba-naam-e-khush-nigehi = in the name of good colors,

Sukhan-e-haq Ko Fazeelat Nahin Milne Waali

Sukhan-e-haq ko fazeelat nahin milne waali,
Sabr par daad-e-shuja'at nahin milne waali..

Waqt-e-maloom ki dahshat se larazta hua dil,
Dooba jaata hai ke mohlat nahin milne waali..

Zindagi nazr guzaari to mili chaadar-e-khaak,
Is se kam par to ye naimat nahin milne waali..

Raas aane lagi duniya to kaha dil ne ke ja,
Ab tujhe dard ki daulat nahin milne waali.. 

Hawas-e-luqma-e-tar kha gayi lahje ka jalaal,
Ab kisi harf ko hurmat nahin milne waali.. 

Ghar se nikle hue beto'n ka muqaddar maloom,
Ma ke qadmo'n mein bhi jannat nahin milne waali..

Zindagi bhar ki kamaai yahi misre do-chaar,
Is kamaai pe to izzat nahin milne waali.!!

"Iftikhaar Arif"
__________

Sukhan-e-haq = true words,
Fazeelat = excellence, proficiency,
Daad-e-shuja'at = praise for bravery,

Mere Khuda Mujhe Itna To Mo'atabar Kar De

Mere khuda mujhe itna to mo'atabar kar de,
Main jis makaan mein rahta hun us ko ghar kar de..

Ye raushni ke ta'aqub mein bhagta hua din,
Jo thak gaya hai to ab is ko mukhtasar kar de..

Main zindagi ki dua maangne laga hun bahut,
Jo ho sake to duaon ko be-asar kar de..

Sitara-e-sahri doobne ko aaya hai,
Zara koi mere suraj ko ba-khabar kar de..

Qabeela-waar kamaanein kadakne waali hain,
Mere lahu ki gawahi mujhe nidarr kar de..

Main apne khwab se kat kar jiyun to mera khuda,

Ujaad de meri mitti ko dar-ba-dar kar de..

Meri zameen mera aakhiri hawala hai,
So main rahun na rahun is ko baarwar kar de.!!

"Iftikhaar Arif"
__________

Baarwar = fruitful, producing or having fruit,

Koi To Phool Khilaye Dua Ke Lahje Mein

Koi to phool khilaye dua ke lahje mein,
Ajab tarah ki ghutan hai hawa ke lahje mein..

Ye waqt kis ki rauunat pe khsak daal gaya,
Ye kaun bol raha tha khuda ke lahje mein..

Na jaane khalq-e-khuda kaun se azaab mein hai,
Hawaaen cheekh padi'n iltija ke lahje mein..

Khula fareb-e-mohabbat dikhaai deta hai, 
Ajab kamaal hai us bewafa ke lahje mein..

Yahi hai maslahat-e-jabr-e-ahtiyaat to phir,
Hum apna haal kahenge chhupa ke lahje mein.!!

"Iftikhaar Arif"
__________

Rauunat = pride, awe,
Maslahat-e-jabr-e-ahtiyaat = wisdom of tyranny of caution,

Junoon Ka Rang Bhi Ho Shola-e-numu Ka Bhi Ho

Junoon ka rang bhi ho shola-e-numu ka bhi ho,
Sukoot-e-shab mein ek andaaz guftugu ka bhi ho..

Main jis ko apni gawahi mein le ke aaya hun,
Ajab nahin ke wahi aadmi adu ka bhi ho.. 

Wo jis ke chaak-e-garebaan pe tohmatein hain bahut,
Usi ke haath mein shayad hunar rafu ka bhi ho..

Wo jis ke doobte hi naaw dagmagane lagi,
Kise khabar wahi taara sitara-ju ka bhi ho.. 

Suboot-e-mohkami-e-jaan thi jis ki burrish-naaz,
Usi ki tegh se rishta rag-e-gulu ka bhi ho.. 

Wafa ke baab mein kaar-e-sukhan tamaam hua,
Meri zameen pe ek ma'arka lahu ka bhi ho.!!

"Iftikhaar Arif"
__________

Shola-e-numu = flame of growth, increase (vegetation),
Suboot-e-mohkami-e-jaan = proof of physical firmness/stability,
Burrish-naaz = sharpness, 
Ma'arka = place or scene of battle or fight; field of battle; battle-ground,  fight, strife,

Khwaab Ki Tarah Bikhar Jaane Ko Ji Chahta Hai

Khwaab ki tarah bikhar jaane ko ji chahta hai,
Aisi tanhaai ke mar jaane ko ji chahta hai..

Ghar ki wahshat se larazta hun magar jaane kyun,
Shaam hoti hai to ghar jaane ko ji chahta hai..

Doob jaaun to koi mauj nishaan tak na bataye,
Aisi naddi mein utar jaane ko ji chahta hai..

Kabhi mil jaaye to raste ki thakan jaag pade,
Aisi manzil se guzar jaane ko ji chahta hai..

Wahi paimaan jo kabhi ji ko khush aaya tha bahut,
Usi paimaan se mukar jaane ko ji chahta hai.!!

