* Nazm *
__________
Main bhool jaaun tumhein ...
Ab yahi munasib hai,
Magar bhulaana bhi chahoon,
To kis tarah bhoolun...
Ke tum to phir bhi haqeeqat ho
koi khwaab nahin...
Yahaan to dil ka ye aalam hai,
Kya kahoon kambakht!
Bhula na paaya woh silsila
jo tha hi nahin...
Woh ek khyaal,
Jo awaaz tak gaya hi nahin...
Woh ek baat,
Jo main kah nahin saka tum se...
Woh ek rabt,
Jo hum main kabhi raha hi nahin...
Mujhe hai yaad woh sab,
Jo kabhi hua hi nahin..!!
"Jawed Akhtar"
Zindagi ki aandhi mein zehn ka shajar tanha,
Tum se kuchh sahaara tha aaj hun magar tanha...
Zakhm-khurda lamhon ko maslahat sambhaale hai,
An-ginat mareezon mein ek chaaragar tanha...
Boond jab thi baadal mein zindagi thi halchal mein,
Qaid ab sadaf mein hai ban ke hai gauhar tanha...
Tum fuzool baaton ka dil pe bojh mat lena,
Hum to khair kar lenge zindagi basar tanha...
Ek khilauna jogi se kho gaya tha bachpan mein,
Dhundhta phira us ko wo nagar nagar tanha...
Jhutpute ka aalam hai jaane kaun aadam hai,
Ek lahad pe rota hai munh ko dhhanp kar tanha.!!
"Jawed Akhtar"
Ye duniya tum ko raas aaye to kahna,
Na sar patthar se takraye to kahna..
Ye gul kaaghaz hain ye zewar hain peetal,
Samajh mein jab ye aa jaaye to kahna..
Bahut khush ho ke us ne kuchh kaha hai,
Na kah kar wo mukar jaaye to kahna..
Badal jaoge tum ghum sun ke mere,
Kabhi dil ghum se ghabraye to kahna..
Dhuan jo kuchh gharon se uth raha hai,
Na poore shahar par chhaye to kahna.!!
"Jawed Akhtar"
Yahi haalaat ibtida se rahe,
Log hum se khafa khafa se rahe..
In charaghon mein tel hi kam tha,
Kyun gila hum ko phir hawa se rahe..
Bahs, shatranj, sher, mausiqi,
Tum nahin the to ye dilaase rahe..
Zindagi ki sharaab maangte ho,
Hum ko dekho ki pi ke pyase rahe..
Us ke bandon ko dekh kar kahiye,
Hum ko ummid kya khuda se rahe.!!
"Jawed Akhtar"
Yaad use bhi ek adhoora afsana to hoga..
Kal raaste mein us ne hum ko pahchana to hoga.!
Darr hum ko bhi lagta hai raste ke sannaate se..
Lekin ek safar par ai dil ab jaana to hoga.!
Kuchh baaton ke matlab hain aur kuchh matlab ki baatein..
Jo ye farq samajh lega wo deewana to hoga.!
Dil ki baatein nahin hai to dilchasp hi kuchh baatein hon..
Zinda rahna hai to dil ko bahlana to hoga.!
Jeet ke bhi wo sharminda hai haar ke bhi hum naaza'n..
Kam se kam wo dil hi dil mein ye maana to hoga.!!
"Jawed Akhtar"
Wo zamana guzar gaya kab ka,
Tha jo deewana mar gaya kab ka..
Dhundhta tha jo ek nayi duniya,
Laut ke apne ghar gaya kab ka..
Wo jo laaya tha hum ko dariya tak,
Paar akele utar gaya kab ka..
Us ka jo haal hai wahi jaane,
Apna to zakhm bhar gaya kab ka..
Khwab-dar-khwab tha jo shiraaza,
Ab kahaan hai bikhar gaya kab ka.!!
