Ab Ye Bhi Nahin Ke Naam To Lete Hain

Ab ye bhi nahin ke naam to lete hain,
Daaman faqat ashkon se bhigo lete hain..

Ab hum tera naam le ke rote bhi nahin,
Sunte hain tera naam to ro lete hain.!! 

"Faani Badayuni"

Zabt Apna Shiaar Tha, Na Raha

Zabt apna shiaar tha, na raha,
Dil pe kuchh ikhtiyaar tha, na raha..

Dil-e-marhoom ko khuda bakhshe,
Ek hi ghum-gusaar tha, na raha..

Aa ke waqt-e-sukoon-e-marg aaya,
Naala na-khush-gawaar tha, na raha..

Un ke be-mehriyon ko kya maloom,
Koi ummid-waar tha, na raha..

Aah ka aitibaar bhi kab tak,
Aah ka aitibaar tha, na raha..

Kuchh zamane ko sazgaar sahi,
Jo hamein sazgaar tha, na raha..

Ab garebaan kahin se chaak nahin,
Shughl-e-fasl-e-bahaar tha, na raha..

Maut ka intizaar baqi hai,
Aap ka intizaar tha, na raha..

Mehrbaan ye mazaar-e-'Faani' hai,
Aap ka jaan-nisaar tha, na raha.!!

"Faani Badayuni"

Yaan Hosh Se Be-zaar Hua Bhi Nahin Jaata

Yaan hosh se be-zaar hua bhi nahin jaata,
Us bazm mein hushyaar hua bhi nahin jaata,

Kahte ho ke hum waada-e-pursish nahin karte,
Ye sun ke to beemar hua bhi nahin jaata, 

Dushwaari-e-inkaar se taalib nahin darte, 
Yun sahl to iqrar hua bhi nahin jaata,

Aate hain ayaadat ko to karte hain naseehat,
Ahbaab se ghum-khwar hua bhi nahin jaata,

Jaate hue khaate ho meri jaan ki qasmein,
Ab jaan se be-zaar hua bhi nahin jaata,

Ghum kya hai agar manzil-e-jaanaa hai bahut door,
Kya khaak-e-rah-e-yaar hua bhi nahin jaata,

Dekha na gaya us se tadapte hue dil ko,
Zaalim se jafa-kaar hua bhi nahin jaata,

Ye turfa sitam hai ke sitam bhi hai karam bhi,
Ab khugar-e-aazaar hua bhi nahin jaata.!! 

"Faani Badayuni"
__________

Turfa = strange, agreeable, wonderful, rare,
Khugar-e-aazaar = habituated to sorrow,

Wo Poochhte Hain Hijr Mein Hai Iztiraab Kya

Wo poochhte hain hijr mein hai iztiraab kya,
Hairaan hun ke dun unhein is ka jawaab kya,

Dil aur wo bhi sirf mera dardmand dil,
Teri nigaah ne ye kiya intikhaab kya,

Jaati nahin khalish aalam-e-rozgaar ki,
Ai aasman hua wo tera inqilaab kya,

Nazzara-e-jamaal ki yaan taab hi nahin,
Ai barq-e-husn chahiye tujh ko naqaab kya,

Waada bhi kar lo waada pe yaan aa bhi jao tum,
Ye sab sahi tumhaari nahin ka jawaab kya,

Besh-az-gumaan khwaab nahin fursat-e-hayat,
'Faani' tum is khyaal ko samjhe ho khwaab kya.!!

"Faani Badayuni"
__________

Besh-az-gumaan = before imagination, thought,

Teri Tirchhi Nazar Ka Teer Hai Mushkil Se Niklega

Teri tirchhi nazar ka teer hai mushkil se niklega,
Dil is ke saath niklega agar ye dil se niklega,

Shab-e-ghum mein bhi meri sakht-jaani ko na maut aai,
Tera kaam ai ajal ab khanjar-e-qaatil se niklega,

Nigah-e-shauq mera muddaa tu un ko samjha de,
Mere munh se to harf-e-arzu mushkil se niklega,

Kahaan tak kuchh na kahiye ab to naubat jaan tak pahunchi,
Takalluf-bar-taraf ai zabt naala dil se niklega,

Tasawwur kya tera aaya qayamat aa gayi dil mein,
Ke ab har walwala baahar mazaar-e-dil se niklega,

Na aayenge wo tab bhi dil nikal hi jayega 'Faani',
Magar mushkil se niklega badi mushkil se niklega.!!

