Asar Us Ko Zara Nahin Hota

Asar us ko zara nahin hota,
Ranj rahat-faza nahin hota,

Bewafa kahne ki shikayat hai,
To bhi waada-wafa nahin hota,

Zikr-e-aghyaar se hua maloom,
Harf-e-naaseh bura nahin hota,

Kis ko hai zauq-e-talkh-kaami lek,
Jang bin kuchh maza nahin hota,

Tum humare kisi tarah na hue,
Warna duniya mein kya nahin hota,

Us ne kya jaane kya kiya le kar,
Dil kisi kaam ka nahin hota,

Imtihaan kijiye mera jab tak,
Shauq zor-aazma nahin hota,

Ek dushman ke charkh hai na rahe,
Tujh se ye ai dua nahin hota,

Aah tool-e-amal hai roz-fuzoon,
Garche ek muddaa nahin hota,

Tum mere paas hote ho goya,
Jab koi dusra nahin hota,

Haal-e-dil yaar ko likhun kyunkar,
Haath dil se juda nahin hota,

Rahm bar-khasm-e-jaan-e-ghair na ho,
Sab ka dil ek sa nahin hota,

Daaman us ka jo hai daraaz to ho,
Dast-e-aashiq rasa nahin hota,

Chaara-e-dil siwaye sabr nahin,
So tumhaare siwa nahin hota,

Kyun sune arz-e-muztar ai 'Momin'
Sanam aakhir khuda nahin hota.!!

"Momin Khan Momin"
___
Zauq-e-talkh-kaami = ability to enjoy bitterness,
Zor-aazma = making effort, to try,
Charkh = Sky,
Tool-e-amal = longitude of desire,
Roz-e-fuzoon = numerous days,
Bar-khasm-e-jaan-e-ghair = on life of others antagonists ( in law)
Rasa = reached, delivered,

Thaani Thi Dil Mein Ab Na Milenge Kisi Se Hum

Thaani thi dil mein ab na milenge kisi se hum,
Par kya karein ke ho gaye na-chaar ji se hum,

Hanste jo dekhte hain kisi ko kisi se hum,
Munh dekh dekh rote hain kis bekasi se hum,

Hum se na bolo tum ise kya kahte hain bhala,
Insaaf kijiye poochhte hain aap hi se hum,

Be-zaar jaan se jo na hote to maangte,
Shahid shikayaton pe teri muddaii se hum,

Us koo mein ja marenge madad ai hujoom-e-shauq,
Aaj aur zor karte hain be-taaqati se hum,

Saahab ne is ghulaam ko aazad kar diya,
Lo bandagi ke chhoot gaye bandagi se hum,

Be-roye misl-e-abr na nikla ghubaar-e-dil,
Kahte the un ko barq-e-tabassum hansi se hum,

In na-tawaniyon pe bhi the khaar-e-rah-e-ghair,
Kyun kar nikaale jaate na us ki gali se hum,

Kya gul khilega dekhiye hai fasl-e-gul to door,
Aur su-e-dasht bhaagte hain kuchh abhi se hum,

Munh dekhne se pahle bhi kis din wo saaf tha,
Be-wajah kyun ghubaar rakhein aarsi se hum,

Hai chhed ikhtilaat bhi ghairon ke saamne,
Hansne ke badle royein na kyun gudgudi se hum,

Wahshat hai ishq-e-parda-nasheen mein dam-e-buka,
Munh dhaankte hain parda-e-chashm-e-pari se hum,

Kya dil ko le gaya koi begana-aashna,
Kyun apne ji ko lagte hain kuchh ajnabi se hum,

Le naam aarzu ka to dil ko nikaal lein,
'Momin' na hon jo rabt rakhein bid'ati se hum.!!

"Momin Khan Momin"
___
Muddaii = appellant,
Aarsi = Mirror,
Ikhtilaat = union, amity, concord,
Dam-e-buka = time of Weeping, lamentation,
Bid'ati = one introducing a new concept in religion,