"Jawed Akhtar"
_______________
Shiraaza = binding (of a book), arrangement
बिखरी हुई चीज़ों की एकत्रता,
Shukr hai khairiyat se hun saahab,
Aap se aur kya kahun saahab...
Ab samajhne laga hun sood-o-ziyaan,
Ab kahaan mujh mein wo junoon saahab...
Zillat-e-zeest ya shikast-e-zameer,
Ye sahun main ke wo sahun saahab...
Hum tumhein yaad karte ro lete,
Do-ghadi milta jo sukoon saahab...
Shaam bhi dhhal rahi hai ghar bhi hai door,
Kitni der aur main rukun saahab...
Ab jhukunga to toot jaaunga,
Kaise ab aur main jhukun saahab...
Kuchh riwayaat ki gawahi par,
Kitna jurmana main bharun saahab.!!
"Jawed Akhtar"
____________________
شکر ہے خیریت سے ہوں صاحب
آپ سے اور کیا کہوں صاحب
اب سمجھنے لگا ہوں سود و زیاں
اب کہاں مجھ میں وہ جنوں صاحب
ذلت زیست یا شکست ضمیر
یہ سہوں میں کہ وہ سہوں صاحب
ہم تمہیں یاد کرتے رو لیتے
دو گھڑی ملتا جو سکوں صاحب
شام بھی ڈھل رہی ہے گھر بھی ہے دور
کتنی دیر اور میں رکوں صاحب
اب جھکوں گا تو ٹوٹ جاؤں گا
کیسے اب اور میں جھکوں صاحب
کچھ روایات کی گواہی پر
کتنا جرمانہ میں بھروں صاحب..
Shahr ke dukan-daaro, karobaar-e-ulfat mein sood kya ziyaan kya hai, tum na jaan paoge..
Sil ke daam kitne hain, khwab kitne mahnge hain, aur naqd-e-jaan kya hai, tum na jaan paoge.!
Koi kaise milta hai, phool kaise khilta hai, aankh kaise jhukti hai, saans kaise rukti hai..
Kaise rah nikalti hai, kaise baat chalti hai, shauq ki zabaan kya hai, tum na jaan paoge.!
Wasl ka sukoon kya hai, hijr ka junoon kya hai, husn ka fusoon kya hai ishq ka daroon kya hai..
Tum mareez-e-danaai, maslahat ke shaidaai, rah-e-gum-rahaa'n kya hai, tum na jaan paoge.!
Zakhm kaise phalte hain, daagh kaise jalte hain, dard kaise hota hai, koi kaise rota hai..
Ashk kya hai naale kya, dasht kya hai chhaale kya, aah kya fughaa'n kya hai, tum na jaan paoge.!
Na-muraad dil kaise subah-o-shaam karte hain, kaise zinda rahte hain, aur kaise marte hain..
Tum ko kab nazar aai ghum-zadon ki tanhaai, zeest be-amaa'n kya hai, tum na jaan paoge.!
Jaanta hun main tum ko zauq-e-shayeri bhi hai, shakhsiyat sajaane mein ek ye maahiri bhi hai..
Phir bhi harf chunte ho, sirf lafz sunte ho, un ke darmiyan kya hai, tum na jaan paoge.!!
"Jawed Akhtar"
_______________
Rah-e-gum-rahaa'n = lost in way,
________________________
شہر کے دکاں دارو کاروبار الفت میں سود کیا زیاں کیا ہے تم نہ جان پاؤ گے...
دل کے دام کتنے ہیں خواب کتنے مہنگے ہیں اور نقد جاں کیا ہے تم نہ جان پاؤ گے.!
کوئی کیسے ملتا ہے پھول کیسے کھلتا ہے آنکھ کیسے جھکتی ہے سانس کیسے رکتی ہے...
کیسے رہ نکلتی ہے کیسے بات چلتی ہے شوق کی زباں کیا ہے تم نہ جان پاؤ گے.!
