Chandni Raat Hai Jawaani Par

* Nazm *
__________

Chandni raat hai jawaani par..

Dast-e-gardoon mein saaghar-e-mahtab, 
Noor ban ban ke chhan rahi hai sharaab..

Saaqi-e-aasmaan pyaala-ba-dast,
Main sharaab-e-suroor se sarmast..

Fikr-e-dozakh na zikr-e-jannat hai,
Main hun aur teri pyaari surat hai..

Ras bhare honth mad bhari aankhein.!

Kaun farda pe aitibaar kare,
Kaun jannat ka intizaar kare..

Jaane kab maut ka payaam aaye,
Ye masarrat bhi hum se chhin jaaye..

Daaman-e-aql chaak hone de,
Aaj ye qissa paak hone de..

Ghum ko na-payedaar kar dein hum,
Maut ko sharmsaar kar dein hum..

Lab se lab yoon milein ke kho jaayen,
Jazb ek doosre mein ho jaayen..

Main rahoon aur na tu rahe baaqi.!

Kis qadar dil-nasheen hain lab tere,
Baada-e-ahmareen hain lab tere..

Tere honthon ka ras nahin hai ye,
Aab-e-kausar hai angbeen hai ye..

Shahad ke ghoont pi raha hun main,
Aaj ki raat ji raha hun main..

Aaj ki raat phir na aayegi.!!

"Hafeez Hoshiyarpuri"
__________

Dast-e-gardoon = hand, power; purge of heavens,
Na-payedaar = unstable, frail, transitory, not durable,
Baada-e-ahmareen = red wine,
Aab-e-kausar = river kausar flowing in Paradise,
Angbeen = honey,

Tamaam Umr Tera Intizaar Hum Ne Kiya

Tamaam umr tera intizaar hum ne kiya,
Is intizaar mein kis kis se pyaar hum ne kiya..

Talaash-e-dost ko ek umr chahiye ai dost,
Ke ek umr tera intizaar hum ne kiya..

Tere khyaal mein dil shadmaan raha barson,
Tere huzoor use sogwaar hum ne kiya..

Ye tishnagi hai ke un se qareeb rah kar bhi,
'Hafeez' yaad unhein baar baar hum ne kiya.!!

"Hafeez Hoshiyarpuri"

Raushni Si Kabhi Kabhi Dil Mein

Raushni si kabhi kabhi dil mein,
Manzil-e-be-nishaan se aati hai..

Laut kar noor ki kiran jaise,
Safar-e-la-makaan se aati hai..

Nau-e-insaa'n hai gosh-bar-aawaaz,
Kya khabar kis jahaan se aati hai..

Apni fariyaad baazgasht na ho,
Ek sada aasmaan se aati hai..

Takhta-e-daar hai ke takhta-e-gul,
Bu-e-khoon gulistaan se aati hai..

Dil se aati hai baat lab pe 'Hafeez',
Baat dil mein kahaan se aati hai.!!

"Hafeez Hoshiyarpuri"
__________

Gosh-bar-aawaaz = ear on sound,
Baazgasht = echo,

Raaz-e-sar-basta Mohabbat Ke Zabaan Tak Pahunche

Raaz-e-sar-basta mohabbat ke zabaan tak pahunche,
Baat badh kar ye khuda jaane kahaan tak pahunche..

Kya tasarruf hai tere husn ka Allah Allah,
Jalwe aankhon se utar kar dil-o-jaan tak pahunche..

Teri manzil pe pahunchna koi aasaan na tha,
Sarhad-e-aql se guzre to yahaan tak pahunche..

Hairat-e-ishq meri husn ka aaina hai, 
Dekhne waale kahaan se hain kahaan tak pahunche..

Khul gaya aaj nigaahein hain nigaahein apni,
Jalwe hi jalwe nazar aae jahaan tak pahunche..

Wahi is gosha-e-daamaa'n ki haqeeqat jaane,
Jo mere deeda-e-khoon-naba-fishaa'n tak pahunche..

Ibtida mein jinhein hum nang-e-wafa samjhe the,
Hote hote wo gile husn-e-bayaa'n tak pahunche..

Aah wo harf-e-tamanna ke na lab tak aaye,
Haye wo baat ke ek ek ki zabaan tak pahunche..

Kis ka dil hai ke sune qissa-e-furqat mera,
Kaun hai jo mere andoh-e-nihaa'n tak pahunche..

Khalish-angez tha kya kya teri mizhgaa'n ka khyaal,
Toot kar dil mein ye nashtar rag-e-jaan tak pahunche..

Na pata sang-e-nishaan ka na khabar rahbar ki,
Justuju mein tere deewane yahaan tak pahunche..

Na ghubaar-e-raah-e-manzil hai na aawaz-e-jaras,
Kaun mujh rahraw-e-gum-karda-e-nishaa'n tak pahunche..