"Faani Badayuni"

Rah Jaaye Ya Bala Se Ye Jaan Rah Na Jaaye

Rah jaaye ya bala se ye jaan rah na jaaye,
Tera to ai sitam-gar armaan rah na jaaye,

Jo dil ki hasratein hain sab dil mein hon to behtar,
Is ghar se koi baahar mehmaan rah na jaaye,

Iqraar-e-wasl to hai aisa na ho na aayen,
Mushkil humari ho kar aasaan rah na jaaye,

Ai soz-e-gham jala de ai dard khoon rula de,
Kuchh un ki dil-lagi ka samaan rah na jaaye,

Sab manzilein huyin tay mahshar hai aur ai dil,
Ye ek rah gaya hai maidaan rah na jaaye,

Wo jaam-e-kufr-parwar bhar de ke mast kar de,
Masto'n ke dil mein saaqi imaan rah na jaaye,

Aa kar palat na khaali ai marg jaan le ja,
'Faani' ke sar pe tera ahsaan rah na jaaye.!!

"Faani Badayuni"

Qasam Na Khao Taghaful Se Baaz Aane Ki

Qasam na khao taghaful se baaz aane ki,
Ke dil mein ab nahin taaqat sataye jaane ki,

Humari maut ne kuchh mukhtasar kiya warna,
Kuchh intiha hi na thi ishq ke fasane ki,

Giri na barq kuchh is khauf se mere hote,
Tadap ke aag bujha dun na aashiyane ki,

Tumhaara dard to darmaa'n bana liya hum ne,
Ab aur sochiye tadbeer dil dukhane ki,

Zamana kufr-e-mohabbat se kar chuka tha gurez,
Teri nazar ne palat di hawa zamane ki,

Palat palat ke qafas hi ki samt jaata hun, 
Kiisi ne raah bataai na aashiyane ki,

Najaat di ghum-e-duniya se dard-e-dil ne mujhe,
Ye ek raah mili ghum se chhoot jaane ki,

Wo subah-e-eid ka manzar tere tasawwur mein,
Wo dil mein aa ke ada tere muskurane ki,

Bata raha hai har andaaz khaak-e-'Faani' ka,
Ye khaak hai usi kaafir ke aastane ki.!!

"Faani Badayuni"

Naam Badnaam Hai Na-haq Shab-e-tanhaai Ka

Naam badnaam hai na-haq shab-e-tanhaai ka,
Wo bhi ek rukh hai teri anjuman-aaraai ka,

Aa chala hai mujhe kuchh waada-e-farda ka yaqeen,
Dil pe ilzaam na aa jaaye shakebaai ka,

Ab na kaanton hi se kuchh laag na phoolon se lagaaw,

Hum ne dekha hai tamasha teri raanaai ka,
Donon aalam se guzar kar bhi zamana guzra,
Kuchh thikana bhi hai is baadiya-paimaai ka,

Khud hi betaab tajalli hai azal se koi,
Dekhne ke liye parda hai tamannaai ka,

Lag gayi bheed ye deewana jidhar se guzra,
Ek aalam ko hai sauda tere saudaai ka,

Phir usi kaafir be-mehr ke dar par 'Faani',
Le chala shauq mujhe naasiya-farsaai ka.!! 

"Faani Badayuni"
__________

Shakebaai = patience,
Baadiya-paimaai = wind measurement
जंगलों में मारा-मारा फिरना,
Naasiya-farsaai = writing on the forehead,

Na Ibtida Ki Khabar Hai Na Intiha Maloom

Na ibtida ki khabar hai na intiha maloom,
Raha ye wahm ke hum hain so wo bhi kya maloom,

Dua to khair dua se ummid-e-khair bhi hai,
Ye muddaa hai to anjaam-e-muddaa maloom,

Hua na raaz-e-raza faash wo to ye kahiye, 
Mere naseeb mein thi warna saii-e-na-maloom,

Meri wafa ke siwa ghayat-e-jafa kyun ho,
Teri jafa ke siwa haasil-e-wafa maloom,

Kuchh un ke raham pe thi yun hi zindagi mauqoof,
Ke un ko raaz-e-mohabbat bhi ho gaya maloom,

Tere khyal ke asraar be-khudi mein khule,
Humin chhupa na sake warna dil ko kya maloom,

Fareb-e-aman mein kuchh maslahat to hai warna,
Sukoon-e-kashti o taufeeq-e-nakhuda maloom,

Wo iltifaat ke tha us ki intiha bhi hai,
Khuda ki maar ke dil ko yahi na tha maloom,

Ye zindagi ki hai rudad-e-mukhtasar 'Faani',
Wajood-e-dard musallam ilaaj na-maloom.!!