وصل کا سکوں کیا ہے ہجر کا جنوں کیا ہے حسن کا فسوں کیا ہے عشق کا دروں کیا ہے...
تم مریض دانائی مصلحت کے شیدائی راہ گمرہاں کیا ہے تم نہ جان پاؤ گے.!
زخم کیسے پھلتے ہیں داغ کیسے جلتے ہیں درد کیسے ہوتا ہے کوئی کیسے روتا ہے...
اشک کیا ہے نالے کیا دشت کیا ہے چھالے کیا آہ کیا فغاں کیا ہے تم نہ جان پاؤ گے.!
نامراد دل کیسے صبح و شام کرتے ہیں کیسے زندہ رہتے ہیں اور کیسے مرتے ہیں...
تم کو کب نظر آئی غم زدوں کی تنہائی زیست بے اماں کیا ہے تم نہ جان پاؤ گے.!
جانتا ہوں میں تم کو ذوق شاعری بھی ہے شخصیت سجانے میں اک یہ ماہری بھی ہے...
پھر بھی حرف چنتے ہو صرف لفظ سنتے ہو ان کے درمیاں کیا ہے تم نہ جان پاؤ گے.!
Saari hairat hai meri saari ada us ki hai..
Be-gunahi hai meri aur saza us ki hai.!
Mere alfaaz mein jo rang hai wo us ka hai..
Mere ahsaas mein jo hai wo faza us ki hai.!
Sher mere hain magar in mein mohabbat us ki..
Phool mere hain magar baad-e-saba us ki hai.!
Ek mohabbat ki ye tasveer hai do rangon mein..
Shauq sab mera hai aur saari haya us ki hai.!
Hum ne kya us se mohabbat ki ijazat li thi..
Dil-shikan hi sahi par baat baja us ki hai.!
Ek mere hi siwa sab ko pukaare hai koi..
Main ne pahle hi kaha tha ye sada us ki hai.!
Khoon se seenchi hai main ne jo zameen mar mar ke..
Wo zameen ek sitam-gar ne kaha us ki hai.!
Us ne hi is ko ujaada hai ise loota hai..
Ye zameen us ki agar hai bhi to kya us ki hai.!!
"Jawed Akhtar"
____________________
ساری حیرت ہے مری ساری ادا اس کی ہے،
بے گناہی ہے مری اور سزا اس کی ہے..
میرے الفاظ میں جو رنگ ہے وہ اس کا ہے،
میرے احساس میں جو ہے وہ فضا اس کی ہے..
شعر میرے ہیں مگر ان میں محبت اس کی،
پھول میرے ہیں مگر باد صبا اس کی ہے..
اک محبت کی یہ تصویر ہے دو رنگوں میں،
شوق سب میرا ہے اور ساری حیا اس کی ہے..
ہم نے کیا اس سے محبت کی اجازت لی تھی،
دل شکن ہی سہی پر بات بجا اس کی ہے..
ایک میرے ہی سوا سب کو پکارے ہے کوئی،
میں نے پہلے ہی کہا تھا یہ صدا اس کی ہے..
خون سے سینچی ہے میں نے جو زمیں مر مر کے،
وہ زمیں ایک ستم گر نے کہا اس کی ہے..
اس نے ہی اس کو اجاڑا ہے اسے لوٹا ہے،
یہ زمیں اس کی اگر ہے بھی تو کیا اس کی ہے..
Sach ye hai be-kaar humein ghum hota hai,
Jo chaaha tha duniya mein kam hota hai..
Dhhalta suraj phaila jangal rasta gum,
Hum se poochho kaisa aalam hota hai..
Ghairon ko kab fursat hai dukh dene ki,
Jab hota hai koi humdam hota hai..
Zakhm to hum ne in aankhon se dekhe hain,
Logon se sunte hain marham hota hai..
Zehn ki shaakhon par ash'aar aa jaate hain,
Jab teri yaadon ka mausam hota hai.!!
"Jawed Akhtar"
Pyaas ki kaise laaye taab koi,
Nahin dariya to ho saraab koi..
