Mere kaasa-e-shab-o-roz mein,
Koi shaam aisi bhi daal de,
Sabhi khwahishon ko hara kare,
Sabhi khauf dil se nikaal de.!
Mere khush-nazar mere khush-khabar,
Ye jo raat hai use taal de,
Mere gulistaan pe nigaah kar,
Use apna rang-e-jamaal de.!
Sar-e-kahkashaan mera aks ho,
Mere shauq ko par-o-baal de,
Mere fan se phaile jo raushni,
Use phir kabhi na zawaal de..!!
"Amjad Islam Amjad"
#Nazm
Zindagi ke mele mein khwahishon ke rele mein,
Tum se kya kahein jaanaa is qadar jhamele mein,
Waqt ki rawani hai, bakht ki girani hai,
Sakht be-zameeni hai sakht la-makaani hai,
Hijr ke samandar mein,
Takht aur takhte ki ek hi kahaani hai,
Tum ko jo sunaani hai,
Baat go zara si hai,
Baat umr-bhar ki hai,
Umr-bhar ki baatein kab do-ghadi mein hoti hain,
Dard ke samandar mein,
An-ginat jazeere hain be-shumar moti hain,
Aankh ke dareeche mein tum ne jo sajaya tha,
Baat us diye ki hai,
Baat us gile ki hai,
Jo lahu ki khalwat mein chor ban ke aata hai,
Lafz ki faseelon par toot toot jaata hai,
Zindagi se lambi hai baat ratjage ki hai,
Raaste mein kaise ho,
Baat takhliye ki hai,
Takhliye ki baaton mein guftugu izaafi hai,
Pyar karne waalon ko ek nigaah kaafi hai,
Ho sake to sun jaao ek roz akele mein,
Tum se kya kahein jaanaa is qadar jhamele hain..!!
"Amjad Islam Amjad"
#Nazm
Kis se poochhun,
Wo kya shakhs hai,
Jo meri aarzu ke jharokhon mein thehre hue,
Saare chehron mein bikhra hua hai,
Magar khud abhi apne chehre mein utra nahin,
Kis se poochhun,
Wo kya naam hai,
Jo meri dhadkanon ke muqaddar mein marqoom hai,
Aur wo kya ajnabi hai,
Jo sadiyon se mere khyaalon ke qarye mein aabaad hai,
Magar mera surat-shanasa nahin,
Kis ki aawaz hai,
Jo meri rooh mein naghma-parwaaz hai,
Kaun batlayega us nagar ka pata,
Jis ki mitti ki khushbu mere jism ke waste darj hai,
Jis ke deewar-o-dar meri be-khwaab aankhon se manoos hain,
Aur jis ko kabhi main ne dekha nahin,
Na-rasaai meri na-rasaai meri,
Jis ko paya na tha us ko khone ka ghum,
Meri khwahish ke seene ka nasoor hai,
Kis ko aawaz dun kis ka maatam karun,
Wo abhi apne chehre mein utra nahin,
Kis se puchhun mera muddaa kaun hai,
Na-rasa kaun hai.!!
"Amjad Islam Amjad"
#Nazm
Aaj ki raat bahut sard bahut kaali hai,
Teergi aise lipat ti hai hawa-e-ghum se,
Apne bichhde hue saajan se mili hai jaise,
Mish'al-e-khwaab kuchh is taur bujhi hai jaise,
Dard ne jaagti aankhon ki chamak kha li hai,
Shauq ka naam na khwahish ka nishaan hai koi,
Barf ki sil ne mere dil ki jagah pa li hai,
Ab dhundalke bhi nahin zeenat-e-chashm-e-be-khwaab,
Aas ka roop-mahl dast-e-tahi hai jaise,
Bahr-e-imkaan pe kaai si jami hai jaise,
Aise lagta hai ki jaise mera ma'amura-e-jaan,
Kisi sailaab-zada ghar ki zabun-haali hai,
Na koi dost na taara ki jise batlaaun,
Is tarah too ke bikhra hai ana ka shisha,
Mera pindaar mere dil ke liye gaali hai,
Nabz taaron ki tarah doob rahi hai jaise,
Ghum ki pinhaai samandar se badi hai jaise,
Aankh sahraaon ke daaman ki tarah khaali hai,
Wahshat-e-jaan ki taraf dekh ke yun lagta hai,
Maut is tarah ke jeene se bhali hai jaise,
Teergi chhatne lagi, waqt rukega kyun-kar,
Subah-e-khursheed liye dar pe khadi hai jaise,
Daagh-e-ruswaai chhupane se nahin chhup sakta,
Ye to yun hai ki jabeen bol rahi hai jaise.!!
