Hazaar khwab liye ji rahi hain sab aankhein,
Tere bina hain magar meri be-sabab aankhein...
Chamakte chaand sitaaro gawah tum rahna,
Lagi rahi hain falak se tamaam shab aankhein...
Tumhaare saamne rahti hain neem-wa humdam,
Haya-shanaas bahut hain ye ba-adab aankhein...
Bas ek deed ki hasrat saja ke palkon par,
Milengi tum se khyaalon mein be-talab aankhein...
Sila diya hai mohabbat ka tum ne ye kaisa,
Masarrato'n mein bhi rone lagi hain ab aankhein.!!
"Indira Varma"
Abhi se kaise kahun tum ko bewafa saahab..
Abhi to apne safar ki hai ibtida saahab.!
Na jaane kitne laqab de raha hai dil tum ko..
Huzoor, jaan-e-wafa aur hum-nawa saahab.!
Tumhaari yaad mein taare shumaar karti hun..
Na jaane khatm kahaan ho ye silsila saahab.!
Kitaab-e-zeest ka unwaan ban gaye ho tum..
Humare pyar ki dekho ye intiha saahab.!
Tumhaara chehra mere aks se ubharta hai..
Na jaane kaun badalta hai aaina saahab.!
Rah-e-wafa mein zara ahtiyaat laazim hai..
Har ek gaam pe hota hai haadsa saahab.!
Siyah raat hai mahtab ban ke aa jao..
Ye 'indira' ke labo'n par hai iltija saahab.!
"Indira Varma"
Abhi se kaise kahun tum ko bewafa saahab..
Abhi to apne safar ki hai ibtida saahab.!
Na jaane kitne laqab de raha hai dil tum ko..
Huzoor, jaan-e-wafa aur hum-nawa saahab.!
Tumhaari yaad mein taare shumaar karti hun..
Na jaane khatm kahaan ho ye silsila saahab.!
Kitaab-e-zeest ka unwaan ban gaye ho tum..
Humare pyar ki dekho ye intiha saahab.!
Tumhaara chehra mere aks se ubharta hai..
Na jaane kaun badalta hai aaina saahab.!
Rah-e-wafa mein zara ahtiyaat laazim hai..
Har ek gaam pe hota hai haadsa saahab.!
Siyah raat hai mahtab ban ke aa jao..
Ye 'indira' ke labo'n par hai iltija saahab.!
"Indira Varma"
Kaash wo pahli mohabbat ke zamane aate..
Chaand se log mera chaand sajaane aate.!
Raqs karti hui phir baad-e-bahaara'n aati..
Phool le kar wo mujhe khud hi bulane aate.!
Un ki tahreer mein alfaaz wahi sab hote..
Yoon bhi hota ke kabhi khat bhi purane aate.!
Un ke haathon mein kabhi pyar ka parcham hota..
Mere roothe hue jazbaat manane aate.!
Baarishon mein wo dhanak aisi nikalti ab ke..
Jis se mausam mein wahi rang suhane aate.!
Wo bahaaron ka samaa'n aur wo gul-posh chaman..
Aise maahaul mein wo dil hi dukhane aate.!
Har taraf dekh rahe hain mere hum-umr khyaal..
Rah takti hui aankhon ko sulane aate.!!
"Indira Varma"
Ye shafaq chaand sitaare nahin achchhe lagte..
Tum nahin ho to nazaare nahin achchhe lagte.!
Gahre paani mein zara aao utar kar dekhein..
Hum ko dariya ke kinaare nahin achchhe lagte.!
Roz akhbaar ki jalti hui surkhi padh kar..
Shahr ke log tumhaare nahin achchhe lagte.!
Dard mein doobi faza aaj bahut hai shayad..
Ghum-zada raat hai taare nahin achchhe lagte.!
Meri tanhaai se kah do ke sahaara chhode..
Zindagi bhar ye sahaare nahin achchhe lagte.!!
"Indira Varma"
Shafaq ke rang nikalne ke baad aai hai,
Ye shaam dhoop mein chalne ke baad aai hai.!
Ye raushni tere kamre mein khud nahin aai,
Shama ka jism pighalne ke baad aai hai.!
Isi tarah se rakho band meri aankhein ab,
Ke neend khwab badalne ke baad aai hai.!
Yaqeen hai ke kabhi be-asar nahin hogi,
Dua labo'n pe machalne ke baad aai hai.!
Nadi jo pyar se bahti hai regzaaron mein,
Ye pattharon mein uchhalne ke baad aai hai.!
Thi jis bahaar ki uljhan tamaam muddat se,
Wo 'indira' ke bahalne ke baad aai hai.!!
"Indira Varma"
Mujhe rang de na suroor de mere dil mein khud ko utaar de..
Mere lafz saare mahak uthein mujhe aisi koi bahaar de.!
Mujhe dhoop mein tu qareeb kar mujhe saaya apna naseeb kar..
Meri nik'haton ko urooj de mujhe phool jaisa waqaar de.!
Meri bikhri haalat-e-zaar hai na to chain hai na qaraar hai..
Mujhe lams apna nawaaz ke mere jism o jaan ko nikhaar de.!
Teri rah kitni taweel hai meri zeest kitni qaleel hai..
Mera waqt tera aseer hai mujhe lamha lamha sanwaar de.!
Mere dil ki duniya udaas hai na to hosh hai na hawaas hai..
Mere dil mein aa ke thehar kabhi mere saath umr guzaar de.!
Meri neend moonis-e-khwab kar meri rat-jagon ka hisaab kar..
Mere naam fasl-e-gulaab kar kabhi aisa mujh ko bhi pyaar de.!
Shab-e-ghum andheri hai kis qadar, karun kaise subah ka main safar..
Mere chaand aa meri le khabar, mujhe raushni ka hisaar de.!!
"Indira Varma"