Zakhm-e-dil mein jahaan mahakta hai,
Isi kyaari mein tha gulaab koi..
Raat bajti thi door shahnaai,
Roya pi kar bahut sharaab koi..
Dil ko ghere hain rozgaar ke ghum,
Raddi mein kho gayi kitaab koi..
Kaun sa zakhm kis ne bakhsha hai,
Is ka rakkhe kahaan hisaab koi..
Phir main sunne laga hun is dil ki,
Aane waala hai phir azaab koi..
Shab ki dahleez par shafaq hai lahu,
Phir hua qatl aaftaab koi.!
"Jawed Akhtar"
Phirte hain kab se dar-ba-dar,
Ab is nagar ab us nagar,
Ek dusre ke hum-safar, main aur meri aawargi...
Na-aashna har rah-guzar,
Na-mehrban har ek nazar,
Jaayen to ab jaayen kidhar, main aur meri aawargi.!
Hum bhi kabhi aabaad the,
Aise kahaan barbaad the,
Be-fikr the aazaad the, masroor the dil-shaad the...
Wo chaal aisi chal gaya,
Hum bujh gaye dil jal gaya,
Nikle jala ke apna ghar main aur meri aawargi.!
Jeena bahut aasan tha,
Ek shakhs ka ahsaan tha,
Hum ko bhi ek armaan tha, jo khwab ka samaan tha...
Ab khwab hai nayi aarzu,
Armaan hai nayi justuju,
Yoon bhi chalo khush hain magar main aur meri aawargi.!
Wo mah-wash wo mah-ru,
Wo mah-kaam-e-hu-ba-hu,
Thin jis ki baatein ku-ba-ku, us se ajab thi guftugu...
Phir yoon hua wo kho gayi,
To mujh ko zid si ho gayi,
Layenge us ko dhundh kar main aur meri aawargi.!
Ye dil hi tha jo sah gaya,
Wo baat aisi kah gaya,
Kahne ko phir kya rah gaya, ashkon ka dariya bah gaya...
Jab kah ke wo dilbar gaya,
Tere liye main mar gaya,
Rote hain us ko raat bhar main aur meri aawargi.!
Ab ghum uthayen kis liye,
Aansu bahayen kis liye,
Ye dil jalayen kis liye, yoon jaan ganwayen kis liye...
Pesha na ho jis ka sitam,
Dhundhenge ab aisa sanam,
Honge kahin to kaargar main aur meri aawargi.!
Aasaar hain sab khot ke,
Imkaan hain sab chot ke,
Ghar band hain sab got ke, ab khatm hain sab totke...
Qismat ka sab ye pher hai,
Andher hai andher hai,
Aise hue hain be-asar main aur meri aawargi.!
Jab humdam-o-humraaz tha,
Tab aur hi andaaz tha,
Ab soz hai tab saaz tha, ab sharm hai tab naaz tha...
Ab mujh se ho to ho bhi kya,
Hai saath wo to wo bhi kya,
Ek be-hunar ek be-samar main aur meri aawargi.!!
"Jawed Akhtar"
_______________
Mah-e-kaam-hu-ba-hu = same, ditto work of moon,
_________________________
پھرتے ہیں کب سے در بدر اب اس نگر اب اس نگر اک دوسرے کے ہم سفر میں اور مری آوارگی...
نا آشنا ہر رہگزر نا مہرباں ہر اک نظر جائیں تو اب جائیں کدھر میں اور مری آوارگی.!
ہم بھی کبھی آباد تھے ایسے کہاں برباد تھے بے فکر تھے آزاد تھے مسرور تھے دل شاد تھے...
وہ چال ایسی چل گیا ہم بجھ گئے دل جل گیا نکلے جلا کے اپنا گھر میں اور مری آوارگی.!
جینا بہت آسان تھا اک شخص کا احسان تھا ہم کو بھی اک ارمان تھا جو خواب کا سامان تھا...