"Faani Badayuni"
__________

Raaz-e-raza = secret of agreement,
Saii-e-na-maloom = unknown effort,
Ghayat-e-jafa = purpose of rigidness,
Mauqoof = depend upon,
Asraar = Secrets,
Iltifaat = kindness/ attention,

Mere Lab Par Koi Dua Hi Nahin

Mere lab par koi dua hi nahin,
Is karam ki kuchh intiha hi nahin,

Kashti-e-aitibaar tod ke dekh,
Ke khuda bhi hai nakhuda hi nahin,

Meri hasti gawaah hai ke mujhe,
Tu kisi waqt bhoolta hi nahin,

Ab use na-ummid kyun kahiye,
Dil ko taufeeq-e-muddaa hi nahin,

Ghum mein lazzat kahaan ke dil na raha, 
Haye wo hasrat-aashna hi nahin,

Wahi tu hai wahi teri mahfil,
Ek 'Faani'-e-mubtala hi nahin.!! 

"Faani Badayuni"

Maya-e-naaz-e-raaz Hain Hum Log

Maya-e-naaz-e-raaz hain hum log,
Mahram-e-raaz-e-naaz hain hum log,

Bazm-e-dil mein diya na aish ko baar,
Saahib-e-imtiyaaz hain hum log,

Hum se milti hai barq-e-toor ko daad,
Wo tabassum-nawaaz hain hum log,

Aql aajiz hai be-khabar hai hosh,
Chashm-e-bad-door raaz hain hum log,

Hashr-e-ummid se muraad hain hum,
Gila-ha-e-daraaz hain hum log,

Teri naaz-aafreeniyan hain gawaah,
Ke sarapa niyaaz hain hum log,

Husn be-jalwa kuchh sahi 'Faani',
Jalwa-e-jalwa-saaz hain hum log.!!

"Faani Badayuni"
__________

Maya-e-naaz-e-raaz = wealth, proud keeper of secrets,
Mahram-e-raaz-e-naaz = confidant of secrets of beloved, coquettry,
Baar = load/ burden,
Saahib-e-imtiyaaz = man of distinction,
Gila-ha-e-daraaz = long-standing complaint,
Naaz-aafreeniyan = pampering, coquetry,
Jalwa-e-jalwa-saaz = appearance, effulgence of One who makes all appearances,

Mar Ke Toota Hai Kahin Silsila-e-qaid-e-hayat

Mar ke toota hai kahin silsila-e-qaid-e-hayat,
Magar itna hai ki zanjeer badal jaati hai..

Asar-e-ishq taghaful bhi hai bedaad bhi hai,
Wahi taqseer hai tazeer badal jaati hai..

Kahte kahte mera afsana gila hota hai,
Dekhte dekhte taqdeer badal jaati hai..

Roz hai dard-e-mohabbat ka nirala andaaz,
Roz dil mein teri tasveer badal jaati hai..

Ghar mein rahta hai tere dam se ujala hi kuchh aur,
Mah o khurshid ki tanweer badal jaati hai,

Ghum naseebon mein hai 'Faani' ghum-e-duniya ho ke ishq,
Dil ki taqdeer se tadbeer badal jaati hai.!!

"Faani Badayuni"
__________

Taghaful = neglect,
Bedaad = tyranny,
Taqseer = error, crime, sin,
Tazeer = punishment, reprimand, penalty,
Tasveer = illuminating, illumination, enlightening,
Tadbeer = advice, solution, arrangement, order,

Lutf O Karam Ke Putle Ho Ab Qahr O Sitam Ka Naam Nahin

Lutf o karam ke putle ho ab qahr o sitam ka naam nahin,
Dil pe khuda ki maar ke phir bhi chain nahin aaram nahin,

Jitne munh hain utni baatein dil ka pata kya khaak chale,
Jis ne dil ki chori ki hai ek usi ka naam nahin,

Jalwa o dil mein farq nahin jalwe ko hi ab dil kahte hain,
Yaani ishq ki hasti ka aaghaz to hai anjaam nahin,