"Iftikhaar Arif"

Haami Bhi Na The Munkir-e-ghaalib bhi Nahin The

Haami bhi na the munkir-e-'ghaalib' bhi nahin the,
Hum ahl-e-tazabzub kisi jaanib bhi nahin the..

Is baar bhi duniya ne hadaf hum ko banaya,
Is baar to hum shaah ke musahib bhi nahin the..

Bech aaye sar-e-qarya-e-zar jauhar-e-pindaar,
Jo daam mile aise munasib bhi nahin the..

Mitti ki mohabbat mein hum aashufta-saro'n ne,
Wo qarz utaare hain ke waajib bhi nahin the..

Lau deti hui raat sukhan karta hua din,
Sab us ke liye jis se mukhaatib bhi nahin the.!!

"Iftikhaar Arif"

Basti Bhi Samandar Bhi Bayabaan Bhi Mera Hai

Basti bhi samandar bhi bayabaan bhi mera hai,
Aankhein bhi meri khwab-e-pareshaan bhi mera hai..

Jo doobti jaati hai wo kashti bhi hai meri,
Jo toot ta jaata hai wo paimaan bhi mera hai..

Jo haath uthe the wo sabhi haath the mere,
Jo chaak hua hai wo girebaan bhi mera hai..

Jis ki koi aawaz na pahchaan na manzil,
Wo qaafila-e-be-sar-o-samaan bhi mera hai..

Veerana-e-maqtal pe hijaab aaya to is baar,
Khud cheekh pada main ke ye unwaan bhi mera hai..

Waraftagi-e-subah-e-bashaarat ko khabar kya,
Andesha-e-sad-shaam-e-gharibaan bhi mera hai..

Main waaris-e-gul hun ke nahin hun magar ai jaan,
Khamyaza-e-tauheen-e-bahaaran bhi mera hai..

Mitti ki gawahi se badi dil ki gawahi,
Yoon ho to ye zanjeer ye zindaan bhi mera hai.!!

"Iftikhaar Arif"

Ab Bhi Tauheen-e-ita'at Nahin Hogi Hum Se

Ab bhi tauheen-e-ita'at nahin hogi hum se,
Dil nahin hoga to ba'iat nahin hogi hum se..

Roz ek taaza qaseeda nai tashbeeb ke saath,
Rizq bar-haq hai ye khidmat nahin hogi hum se..

Dil ke ma'abood jabeeno'n ke khudaai se alag,
Aise aalam mein ibaadat nahin hogi hum se..

Ujrat-e-ishq wafa hai to hum aise mazdoor,
Kuchh bhi kar lenge ye mehnat nahin hogi hum se..

Har nayi nasl ko ek taaza madine ki talaash,
Saahibo ab koi hijrat nahin hogi hum se.. 

Sukhan-aaraai ki surat to nikal sakti hai,
Par ye chakki ki mashaqqat nahin hogi hum se.!!

"Iftikhaar Arif"
__________

Tauheen-e-ita'at = insult of obedience,
Ba'iat = fealty, homage,
Qaseeda = a poem in praise of someone ballad,
Tashbeeb = literary term,
introduction of an ode,

Azaab-e-wahshat-e-jaan Ka Sila Na Maange Koi

Azaab-e-wahshat-e-jaan ka sila na maange koi,
Naye safar ke liye raasta na maange koi..

Buland haathon mein zanjeer daal dete hain,
Ajeeb rasm chali hai dua na maange koi.. 

Tamaam shahar mukarram bas ek mujrim main,
So mere baad mera khoon-baha na maange koi..

Koi to shahar-e-tazabzub ke saakino'n se kahe,
Na ho yaqeen to phir mo'ajaza na maange koi..

Azaab-e-gard-e-khizaa'n bhi na ho bahaar bhi aaye,
Is ahtiyaat se ajr-e-wafa na maange koi.!!

"Iftikhaar Arif"
__________

Mukarram = venerable, noble, respected, revered,
Khoon-baha = compensation for killing/ murder,
Shahar-e-tazabzub = city of tumult, dilemma,
Saakino'n = residents,
Azaab-e-gard-e-khizaa'n = travails of fall season's dustiness,
Ajr-e-wafa = reward for constancy,

Azaab Ye Bhi Kisi Aur Par Nahin Aaya

Azaab ye bhi kisi aur par nahin aaya,
Ke ek umr chale aur ghar nahin aaya..

Us ek khwab ki hasrat mein jal bujhin aankhein,
Wo ek khwab ke ab tak nazar nahin aaya..

Karein to kis se karein na-rasaaiyon ka gila,
Safar tamaam hua hum-safar nahin aaya.. 

Dilo'n ki baat badan ki zabaan se kah dete,
Ye chahte the magar dil idhar nahin aaya.. 

Ajeeb hi tha mere daur-e-gumraahi ka rafeeq,
Bichhad gaya to kabhi laut kar nahin aaya..

Hareem-e-lafz-o-maani se nisbatein bhi rahin,
Magar saleeqa-e-arz-e-hunar nahin aaya.!!

"Iftikhaar Arif"
__________

Hareem-e-lafz-o-maani = region of word & meaning,