"Amjad Islam Amjad"
#Nazm
Self made logo'n ka alamiya.!!
Raushni mizaajon ka kya ajab muqaddar hai...
Zindagi ke raste mein bichhne waale kaanton ko,
Raah se hataane mein,
Ek ek tinke se aashiyan banane mein,
Khushbuein pakadne mein gulistaan sajaane mein,
Umr kaat dete hain...
Umr kaat dete hain,
Aur apne hisse ke phool baant dete hain,
Kaisi kaisi khwahish ko qatl karte jaate hain,
Darguzar ke gulshan mein abr ban ke rahte hain,
Sabr ke samandar mein kashtiyaan chalate hain,
Ye nahin ki un ko is roz-o-shab ki kaahish ka,
Kuchh sila nahin milta,
Marne waali aaso'n ka khoon-baha nahin milta,
Zindagi ke daaman mein jis qadar bhi khushiyan hain,
Sab hi haath aati hain,
Sab hi mil bhi jaati hain,
Waqt par nahin miltin waqt par nahin aatin,
Yaani un ko mehnat ka ajr mil to jaata hai,
Lekin is tarah jaise,
Qarz ki raqam koi qist qist ho jaaye,
Asl jo ibarat ho pas nawisht ho jaaye,
Fasl-e-gul ke aakhir mein phool un ke khilte hain,
Un ke sahn mein suraj der mein nikalte hain.!!
"Amjad Islam Amjad"
#Nazm
Hari bhari ek shaakh-e-badan par,
Mere labo'n ke lams se phoote,
Aise aise phool...
Saada se malboos mein bhi wo saato'n rang khilaati hai,
Apne husn ki tez mahak se,
Logo'n ke amboh mein baithi yun ghabra si jaati hai,
Jaise baatein karte koi,
Jaata hai kuchh bhool...
Mere labo'n ke lams se phoote,
Hari bhari ek shaakh-e-badan par,
Kaise kaise phool.!!
"Amjad Islam Amjad"
#Nazm
Kuchh kiya jaaye na socha jaaye,
Mud ke dekhun to na dekha jaaye,
Meri tanhaai ki wahshat se hirasaa'n ho kar,
Mera saaya mere qadmon mein simat aaya hai,
Kaun hai phir jo mere saath chala aata hai,
Mera saya to nahin...
Kis ki aahat ka gumaa'n,
Yun mere paanw ki zanjeer bana jaata hai,
Door ta-hadd-e-nazar shahar ke aasaar nahin,
Aur dushman ki tarah,
Shaam talwaar liye sar pe chali aati hai,
Bolta hun to aachanak koi,
Meri aawaz mein aawaz mila deta hai,
Mujh ko khud mere hi lafzon se dara deta hai,
Kaun hai jis ne mere qalb ki dhadkan dhadkan,
Apne ahsaas ki sooli pe chadha rakkhi hai,
Meri raftaar ke pur-khauf-o-khatar raste mein,
Kis ne aawaz ki deewar bana rakkhi hai,
Sang-e-aawaz ki deewar giraaun kaise,
Kuchh kiya jaaye na socha jaaye,
Mud ke dekhun to na dekha jaaye.!!
"Amjad Islam Amjad"
#Nazm
Ab wo aankhon ke shagufe hain na chehron ke gulaab,
Ek manhoos udaasi hai ki mit ti hi nahin,
Itni be-rang hain ab rang ki khoogar aankhein,
Jaise is shahr-e-tamanna se koi rabt na tha
Jaise dekha tha sarab...
Dekh leta hun agar koi shanasa chehra,
Ek lamhe ko use dekh ke ruk jaata hun,
Sochta hun ki badhun aur koi baat karun,
Us se tajdeed-e-mulaqaat karun,
Lekin us shakhs ki manoos gurezaa'n nazrein,
Mujh ko ahsaas dilaati hain ki ab us ke liye,
Main bhi anjaan hun, ek aam tamashai hun,
Rah chalte hue in dusre logo'n ki tarah..!!
