Ek Umr Sunayen, [ two lines poetry ]

* Two Lines Poetry *
_____

Ek umr sunayen to hikayat na ho poori, 
Do roz mein hum par jo yahaan beet gayi haI.!!

"Habeeb Jalib"

Ek Teri Yaad Se, [ two lines poetry ]

* Two Lines Poetry *
_____

Ek teri yaad se ik tere tasawwur se hamein,
Aa gaye yaad kayi naam haseenao ke.!!

"Habeeb Jalib"

Zulf Ki Baat Kiye Jaate Hain

* Qitaa *
__________

Zulf ki baat kiye jaate hain,
Din ko yun raat kiye jaate hain..

Chand aansu hain inhen bhi 'Jalib'
Nazr-e-haalaat kiye jaate hain.!!

"Habeeb Jalib"

Teri Basti Mein Jidhar Se Guzre

* Qitaa *
__________

Teri basti mein jidhar se guzre,
Haye kya log nazar se guzre..

Kitni yaadon ne humein thaam liya,
Hum jo is rahguzar se guzre.!!

"Habeeb Jalib"

So Gaye Anjum-e-shab Yaad Na Aa

* Qitaa *
__________

So gaye anjum-e-shab yaad na aa,
Ai meri jaan-e-tarab yaad na aa..

Meri pathraai hui aankhon mein,
Koi aansu nahin ab yaad na aa.!!

"Habeeb Jalib"

Sabza-zaaron Mein Guzar Tha Apna

* Qitaa *
__________

Sabza-zaaro'n mein guzar tha apna,
Mast o shadaab nagar tha apna..

Jab uthaata hai koi mahfil se,
Yaad aata hai ke ghar tha apna.!!

"Habeeb Jalib"

Rang O Bu-e-gulaab Kah Lunga

* Qitaa *
__________

Rang o bu-e-gulaab kah lunga,
Mauj-e-jaam-e-sharaab kah lunga..

Log kahte hain tera naam na lun,
Main tujhe mahtaab kah lunga.!!

"Habeeb Jalib"

Muddaten Ho Gayin Khata Karte

* Qitaa *
__________

Muddaten ho gayin khata karte,
Sharm aati hai ab dua karte..

Chaand taare bhi un ka ai 'Jalib',
Thartharaate hain saamna karte.!!

"Habeeb Jalib"

Meri Nigaah Se Wo Dekhte Rahe Hain Mujhe

* Qitaa *
__________

Meri nigaah se wo dekhte rahe hain mujhe,
Raha hun main bhi kabhi us nigaah ka me'aar..

Yahaan na talkh-nawaai se kaam lo 'Jalib',
Raheen-e-dard nahin hain bastiyan ye dayaar.!!

"Habeeb Jalib"
__________

Raheen-e-dard = pledged, indebted, beholden to grief, sorrow,

Jahaan Aasaan Tha Din Ko Raat Karna

* Qitaa *
__________

Jahaan aasaan tha din ko raat karna, 
Wo galiyaan ho gayi hain ek sapna..

Ab un ki yaad hai palkon pe raushan,
Ab un ko kah nahin sakte hum apna.!!

"Habeeb Jalib"

Ghum Ke Saanche Mein Dhhal Sako To Chalo

* Qitaa *
__________

Ghum ke saanche mein dhhal sako to chalo,
Tum mere saath chal sako to chalo..

Door tak teergi mein chalna hai,
Surat-e-shama jal sako to chalo.!!

"Habeeb Jalib"

Doob Jaayega Aaj Bhi Khurshid

* Qitaa *
__________

Doob jaayega aaj bhi khurshid,
Aaj bhi tum nazar na aaoge..

Beet jaayegi is tarah har shaam,
Zindagi bhar humein rulaoge.!!

"Habeeb Jalib"

Ashk Aankhon Mein Ab Hain Aaye Se

* Qitaa *
__________

Ashk aankhon mein ab hain aaye se,
Baat chhupti nahin chhupaye se..

Apni baatein kahein to kis se kahein,
Sab yahaan log hain paraye se.!!

"Habeeb Jalib"

Abhi Ai Dost Zauq-e-shaairi Hai Wajah Ruswaai

* Qitaa *
__________

Abhi ai dost zauq-e-shaairi hai wajah ruswaai,
Teri basti mein hum par aur bhi ilzaam aayenge..

Agar ab bhi humara saath tu ai dil nahin dega,
To hum is shahar mein tujh ko akela chhorh jaayenge.!!

"Habeeb Jalib"

Sada Aa Rahi Hai

* Nazm *
___________

Sada aa rahi hai mare dil se paiham...

Ke hoga har ek dushman-e-jaan ka sar kham..

Nahin hai nizaam-e-halakat mein kuchh dam,
Zarurat hai insaan ki amn-e-aalam..

Fazaon mein lahrayega surkh parcham,

Sada aa rahi hai mere dil se paiham..

Na zillat ke saaye mein bachche palenge, 
Na haath apne qismat ke haathon malenge..

Musawat ke deep ghar ghar jalenge,
Sab ahl-e-watan sar utha ke chalenge..