اب خواب ہے نے آرزو ارمان ہے نے جستجو یوں بھی چلو خوش ہیں مگر میں اور مری آوارگی.!
وہ ماہ وش وہ ماہ رو وہ ماہ کام ہو بہو تھیں جس کی باتیں کو بہ کو اس سے عجب تھی گفتگو...
پھر یوں ہوا وہ کھو گئی تو مجھ کو ضد سی ہو گئی لائیں گے اس کو ڈھونڈ کر میں اور مری آوارگی.!
یہ دل ہی تھا جو سہ گیا وہ بات ایسی کہہ گیا کہنے کو پھر کیا رہ گیا اشکوں کا دریا بہہ گیا...
جب کہہ کے وہ دل بر گیا تیرے لیے میں مر گیا روتے ہیں اس کو رات بھر میں اور مری آوارگی.!
اب غم اٹھائیں کس لیے آنسو بہائیں کس لیے یہ دل جلائیں کس لیے یوں جاں گنوائیں کس لیے...
پیشہ نہ ہو جس کا ستم ڈھونڈیں گے اب ایسا صنم ہوں گے کہیں تو کارگر میں اور مری آوارگی.!
آثار ہیں سب کھوٹ کے امکان ہیں سب چوٹ کے گھر بند ہیں سب گوٹ کے اب ختم ہیں سب ٹوٹکے...
قسمت کا سب یہ پھیر ہے اندھیر ہے اندھیر ہے ایسے ہوئے ہیں بے اثر میں اور مری آوارگی.!
جب ہمدم و ہمراز تھا تب اور ہی انداز تھا اب سوز ہے تب ساز تھا اب شرم ہے تب ناز تھا...
اب مجھ سے ہو تو ہو بھی کیا ہے ساتھ وہ تو وہ بھی کیا اک بے ہنر اک بے ثمر میں اور مری آوارگی.!
Nigal gaye sab ki sab samandar zameen bachi ab kahin nahin hai,
Bachate hum apni jaan jis mein wo kashti bhi ab kahin nahin hai.!
Bahut dinon baad paai fursat to main ne khud ko palat ke dekha,
Magar main pahchanta tha jis ko wo aadmi ab kahin nahin hai.!
Guzar gaya waqt dil pe likh kar na jaane kaisi ajeeb baatein,
Waraq palat ta hun main jo dil ke to saadgi ab kahin nahin hai.!
Wo aag barsi hai dopahar mein ke saare manzar jhulas gaye hain,
Yahaan sawere jo taazgi thi wo taazgi ab kahin nahin hai.!
Tum apne qasbon mein ja ke dekho wahaan bhi ab shahr hi base hain.!
Ke dhundhte ho jo zindagi tum wo zindagi ab kahin nahin hai.!!
"Jawed Akhtar"
Mujh ko yaqeen hai sach kahti thin jo bhi ammi kahti thin..
Jab mere bachpan ke din the chaand mein pariyan rahti thin.!
Ek ye din jab apnon ne bhi hum se naata tod liya..
Ek wo din jab ped ki shaakhein bojh humara sahti thin.!
Ek ye din jab saari sadkein roothi roothi lagti hain..
Ek wo din jab aao khelein saari galiyan kahti thin.!
Ek ye din jab jaagi raatein deewaron ko takti hain..
Ek wo din jab shaamon ki bhi palkein bojhal rahti thin.!
Ek ye din jab zehn mein saari ayyaari ki baatein hain..
Ek wo din jab dil mein bholi-bhaali baatein rahti thin.!
Ek ye din jab laakhon ghum aur kaal pada hai aansu ka..
Ek wo din jab ek zara si baat pe nadiyaan bahti thin.!
Ek ye ghar jis ghar mein mera saaz-o-samaan rahta hai..
Ek wo ghar jis ghar mein meri boodhi naani rahti thin.!!