"Amjad Islam Amjad"
#Nazm
Gulaab chehre pe muskurahat,
Chamakti aankhon mein shokh jazbe,
Wo jab bhi college ki sidhiyon se,
Saheliyon ko liye utarti,
To aise lagta tha jaise dil mein utar rahi ho,
Kuchh is tayaqqun se baat karti thi jaise duniya,
Usi ki aankhon se dekhti ho,
Wo apne raste mein dil bichhati hui nigaahon se hans ke kahti,
Tumhaare jaise bahut se ladkon se main ye baatein,
Bahut se barson se sun rahi hun,
Main saahilon ki hawa hun,
Neele samandaron ke liye bani hun,
Wo saahilon ki hawa si ladki,
Jo raah chalti to aise lagta tha jaise dil mein utar rahi ho,
Wo kal mili to usi tarah thi,
Chamakti aankhon mein shokh jazbe, gulaab chehre pe muskurahat,
Ke jaise chaandi pighal rahi ho,
Magar jo boli to us ke lahje mein wo thakan thi,
Ke jaise sadiyon se dasht-e-zulmat mein chal rahi ho..!!
"Amjad Islam Amjad"
#Nazm
Bastiyan hon kaisi bhi pastiyan hon jaisi bhi,
Har tarah ki zulmat ko raushni kaha jaaye..
Khaak daalein manzil par bhool jaayein saahil ko,
Rukh jidhar ho paani ka us taraf baha jaaye..
Mulk bech daalein ya aabru rakhein girwi,
Jaisa hukm-e-haakim ho us tarah kiya jaaye..
Shor mein sadaaon ke ajnabi hawaaon ke,
Kaun sunne waala hai? kis se ab kaha jaaye..
Guftugu pe pahre hain har taraf katahre hain,
Raaste muayyan hain har qadam pe likkha hai,
Kis jagah pe rukna hai! kis taraf chala jaaye..
Dil ki baat kahne ka ek yahi tareeqa hai,
Chhup ke saari duniya se ab gharon ke kono'n mein,
Aap hi suna jaaye aap hi kaha jaaye..!!
"Amjad Islam Amjad"
#Nazm
Ek khwab ki aahat se,
Yun goonj uthin galiyaan..
Ambar pe khile taare,
Baaghon mein hansein kaliyaan..
Saagar ki khamoshi mein ek mauj ne karwat li,
Aur chaand jhuka us par,
Phir baam hue raushan,
Khidki ke kiwadon par saaya sa koi larza,
Aur tez hui dhadkan,
Phir toot gai choorhi, ujadne lage manzar,
Ek dast-e-hinaai ki dastak se khula dil mein,
Ek rang ka darwaza,
Khushbu si ajab mahki
Koyal ki tarah koi be-naam tamanna si,
Phir door kahin chahki,
Phir dil ki suraahi mein ek phool khila taaza,
Jugnu bhi chale aaye sun shaam ka aawaaza,
Aur bhanwre hanse mil kar,
Har ek sitaare ki aankhon mein ishaare hain,
Us shakhs ke aane ke,
Ai waqt zara tham ja,
Aasaar ye saare hain us shakhs ke aane ke.!!
"Amjad Islam Amjad"
#Nazm
Ai hijr-zada shab...
Aa tu hi mere seene se lag ja ke bate ghum,
Ahsas ko tanhaai ki manzil se mile raah,
Aawaaz ki gumnaam zameenon ko mile nam,
Aa kuchh to ghate ghum...
Is saa'at-e-mahjoor ki fariyaad ho maddham,
Kyun nauha-ba-lab phirti hai mahroom-e-mukhatab,
Ai hijr-zada shab...
Dekh aaj tamannaaon ki be-samt hawaaen,
Dil-e-sharminda-nazar ko
Phir le ke chali hain wahi be-rakht hawaaen,
Usi jaadu ke nagar ko,
Jis khaak pe utre the muraadon ke saheefe,
Sanki thi jahaan sabz hawa, ku-e-wafa ki,
Mahke the jahaan phool-sifat rang kisi ke,
Us khaak ka har roop mere waaste zindaan,
Kuchh roothe hue khwaab hain kuchh toote hue maan,
Kuchh barse hue abr hain kuchh tarse hue lab,
Ai hijr-zada shab...
Aa tu hi gale lag ke bata kaun yahaan hai,
Juz khud-sari-e-mauj-e-hawa kaun yahaan hai,
Humdard mera tere siwa kaun yahaan hai,
Aa choom lun aankhein teri rukhsaar tere lab,
Ai hijr-zada shab,
"Amjad Islam Amjad"
#Nazm
Ai dil-e-be'khabar,
Jo hawa ja chuki ab nahin aayegi,
Jo shajar toot jaata hai phalta nahin,
Waapsi mausamon ka muqaddar to hai,
Jo samaa'n beet jaaye palat ta nahin,
Jaane walae nahin laut te umr bhar,
Ab kise dhundhta hai sar-e-rahguzar,
Ai dil-e-kam'nazar,
Ai mere be'khabar
Ai mere hum-safar,
Wo to khushbu tha agle nagar ja chuka,
Chandni tha hua sarf-e-rang-e-qamar,
Khwaab tha aankh khulte hi ojhal hua,
Ped tha rut badalte hua be-samar,
Ai dil-e-be'asar,
Ai mere chaara-gar,
Ye hai kis ko khabar!