Ruk ke jo saansein aayin gayin maana ke wo aahein thin lekin,
Aap ne tewar kyun badle aahon mein kisi ka naam nahin,

Ishq ke aazaari bhi kahin mar jaane se ji jaate hain,
Le ye tasalli rahne de ai maut ye tera kaam nahin,

Kab se padi hain dil mein tere zikr ki saari raahein band,

Barson guzre is basti mein rasm-e-salaam-o-payaam nahin,

Had thi ye betaabi-e-dil ki jaaniye ab kya hona hai,
Sabr ki had bhi hone aai subah nahin ya shaam nahin,

Dil pe apna bas nahin chalta un ki shikayat kya kijiye,
Aap hum apne dushman thehre dost pe kuchh ilzaam nahin,

Dil se kisi ki aankhon tak kuchh raaz ki baatein pahunchi hain,
Aankh se dil tak aaya ho aisa to koi paighaam nahin,

Naz'a mein 'Faani' tu ne ye kis ka chupke chupke naam liya,
Kyun o kaafir teri zabaan par ab bhi khuda ka naam nahin.!!

"Faani Badayuni"

Kya Chhupate Kisi Se Haal Apna

Kya chhupate kisi se haal apna,
Ji hi jab ho gaya nidhhaal apna,

Hum hain us ke khyaal ki tasveer,
Jis ki tasveer hai khyaal apna,

Wo bhi ab ghum ko ghum samajhte hain,
Door pahuncha magar malaal apna,

Tu ne rakh li gunahgaar ki sharm,
Kaam aaya na infiaal apna,

Dekh dil ki zameen larazti hai,
Yaad-e-jaanaa qadam sambhaal apna,

Ba-khabar hain wo sab ki haalat se,
Laao hum poochh lein na haal apna,

Maut bhi to na mil saki 'Faani',
Kis se poora hua sawaal apna.!!

"Faani Badayuni"

Khalq Kahti Hai Jise Dil Tere Deewane Ka

Khalq kahti hai jise dil tere deewane ka,
Ek gosha hai ye duniya isi veerane ka,

Ek mu'amma hai samajhne ka na samjhane ka,
Zindagi kaahe ko hai khwab hai deewane ka,

Husn hai zaat meri ishq sifat hai meri,
Hun to main shama magar bhes hai parwane ka,

Kaabe ko dil ki ziyarat ke liye jaata hun,
Aastaana hai haram mere sanam-khane ka,

Mukhtasar qissa-e-ghum ye hai ke dil rakhta hun,
Raaz-e-kaunain khulasa hai is afsaane ka,

Zindagi bhi to pashemaan hai yahaan la ke mujhe,
Dhundhti hai koi heela mere mar jaane ka,

Tum ne dekha hai kabhi ghar ko badalte hue rang,
Aao dekho na tamasha mere ghum-khane ka,

Ab ise daar pe le ja ke sula de saaqi,
Yun bahakna nahin achchha tere mastane ka,

Dil se pahunchi to hain aankhon mein lahu ki boondein,
Silsila sheeshe se milta to hai paimaane ka,

Haddiyaqn hain kayi lipti hui zanjeeron mein,
Liye jaate hain janaza tere deewane ka,

Wahdat-e-husn ke jalwon ki ye kasrat ai ishq,
Dil ke har zarre mein aalam hai pari-khane ka,

Chashm-e-saaqi asar-e-mai se nahin hai gul-rang,
Dil mere khoon se labrez hai paimaane ka,

Lauh dil ko ghum-e-ulfat ko qalam kahte hain,
Kun hai andaaz-e-raqam husn ke afsane ka,

Hum ne chhaani hain bahut dair o haram ki galiyaan,
Kahin paaya na thikana tere deewane ka,

Kis ki aankhein dam-e-akhir mujhe yaad aai hain,
Dil muraqqa hai chhalakte hue paimaane ka,

Kahte hain kya hi maze ka hai fasana 'Faani',
Aap ki jaan se door aap ke mar jaane ka,

Har nafas umr-e-guzishta ki hai mayyat 'Faani',
Zindagi naam hai mar mar ke jiye jaane ka.!!

