Bade Khuloos Se Daaman Pasaarta Hai Koi

Bade khuloos se daaman pasaarta hai koi,
Khuda ko jaise zameen par utaarta hai koi 

Na poochh kya tere milne ki aas hoti hai,
Kahaan guzarti hai kaise guzaarta hai koi,

Baja hai shart-e-wafa shart-e-zindagi bhi to ho,
Bacha sake to bacha le ki haarta hai koi,

Wo kaun shakhs hai kya naam hai khuda jaane,
Andheri raat hai kis ko pukaarta hai koi,

Chala hun phir sipar-e-taab-e-ghum uthaye hue,
Nashat-e-wasl ke raste pe maarta hai koi,

Charaagh rakh ke sar-e-shaam dil ke zeena par,
Mujhe khabar nahin hoti sudhaarta hai koi,

Ye sar ka bojh nahin dil ka bojh hai ise 'Shaaz',
Kahaan utarta hai lekin utaarta hai koi.!!

"Shaaz Tamkanat"

Aabla-paai Se Veerana Mahak Jaata Hai

Aabla-paai se veerana mahak jaata hai,
Kaun phoolon se mera raasta dhak jaata hai,

Maslahat kahti hai wo aaye to kyun aaye yahaan,
Dil ka ye haal har aahat pe dhadak jaata hai,

Kya sar-e-shaam na lautunga nasheman ki taraf,
Kya andhera ho to jugnu bhi bhatak jaata hai,

Ek deewana bhatakta hai bagula ban kar,
Ek aahu kisi waadi mein thithak jaata hai,

Koi aawaz kahin goonj ke rah jaati hai,
Koi aansu kisi aariz pe dhalak jaata hai,

Qaafila umr ka paiham safar-aamada sahi,
Shajar-e-saaya-fagan dekh ke thak jaata hai,

'Shaaz' is koshish-e-tamkeen pe bahut naaz na kar,
Ye charagh-e-tah-e-daaman bhi bhadak jaata hai.!!

"Shaaz Tamkanat"
__________

Shajar-e-saya-fagan = shadow-casting tree,

Saanson Mein Base Ho Tum Aankhon Mein Chhupa Lunga

Saanson mein base ho tum aankhon mein chhupa lunga,
Jab chahun tumhein dekhun aaina bana lunga,

Yaadon se kaho meri baali'n se chali jaayen,
Ab ai shab-e-tanhaai aaram zara lunga, 

Ranjish se judaai tak kya saaneha guzra hai,
Kya kya mujhe daawa tha jab chaahun mana lunga,

Tasveer khyaali hai har aankh sawaali hai,
Duniya mujhe kya degi duniya se mein kya lunga,

Kab laut ke aaoge israar nahin karta,
Itna mere bas mein hai main umr ghata lunga,

Kya tohmatein duniya ne ai 'Shaaz' uthaai hain,
Ek tohmat-e-hasti thi socha tha utha lunga.!!

"Shaaz Tamkanat"