Kab hawa-e-safar ka ishaara mile,
Kab khulein saahilon par safeenon ke par,
Kaun jaane kahaan manzil-e-mauj hai,
Kis jazeere pe hai shah-zaadi ka ghar,
Ai mere chaara-gar,
Ai dil-e-be'khabar, kam-nazar, mo'tabar,
Tu ke muddat se hai zer-e-baar-e-safar,
Be'qaraar-e-safar,
Rail ki be-hunar ptriyon ki tarah,
Aas ke be-samar mausamon ki tarah,
Be-jahat manzilon ki masaafat mein hai,
Rasta bhoole hue rahrawo'n ki tarah,
chob-e-naar-e-safar,
Aitebaar-e-nazar kis gumaa'n par karein,
Ai dil-e-be'basar,
Ye to saahil pe bhi dekhti hai bhanwar,
Ret mein kisht karti hai aab-e-baqa,
Kholti hai hawaaon mein baab-e-asar,
Tujh ko rakhti hai ye zebdaar-e-safar,
Be'qarar-e-safar,
Ai dil-e-be'hunar,
Garm saanson ki wo khushbuein bhool ja,
Wo chahakti hui dhadkanen bhool ja,
Bhool ja narm honthon ki shadabiyaan,
Harf-e-iqraar ki lazzatein bhool ja,
Bhul ja wo hawa bhool ja wo nagar,
Kaun jaane kahaan raushni kho gayi,
Lut gaya hai kahaan karwaan-e-sahar,
Ab kahaan gesuon ke wo saaye kahaan,
Us ki aahat se chamke hue baam-o-dar,
Ai dil-e-be'basar,
Rang-e-asoodgi ke tamashe kahaan,
Jhutputa hai yahaan rah-guzar rah-guzar,
Wo to khushbu tha agle nagar ja chuka,
Ab kise dhundhta hai are be'khabar,
Jaane waale nahin laut te umr bhar,
Ai dil-e-kam'nazar,
Ai mere chaara-gar,
Ai mere hum-safar,
"Amjad Islam Amjad"
#Nazm
Kaun aayega!
Shab-bhar girte patton ki aawazein mujh se kahti hain,
Kaun aayega!
Kis ki aahat par mitti ke kaan lage hain!
Khushbu kis ko dhundh rahi hai!
Shabnam ka aashob samajh,
Aur dekh ke in phoolon ki aankhein
Kis ka rasta dekh rahi hain..
Kis ki khaatir,
Qarya qarya jaag raha hai,
Soona rasta goonj raha hai,
Kis ki khaatir!
Tanhai ke hol-nagar mein,
Shab-bhar girte patton ki aawazein chunta rahta hun,
Apne sar par tez hawa ke nauhe sunta rahta hun..!!
"Amjad Islam Amjad"
#Nazm
Udaasi ke ufuq par jab,
Tumhaari yaad ke jugnu chamakte hain,
To meri rooh par rakkha hua ye hijr ka patthar,
Chamakti barf ki surat pighalta hai.!
Agarche yun pighalne se ye patthar, sang-reza to nahin banta!
Magar ek hausla sa dil ko hota hai,
Ke jaise sar-ba-sar tareek shab mein bhi
Agar ek zard-ru, sahma hua taara nikal aaye,
To qaatil raat ka be-ism jaadu toot jata hai,
Musafir ke safar ka raasta to kam nahin hota,
Magar taare ki chilman se
Joi bhoola hua manzar achanak jagmagata hai.!
Sulagte paanw mein ek aabla sa phoot jaata hai.!!
"Amjad Islam Amjad"
Us ne aahista se jab pukara mujhe,
Jhuk ke takne laga har sitara mujhe,
Tera ghum is fishaar-e-shab-o-roz mein,
Hone deta nahin be-sahaara mujhe,
Har sitaare ki bujhti hui raushni,
Mere hone ka hai istiaara mujhe,
Ai khuda koi aisa bhi hai mojaza,
Jo ke mujh par kare aashkaara mujhe,
Koi suraj nahin koi taara nahin,
Tu ne kis jhutpute mein utaara mujhe,
Aks-e-imroz mein naqsh-e-diroz mein,
Ek ishaara tujhe ek ishaara mujhe,
Hain azal ta abad toot'te aaine,
Aagahi ne kahaan la ke maara mujhe.!!