Saaf tauheen hai ye dard-e-mohabbat ki 'Hafeez',
Husn ka raaz ho aur meri zabaan tak pahunche.!!

"Hafeez Hoshiyarpuri"
__________

Raaz-e-sar-basta = hidden secret,
Tasarruf = possession, use, occupancy, extravagance,
Gosha-e-daamaa'n = piece of the hem,
Deeda-e-khoon-naba-fishaa'n = blood spraying eyes,
Husn-e-bayaa'n = beauty of desription,
Andoh-e-nihaa'n = hidden grief,
Mizhgaa'n = eyelashes,
Ghubaar-e-raah-e-manzil = dust on the way to destination,
Aawaz-e-jaras = sound of caravan's bells,
Rahraw-e-gum-karda-e-nishaan = marks of missing fellow travellers,

Phir Se Aaraaish-e-hasti Ke Jo Samaa'n Honge

Phir se aaraaish-e-hasti ke jo saamaa'n honge,
Tere jalwon hi se aabaad shabistaan honge..

Ishq ki manzil-e-awwal pe theharne waalo,
Is se aage bhi kayi dasht-o-bayabaan honge..

Tu jahaan jaayegi ghaarat-gar-e-hasti ban kar,
Hum bhi ab saath tere gardish-e-dauraa'n honge..

Kis qadar sakht hai ye tark-o-talab ki manzil,
Ab kabhi un se mile bhi to pashemaan honge..

Tere jalwon se jo mahroom rahe hain ab tak,
Wahi aakhir tere jalwon ke nigahbaan honge..

Ab to majboor hain par hashr ka din aane de,
Tujh se insaaf-talab ru-e-gurezaa'n honge.. 

Jab kabhi hum ne kiya ishq pashemaan hue,
Zindagi hai to abhi aur pashemaan honge..

Koi bhi ghum ho ghum-e-dil ke ghum-e-dahr 'Hafeez',
Hum ba-har-haal ba-har-rang ghazal-khwaa'n honge.!!

"Hafeez Hoshiyarpuri"
__________

Aaraaish-e-hasti = adornment of existence,
Ghaarat-gar-e-hasti = destroyer of life,
Tark-o-talab = renouncing and demanding,
Ru-e-gurezaa'n = evasive face,
Ghazal-khwaa'n = one who reads or recites Gazals,

Na Poochh Kyun Meri Aankhon Mein Aa Gaye Aansu

Na poochh kyun meri aankhon mein aa gaye aansu,
Jo tere dil mein hai is baat par nahin aaye..

Wafa-e-ahd hai ye pa-shikastagi to nahin,
Thehar gaya ke mere hum-safar nahin aaye..

Na chhed un ko khuda ke liye ke ahl-e-wafa,
Bhatak gaye hain to phir raah par nahin aaye..

Abhi abhi wo gaye hain magar ye aalam hai,
Bahut dinon se wo jaise nazar nahin aaye..

Kahin ye tark-e-mohabbat ki ibtida to nahin,
Wo mujh ko yaad kabhi is qadar nahin aaye..

Ajeeb manzil-e-dilkash adam ki manzil hai,
Musafiraan-e-adam laut kar nahin aaye..

'Hafeez' kab unhein dekha nahin ba-rang-e-digar,
'Hafeez' kab wo ba-rang-e-digar nahin aaye.!!

"Hafeez Hoshiyarpuri"

Mohabbat Karne Waale Kam Na Honge

Mohabbat karne waale kam na honge,
Teri mahfil mein lekin hum na honge..

Main aksar sochta hun phool kab tak,
Shareek-e-girya-e-shabnam na honge..

Zara der-aashna chashm-e-karam hai,
Sitam hi ishq mein paiham na honge..

Dilon ki uljhanein badhti rahengi,
Agar kuchh mashware baaham na honge.. 

Zamane bhar ke ghum ya ek tera ghum,
Ye ghum hoga to kitne ghum na honge..

Kahun bedard kyun ahl-e-jahaan ko,
Wo mere haal se mahram na honge..

Humare dil mein sail-e-girya hoga,
Agar ba-deeda-e-pur-nam na honge..

Agar tu ittifaaqan mil bhi jaate,
Teri furqat ke sadme kam na honge..

'Hafeez' un se main jitna bad-gumaan hun,
Wo mujh se us qadar barham na honge.!!

"Hafeez Hoshiyarpuri"

Kuchh Is Tarah Se Nazar Se Guzar Gaya Koi

Kuchh is tarah se nazar se guzar gaya koi,
Ke dil ko ghum ka saza-waar kar gaya koi..

Dil-e-sitam-zada ko jaise kuchh hua hi nahin,
Khud apne husn se yoon be-khabar gaya koi..