Raat Dhhalte Hi Ek Aawaz Chali Aati Hai

* Nazm *

Raat dhhalte hi ek aawaz chali aati hai,

Bhool bhi jao ke main ne tumhein chaha kab tha,

Kis sanobar ke tale main ne qasam khaai thi,

Koi tufaan kisi punam mein uthaya kab tha,

Meri raaton ko kisi dard se nisbat kya thi,

Meri subahon ko duaoan se ilaqaa kab tha,

Ek mahmil ke sirhaane koi roya tha zaroor,

Pas-e-mahfil kisi laila ne pukara kab tha,

Tum yunhi zid mein hue khaak-e-dar-e-may-khana,

Mujh ko ye zom ke main ne tumhein toka kab tha,

Tum ne kyun paakai-e-daaman ki hikayat likkhi,

Mere sar ko kisi deewar ka sauda kab tha,

Yaad kam kam hai na chhedo mere maktoob ki baat,

Wo murawwat thi faqat harf-e-tamanna kab tha,

Dil na is tarah dukha saaf mukarne waale,

Mujh ko tasleem ke teri koi taqseer na thi,

Ye baja hai ke tujhe zauq-e-nasheman na mila,

Ye ghalat hai ke mujhe hasrat-e-tameer na thi,

Sang-baari mein ye shishe ka makaan kis ka hai,

Is dar-o-baam mein khushbu-e-wafa kaisi hai,

Kis ki aawaz se deewaron ke seene mein figaar,

Mere maabood mere ghar ki faza kaisi hai,

Chhaanw dete nahin aangan ke ghanere ashjaar,

Ghum ki chhaai hui ghanghor ghata kaisi hai,

Ek konpal pe tha angusht-e-hinaai ka nishaan,

Ye lahu roti hui shaakh-e-hina kaisi hai,

Kis ki tasveer hai ye jis pe gumaan hota hai,

Jaane kab bol uthe uf ye ada kaisi hai,

Kis ne takiya pe ye kaadha hai gire ka misra,

Haye tooti hui neendon ki saza kaisi hai,

Soch mein gum hun ke kis kis ki zabaan band karun,

Aaj shayad dar o deewar ko dhhana hoga,

Jis mein tu hai tere waade hain teri qasmein hain,

Kya sitam hai ke usi ghar ko jalana hoga.!!

"Shaaz Tamkanat"
__________

Mahmil = saddle of camel,
Zom = arrogance/ conceit,
Maktoob = letter, message,
Taqseer = error, crime, sin,

Mujhe Yaad Padta Hai Ek Umr Guzri

* Nazm *

Mujhe yaad padta hai ek umr guzri..

Lagawat ki shabnam mein lahja dubo kar,

Koi mujh ko aawaz deta tha aksar,

Bulaawe ki masumiyat ke sahaare,

Main aahista aahista pahuncha yahaan tak,

Ba-har samt amboh-e-awaar-gaa'n tha,

Bade chaao se main ne ek ek se poochha,

Kaho kya tum hi ne pukara tha mujh ko,

Kaho kya tum hi ne pukara tha mujh ko,

Magar mujh se amboh-e-awaar-gaa'n ne,

Hirasaa'n hirasaa'n pareshaan pareshaan,

Kaha sirf itna nahin wo nahin hum,

Humein bhi bula kar koi chhup gaya hai.!!

"Shaaz Tamkanat"
__________

Amboh-e-awaar-gaa'n = mob of vagrant,

Kya Karun Ranj Gawaara Na Khushi

Kya Karun Ranj Gawaara Na Khushi Raas Mujhe,
Jeene Degi Na Meri Shiddat-e-Ahsaas Mujhe,

Main Kisi Bazm Ke Qaabil Na Raha Tere Baad,
Hans Pada Hoon To Hua Jurm Ka Ahsaas Mujhe,

Hum Ne Ek Doosre Ko Pursa-e-Furqat Na Diya,
Meri Khaatir Thi Tujhe Aur Tera Paas Mujhe,

Ek Thehra Hua Dariya Hai Meri Aankho'n Mein,
Jaane Kis Ghaat Pe Maaregi Teri Pyaas Mujhe,

Jaise Pahloo-e-Tarb Mein Koi Nashtar Rakh De,
Aaj Tak Yaad Hai Teri Nigaah-e-Yaas Mujhe,

Reza Reza Hua Jaata Hai Mera Sang-e-Wajood,
Yoon Sada De Na Pas-e-Parda-e-Infaas Mujhe,

Shaakh Se Barg-e-Chakeeda Ka Taqaaza Jaise,
Kuch Isi Tarah Abhi Tak Hai Teri Aas Mujhe,

Rooh Ke Dasht Mein Ek Hu Ka Samaa'n Hai Ai shaaz, 
De Gaya Kaun Bhare Shahar Mein Banbaas Mujhe..!!

Shaaz Tamkanat

کیا کروں رنج گوارا نہ خوشی راس مجھے
جینے دے گی نہ مری شدت احساس مجھے
میں کسی بزم کے قابل نہ رہا تیرے بعد
ہنس پڑا ہوں تو ہوا جرم کا احساس مجھے
ہم نے اک دوسرے کو پرسۂ فرقت نہ دیا
میری خاطر تھی تجھے اور ترا پاس مجھے
ایک ٹھہرا ہوا دریا ہے مری آنکھوں میں
جانے کس گھاٹ پہ مارے گی تری پیاس مجھے
جیسے پہلوئے طرب میں کوئی نشتر رکھ دے
آج تک یاد ہے تیری نگہ یاس مجھے
ریزہ ریزہ ہوا جاتا ہے مرا سنگ وجود
یوں صدا دے نہ پس پردۂ انفاس مجھے
شاخ سے برگ چکیدہ کا تقاضا جیسے
کچھ اسی طرح ابھی تک ہے تری آس مجھے
روح کے دشت میں اک ہو کا سماں ہے اے شاذ
ؔدے گیا کون بھرے شہر میں بن باس مجھے..

شاذؔ تمکنت