"Amjad Islam Amjad"
___
Fishaar-e-shab-o-roz = Enchantment, fascination, of day and night,
Istiaara = a metaphor, using a word metaphorically,
Aashkaara = clear, manifest, visible,
Jhutpute = twilight,
Aks-e-imroz = reflection of today,
Naqsh-e-diroz = imprint of yesterday,
Shaam dhhale jab basti waale laut ke ghar ko aate hain,
Aahat aahat dastak dastak kya kya hum ghabraate hain,
Ahl-e-junoon to dil ki sada par jaan se apni ja bhi chuke,
Ahl-e-khirad ab jaane hum ko kya samjhane aate hain,
Jaise rail ki har khidki ki apni apni duniya hai,
Kuchh manzar to ban nahin paate kuchh peechhe rah jaate hain,
Jis ki har ek eent mein jazb hain un ke apne hi aansu,
Waaye ke ab wo ahl-e-dua hi is mehraab ko dhhaate hain,
Aaj ki shab to kat hi chali hai khwaabon aur saraabon mein,
Aane waale din ab dekhein kya manzar dikhlaate hain,
Saari umr hi dil se apna aisa kuchh bartaao raha,
Jaise khel mein haarne waale bachche ko bahlaate hain,
Na-mumkin ko mumkin 'Amjad' ahl-e-wafa hi kar sakte hain,
Paani aur hawa par dekho kya kya naqsh banaate hain.!!
"Amjad Islam Amjad"
___
Waaye = alas, expression of pain, ah! oh!
Sainkadon hi rahnuma hain raasta koi nahin,
Aaine chaaron taraf hain dekhta koi nahin,
Sab ke sab hain apne apne daayere ki qaid mein,
Daayeron ki had se baahar sochta koi nahin,
Sirf maatam aur zaari se hi jis ka hal mile,
Is tarah ka to kahin bhi mas'ala koi nahin,
Ye jo saaye se bhatakte hain humare ird-gird,
Chhu ke un ko dekhiye to wahima koi nahin,
Jo hua ye darj tha pahle hi apne bakht mein,
Is ka matlab to hua ki bewafa koi nahin,
Tere raste mein khade hain sirf tujh ko dekhne,
Muddaa poochho to apna muddaa koi nahin,
Kun-fakaa'n ke bhed se maula mujhe aagah kar,
Kaun hun main gar yahaan par dusra koi nahin,
Waqt aisa hum-safar hai jis ki manzil hai alag,
Wo saraaye hai ke jis mein theharta koi nahin,
Gaahe gaahe hi sahi 'Amjad' magar ye waaqia,
Yun bhi lagta hai ki duniya ka khuda koi nahin.!!
"Amjad Islam Amjad"
Saaye dhhalne charaag jalne lage,
Log apne gharon ko chalne lage,
Itni pur-pech hai bhanwar ki girah,
Jaise nafrat dilon mein palne lage,
Door hone lagi jaras ki sada,
Karwaan raaste badalne lage,
Us ke lahje mein barf thi lekin,
Chhu ke dekha to haath jalne lage,
Us ke band-e-qaba ke jaadu se,
Saanp se ungliyon mein chalne lage,
Raah-e-gum'karda taairo'n ki tarah,
Phir sitaare safar pe chalne lage,
Phir nigaahon mein dhool udti hai,
Aks phir aaine badalne lage..!!
"Amjad Islam Amjad"
___
Pur-pech = complicated, difficult,
Girah = a knot, a joint, a knuckle,
Jaras = the bell,
Band-e-qaba = knot in the tunic/apparel,
Raah-e-gum'karda = lost way,
Taairo'n = birds,
Paspa hui sipah to parcham bhi hum hi the,
Hairat ki baat ye hai ki barham bhi hum hi the,
Girne lage jo sookh ke patte to ye khula,
Gulshan the hum jo aap to mausam bhi hum hi the,
Hum hi the tere wasl se mahroom umr bhar,
Lekin tere jamaal ke mahram bhi hum hi the,
Manzil ki be-rukhi ke gila-mand the humin,
Har raaste mein sang-e-mujassam bhi hum hi the,
Apni hi aasteen mein tha khanjar chhupa hua,
'Amjad' har ek zakhm ka marham bhi hum hi the.!!
"Amjad Islam Amjad"