"Faani Badayuni"

Jeene Ki Hai Ummid Na Marne Ka Yaqeen Hai

Jeene ki hai ummid na marne ka yaqeen hai,
Ab dil ka ye aalam hai na duniya hai na deen hai,

Gum hain rah-e-tasleem mein taalib bhi talab bhi,
Sajda hi dar-e-yaar hai sajda hi jabeen hai,

Kuchh maz'har-e-baatin hun to kuchh mahram-e-zaahir,
Meri hi wo hasti hai ke hai aur nahin hai,

iiza ke siwa lazzat-e-iiza bhi milegi,
Kyun jalwa-gaah-e-hosh yahaan dil bhi kahin hai,

Mayoos sahi hasrati-e-maut hun 'Faani',
Kis munh se kahun dil mein tamanna hi nahin hai.!!

Faani Badayuni"
__________

Rah-e-tasleem = the way of those who agree,
Maz'har-e-baatin = manifestation of latent, inner self,
Mahram-e-zaahir = manifest confidante,
iiza = annoyance, harm, pain,
Jalwa-gaah-e-hosh = place of manifestation of reason,

Jab Pursish-e-haal Wo Farmaate Hain Jaaniye Kya Ho Jaata Hai

Jab pursish-e-haal wo farmaate hain jaaniye kya ho jaata hai,
Kuchh yun bhi zabaan nahin khulti kuchh dard siwa ho jaata hai..

Ab khair se un ki bazm ka itna rang to badla mere baad,
Jab naam mera aa jaata hai kuchh zikr-e-wafa ho jaata hai..

Yakta-e-zamana hone par saahab ye ghuroor khudaai ka,
Sab kuchh ho magar khaakam-ba-dahan kya koi khuda ho jaata hai..

Qatra qatra rahta hai dariya se juda rah sakne tak,
Jo taab-e-judaai la na sake wo qatra fana ho jaata hai..

Phir dil se 'Faani' saare ke saare naqsh-e-jafa mit jaate hain,
Jis waqt wo zaalim saamne aa kar jaan-e-haya ho jaata hai.!!

"Faani Badayuni"
__________

Yakta-e-zamana = one of a kind, unique in period, time,
Khaakam-ba-dahan = may dust be in my mouth-exclamation,

Jab Dil Mein Tere Ghum Ne Hasrat Ki Bina Daali

Jab dil mein tere ghum ne hasrat ki bina daali,
Duniya meri raahat ki qismat ne mita daali,

Ab barq-e-nasheman ko har shaakh se kya matlab,
Jis shaakh ko taaka tha wo shaakh jala daali,

Izhaar-e-mohabbat ki hasrat ko khuda samjhe,
Hum ne ye kahani bhi sau baar suna daali,

Jeene bhi nahin dete marne bhi nahin dete,
Kya tum ne mohabbat ki har rasm utha daali,

Jeene mein na ab 'Faani' marne mein shumaar apna,
Maatam ki bisaat us ne kya kah ke utha daali.!!

"Faani Badayuni"

Hum Maut Bhi Aaye To Masroor Nahin Hote

Hum maut bhi aaye to masroor nahin hote,
Majboor-e-ghum itne bhi majboor nahin hote..

Dil hi mein nahin rahte aankhon mein bhi rahte ho,
Tum door bhi rahte ho to door nahin hote.. 

Padti hain abhi dil par sharmaai hui nazrein,
Jo waar wo karte hain bharpoor nahin hote..

Ummid ke waadon se ji kuchh to bahalta tha,
Ab ye bhi tere ghum ko manzoor nahin hote..

Arbaab-e-mohabbat par tum zulm ke baani ho,
Ye warna mohabbat ke dastoor nahin hote..

Kaunain pe bhaari hai Allah re ghuroor un ka,
Itne bhi ada waale maghroor nahin hote..

Hai ishq tera 'Faani' tashheer bhi shohrat bhi,
Ruswa-e-mohabbat yun mashhoor nahin hote.!!

"Faani Badayuni"

Be-zauq-e-nazar Bazm-e-tamasha Na Rahegi

Be-zauq-e-nazar bazm-e-tamasha na rahegi,
Munh pher liya hum ne to duniya na rahegi,

Eeza na rahegi jo gawara na rahegi,
Chheda mujhe duniya ne to duniya na rahegi,

Dil le ke ye kya zid hai ke ab jaan bhi kyun ho,
Ye e bhi na rahegi bahut achchha na rahegi,

Ye dard-e-mohabbat ghum-e-duniya to nahin hai,
Ab maut bhi jeene ka sahaara na rahegi, 

Aisa bhi koi din meri qismat mein hai 'Faani',
Jis din mujhe marne ki tamanna na rahegi.!! 

"Faani Badayuni"