"Jawed Akhtar"
Misaal is ki kahaan hai koi zamane mein,
Ke saare khone ke ghum paaye hum ne paane mein.!
Wo shakl pighli to har shay mein dhhal gayi jaise,
Ajeeb baat hui hai use bhulane mein.!
Jo muntazir na mila wo to hum hain sharminda,
Ke hum ne der laga di palat ke aane mein.!
Lateef tha wo takhayyul se khwab se naazuk,
Ganwa diya use hum ne hi aazmane mein.!
Samajh liya tha kabhi ek saraab ko dariya,
Par ek sukoon tha hum ko fareb khaane mein.!
Jhuka darakht hawa se to aandhiyon ne kaha,
Zyaada farq nahin jhukne toot jaane mein.!!
"Jawed Akhtar"
_______________
Lateef = kind, benevolent, delicious, elegant,
Mere dil mein utar gaya suraj,
Teergi mein nikhar gaya suraj..
Dars de kar humein ujaale ka,
Khud andhere ke ghar gaya suraj..
Hum se waada tha ek sawere ka,
Haye kaisa makr gaya suraj..
Chaandni aks chaand aaina,
Aaine mein sanwar gaya suraj..
Doobte waqt zard tha itna,
Log samjhe ke mar gaya suraj.!!
"Jawed Akhtar"
Main pa saka na kabhi is khalish se chhutkara,
Wo mujh se jeet bhi sakta tha jaane kyun haara...
Baras ke khul gaye aansu nithar gayi hai faza,
Chamak raha hai sar-e-shaam dard ka taara...
Kisi ki aankh se tapka tha ek amanat hai,
Meri hatheli pe rakkha hua ye angaara...
Jo par samete to ek shaakh bhi nahin paai,
Khule the par to mera aasman tha saara...
Wo saanp chhod de dasna ye main bhi kahta hun,
Magar na chhodenge log us ko gar na phunkaara.!!
"Jawed Akhtar"
Main khud bhi sochta hun ye kya mera haal hai,
Jis ka jawaab chahiye wo kya sawaal hai...
Ghar se chala to dil ke siwa paas kuchh na tha,
Kya mujh se kho gaya hai mujhe kya malaal hai...
Aasoodgi se dil ke sabhi daagh dhul gaye,
Lekin wo kaise jaaye jo shishe mein baal hai...
Be-dast-o-paa hun aaj to ilzaam kis ko dun,
Kal main ne hi buna tha ye mera hi jaal hai...
Phir koi khwab dekhun koi aarzu karun,
Ab ai dil-e-tabaah tera kya khyaal hai.!!
"Jawed Akhtar"
Main kab se kitna hun tanha tujhe pata bhi nahin,
Tera to koi khuda hai mera khuda bhi nahin...
Kabhi ye lagta hai ab khatm ho gaya sab kuchh,
Kabhi ye lagta hai ab tak to kuchh hua bhi nahin...
Kabhi to baat ki us ne kabhi raha khamosh,
Kabhi to hans ke mila aur kabhi mila bhi nahin...
Kabhi jo talkh-kalaami thi wo bhi khatm hui,
Kabhi gila tha humein un se ab gila bhi nahin...
Wo cheekh ubhri badi der goonji doob gayi,
Har ek sunta tha lekin koi hila bhi nahin.!!
"Jawed Akhtar"
Kis liye kijiye bazm-aaraai,
Pur-sukoon ho gayi hai tanhaai..
Phir khamoshi ne saaz chheda hai,
Phir khyalaat ne li angdaai..
Yoon sukoon-aashna hue lamhe,
Boond mein jaise aaye gahraai..
Ek se ek waaqia hua lekin,
Na gayi tere ghum ki yaktaai..
Koi shikwa na ghum na koi yaad,
Baithe baithe bas aankh bhar aai..
Dhalki shaanon se har yaqeen ki qaba,
Zindagi le rahi hai angdaai.!!
"Jawed Akhtar"