Na hogi kabhi zindagi waqf-e-maatam,
Fazaon mein lahrayega surkh parcham.!!

"Habeeb Jalib"

Tez Chalo

* Nazm *
__________

Ye kah raha hai dil-e-be-qaraar, tez chalo,
Bahut udaas hain zanjeer o daarz tez chalo..

Jo thak gaye hain unhein gard-e-raah rahne do,
Kisi ka ab na karo intizaar, tez chalo..

Khizaa'n ki shaam kahaan tak rahegi saaya-fagan,
Bahut qareeb hai subah-e-bahaar, tez chalo..

Tumhi se khauf-zada hain zameen o zar waale,
Tumhi ho chashm-e-sitam-gar pe baar, tez chalo..

Karo khuloos o mohabbat ko rahnuma apna,
Nahin durust dilon mein ghubaar, tez chalo..

Bahut hain hum mein yahaan log guftugu-pesha,
Hai un ka sirf yahi karobaar, tez chalo..

Khirad ki sust-rawi se kise mili manzil,
Junoon hi ab to karo ikhtiyaar, tez chalo.!!

"Habeeb Jalib"

Shahr-e-zulmaat Ko Sabaat Nahin

Ai nizaam-e-kohan ke farzando..
Ai shab-e-taar ke jigar-bando..

Ye shab-e-taar jawedaa'n to nahin,
Ye shab-e-taar jaane waali hai..

Ta-ba-kai teergi ke afsaane,
Subah-e-nau muskurane waali hai..

Ai shab-e-taar ke jigar-gosho..
Ai sahar-dushmano sitam-gosho..

Subah ka aaftaab chamkega,
Toot jaayega jahl ka jaadu..

Phail jaayegi in dayaaron mein,
ilm-o-daanish ki raushni har-su..

Ai shab-e-taar ke nigahbaano..
Shama-e-ahd-e-ziyaa'n ke parwaano..

Shahar-e-zulmaat ke sana-khwano..

Shahar-e-zulmaat ko sabaat nahin,
Aur kuchh der subah par hans lo..

Aur kuchh der koi baat nahin.!!

"Habeeb Jalib"
__________

Nizaam-e-kohan = old system,
Jawedaa'n = eternal, everlasting, perpetual,
Ta-ba-kai = upto, कब तक,
Jigar-gosho = dears or beloveds, darlings,
Sitam-gosho = opressors,
Shama-e-ahd-e-ziyaa'n = lamp of age of loss,
Sana-khwano = praise-reciters/those who praise,
Sabaat = stability, durability,

Naam Kya Lun

* Nazm *
__________

Ek aurat jo mere liye muddaton,
Shama ki tarah aansu bahaati rahi..

Meri khaatir zamane se munh mod kar,
Mere hi pyaar ke geet gaati rahi..

Mere ghum ko muqaddar banaue hue,

Muskuraati rahi..

Us ke ghum ki kabhi main ne parwa na ki,
Us ne har haal mein naam mera liya..

Chheen kar us ke honthon ki main ne hansi,
Teri dahleez par apna sar rakh diya..

Tu ne meri tarah mera dil tod kar,

Mujh pe ahsaan kiya.!!

"Habeeb Jalib"

Warna Thaane Chalo

* Nazm *
__________

Qasr-e-shaahi se ye hukm saadir hua ladkaane chalo,

Warna thaane chalo...

Apne honthon ki khushbu lutaane chalo,
Geet gaane chalo,

Warna thaane chalo...

Muntazir hain tumhaare shikaari wahaan,
Kaif ka hai samaa'n,

Apne jalwaon se mahfil sajaane chalo,
Muskurane chalo,

Earna thaane chalo...

Haakimon ko bahut tum pasand aai ho,
Zehn par chhaai ho,

Jism ki lau se shaamein jalaane chalo,
Ghum bhulane chalo,

Warna thaane chalo.!!

"Habeeb Jalib"

Mulaqaat

* Nazm *
__________

Jo ho na saki baat wo chehron se ayaa'n thi,
Haalaat ka maatam tha mulaqaat kahaan thi.

Us ne na theharne diya pahron mere dil ko,
Jo teri nigahon mein shikayat meri jaan thi..

Ghar mein bhi kahaan chain se soye the kabhi hum,
Jo raat hai zindaan mein wahi raat wahaan thi..

Yaksaa'n hain meri jaan qafas aur nasheman,
Insana ki tauqeer yahaan hai na wahaan thi..

Shaaho'n se jo kuchh rabt na qaayem hua apna,
Aadat ka bhi kuchh jabr tha kuchh apni zaban thi..

Sayyaad ne yunhi to qafas mein nahin daala,
Mashhoor gulistaan mein bahut meri fughaa'n thi,

Tu ek haqeeqat hai meri jaan meri humdam,
Jo thi meri ghazlon mein wo ek wahm-o-gumaa'n thi,

Mahsoos kiya main ne tere ghum se ghum-e-dahr,
Warna mere ash'aar mein ye baat kahaan thi.!!

"Habeeb Jalib"