Wo ek jalwa-e-sad-rang ek hujoom-e-bahaar,
Na jaane kaun tha jaane kidhar gaya koi..

Nazar ke tishna-e-deedar thi rahi mahroom,
Nazar uthaai to dil mein utar gaya koi..

Nigaah-e-shauq ki mahroomiyon se na-waaqif,
Nigaah-e-shauq pe ilzaam dhar gaya koi..

Ab un ke husn mein husn-e-nazar bhi shaamil hai,
Kuchh aur meri nazar se sanwar gaya koi..

Kisi ke paanw ki aahat ke dil ki dhadkan thi,
Hazaar baar utha su-e-dar gaya koi..

Naseeb-e-ahl-e-wafa ye sukoon-e-dil to na tha,
Zaroor naala-e-dil be-asar gaya koi..

Utha phir aaj mere dil mein rashk ka tufaan,
Phir un ki raah se ba-chashm-e-tar gaya koi..

Ye kah ke yaad karenge 'Hafeez' dost mujhe,
Wafa ki rasm ko paainda kar gaya koi.!!

"Hafeez Hoshiyarpuri"

Kahaan Kahaan Na Tasawwur Ne Daam Phailaye

Kahaan kahaan na tasawwur ne daam phailaye,
Hudood-e-shaam-o-sahar se nikal ke dekh aaye..

Nahin payaam raah-e-naama-o-payaam tu hai,
Abhi saba se kaho un ke dil ko bahlaye..

Ghuroor-e-jaada-shanasi baja sahi lekin,
Suraagh-e-manzil-e-maqsood bhi koi paaye..

Khuda wo din na dikhaye ke rahbar ye kahe,
Chale the jaane kahaan se kahaan nikal aaye..

Guzar gaya koi darmaanda-rah ye kahta,
Ab is faza mein koi qafeele na thehraye..

Na jaane un ke muqaddar mein kyun hai teera-shabi,
Wo hum-nawa jo sahar ko qareeb-tar laaye..

Koi fareb-e-nazar hai ke taabnaak faza,
Kise khabar ke yahaan kitne chaand gahnaye..

Ghum-e-zamana teri zulmatein hi kya kam thin,
Ke badh chale hain ab un gesuon ke bhi saaye..

Bahut buland hai is se mera maqaam-e-ghazal,
Agarche main ne mohabbat ke geet bhi gaaye..

'Hafeez' apna muqaddar 'Hafeez' apna naseeb,
Gire the phool magar hum ne zakhm hi khaaye.!!

"Hafeez Hoshiyarpuri"
__________

Raah-e-naama-o-payaam =  way of letter and messages,
Ghuroor-e-jaada-shanaasi = arrogance of being acquainted,
Suraagh-e-manzil-e-maqsood = Clue to determined; desired destiny,
Teera-shabi = dark night,
Taabnaak = hot, passionate, brilliant,

Bechaargi-e-hasrat-e-deedaar Dekhna

Bechaargi-e-hasrat-e-deedaar dekhna,
Mushkil na dekhna hai to dushwaar dekhna..

Lamhaat-e-intizaar ki raftaar dekhna,
Wo baar baar saaya-e-deewaar dekhna..

Yoon dekhna ke toote na rishta nigaah ka,
Ek baar dekhne mein wo sau baar dekhna..

Ya subah hi se shaam ka pur-kaif intizaar,
Ya shaam hi se subah ke aasaar dekhna.. 

Kya dil-fareb hai tere khwab-e-giraa'n ka husn,
Tujh se nihaa'n tere lab-o-rukhsaar dekhna..

Dard-e-firaaq ki sahar-e-awwalin 'Hafeez',
Uthte hi jaanib-e-dar-o-deewaar dekhna.!!

"Hafeez Hoshiyarpuri"

Aaj Unhein Kuchh Is Tarah Ji Khol Kar Dekha Kiye

Aaj unhein kuchh is tarah ji khol kar dekha kiye,
Ek hi lamhe mein jaise umr bhar dekha kiye..

Dil agar betaab hai dil ka muqaddar hai yahi,
Jis qadar thi hum ko taufeeq-e-nazar dekha kiye..

Khud-faroshana ada thi meri surat dekhna,
Apne hi jalwe ba-andaaz-e-digar dekha kiye..

Na-shanaas-e-ghum faqat daad-e-hunar dete rahe,
Hum mata-e-ghum ko ruswa-e-hunar dekha kiye..

Dekhne ka ab ye aalam hai koi ho ya na ho,
Hum jidhar dekha kiye pahron udhar dekha kiye..

Husn ko dekha hai main ne husn ki khaatir 'Hafeez',
Warna sab apna hi meyaar-e-nazar dekha kiye.!!

"Hafeez Hoshiyarpuri"