Aaj Bhi Qaafila-e-ishq Rawaa'n Hai Ke Jo Tha

Aaj bhi qaafila-e-ishq rawaa'n hai ke jo tha,
Wahi meel aur wahi sang-e-nishaa'n hai ke jo tha,

Phir tera ghum wahi ruswa-e-jahaa'n hai ke jo tha,
Phir fasana ba-hadees-e-digraa'n hai ke jo tha,

Manzilen gard ke maanind udi jaati hain,
Wahi andaaz-e-jahaan-e-guzaraa'n hai ke jo tha,

Zulmat o noor mein kuchh bhi na mohabbat ko mila,
Aaj tak ek dhundalke ka samaa'n hai ke jo tha,

Yun to is daur mein be-kaif si hai bazm-e-hayat,
Ek hangama sar-e-ritl-e-giraa'n hai ke jo tha,

Laakh kar jaur-o-sitam lakh kar ahsaan-o-karam,
Tujh pe ai dost wahi wahm-o-gumaa'n hai ke jo tha,

Aaj phir ishq do-alaam se juda hota hai,
Aasteeno'n mein liye kaun-o-makaa'n hai ke jo tha,

Ishq afsurda nahin aaj bhi afsurda bahut,
Wahi kam kam asr-e-soz-e-nihaa'n hai ke jo tha,

Nazar aa jaate hain tum ko to bahut naazuk baal,
Dil mera kya wahi ai shisha-giraa'n hai ke jo tha,

Jaan de baithe the ek baar hawas waale bhi,
Phir wahi marhala-e-sood-o-ziyaa'n hai ke jo tha,

Aaj bhi said-gaah-e-ishq mein husn-e-saffaak,
Liye aabru ki lachakti si kamaa'n hai ke jo tha,

Phir teri chashm-e-sukhan-sanj ne chhedi koi baat,
Wahi jaadu hai wahi husn-e-bayaa'n hai ke jo tha,

Raat bhar husn par aaye bhi gaye sau sau rang,
Shaam se ishq abhi tak nigaraa'n hai ke jo tha,

Jo bhi kar jaur-o-sitam jo bhi kar ahsaan-o-karam,
Tujh pe ai dost wahi wahm-o-gumaa'n hai ke jo tha,

Aankh jhapki ke idhar khatm hua roz-e-wisaal,
Phir bhi is din pe qayamat ka gumaa'n hai ke jo tha,

Qurb hi kam hai na doori hi zyaada lekin,
Aaj wo rabt ka ahsaas kahaan hai ke jo tha,

Teea-bakhti nahin jaati dil-e-sozaa'n ki 'Firaq',
Shama ke sar pe wahi aaj dhuaan hai ke jo tha..!!

"Firaq Gorakhpuri"

Aai Hai Kuchh Na Poochh Qayamat Kahaan Kahaan

Aai hai kuchh na poochh qayamat kahaan kahaan,
Uff le gayi hai mujh ko mohabbat kahaan kahaan,

Betaabi-o-sukoon ki huyin manzilein tamaam,
Bahlayen tujh se chhut ke tabiyat kahaan kahaan,

Furqat ho ya visaal wahi iztiraab hai,
Tera asar hai ai ghum-e-furqat kahaan kahaan,

Har jumbish-e-nigaah mein sad-kaif be-khudi,
Bharti phiregi husn ki neeyat kahaan kahaan,

Raah-e-talab mein chhod diya dil ka saath bhi,
Phirte liye hue ye musibat kahaan kahaan,

Dil ke ufaq tak ab to hain parchhaiyaan teri,
Le jaaye ab to dekh ye wahshat kahaan kahaan,

Ai nargis-e-siyah bata de tere nisaar,
Kis kis ko hai ye hosh ye ghaflat kahaan kahaan,

Nairang-e-ishq ki hai koi intiha ke ye,
Ye ghum kahaan kahaan ye masarrat kahaan kahaan,

Beganagi par us ki zamaane se ehtiraaz,
Dar-parda us ada ki shikayat kahaan kahaan,

Farq aa gaya tha daur-e-hayat-o-mamaat mein,
Aai hai aaj yaad wo surat kahaan kahaan,

Jaise fana baqa mein bhi koi kami si ho,
Mujh ko padi hai teri zarurat kahaan kahaan,

Duniya se ai dal itni tabiyat bhari na thi,
Tere liye uthaai nadamat kahaan kahaan,

Ab imtiyaz-e-ishq-o-hawas bhi nahin raha,
Hoti hai teri chashm-e-inayat kahaan kahaan,

Har gaam par tareeq-e-mohabbat mein maut thi,
Is raah mein khule dar-e-rahmat kahaan kahaan,

Hosh-o-junoon bhi ab to bas ek baat hain 'Firaq',
Hoti hai us nazar ki shararat kahaan kahaan

"Firaq Gorakhpuri"
___
Nairang-e-ishq = deception, miracle of love,
Ehtiraaz = to avoid,
Dar-parda = behind curtain,
Baqa = immortality, permanence,
Dal = group, crowd,
Gaam = step, footstep, क़दम
Tareeq-e-mohabbat = mode, manner of love,