Ye Tujh Se Aashna Duniya Se Begane Kahaan Jaate

Ye tujh se aashna duniya se begane kahaan jaate..

Tere kooche se uthte bhi to deewane kahaan jaate.!

Qafas mein bhi mujhe sayyaad ke haathon se milte hain..

Meri taqdeer ke likkhe hue daane kahaan jaate.!

Na chhoda zabt ne daaman nahin to tere saudaai..

Hujoom-e-ghum se ghabra kar khuda jaane kahaan jaate.!

Main apne aansuon ko kaise daaman mein chhupa leta..

Jo palkon tak chale aaye wo afsaane kahaan jaate.!

Tumhaare naam se mansoob ho jaate hain deewane..

Ye apne hosh mein hote to pahchane kahaan jaate.!

Agar koi hareem-e-naaz ke parde utha deta..

To phir kaaba kahaan rahta sanam-khaane kahaan jaate.!

Nahin tha mustahiq 'Makhmoor' rindon ke siwa koi..

Na hote hum to phir labrez paimaane kahaan jaate.!!

"Makhmoor Dehlvi"

Tum Se Waabasta Hai Meri Maut Meri Zindagi

Tum se waabasta hai meri maut meri zindagi,
Jism se apne kabhi saaya juda hota nahin..

Is tarah fariyaad karne ko kaleja chahiye,
Ab koi gulshan mein mera hum-nawa hota nahin..

Wo mohabbat-aafreen deta hai hasb-e-zarf-e-ishq,
Phir kisi se bhi talab-gaar-e-wafa hota nahin..

Ek takhayyul hai ke jis mein mahw hai mera dimaagh,
Ek tasawwur ye jo aankhon se juda hota nahin..

saii-e-fahm-e-zaat-e-baari aur ye mahdood aql,
Jis ka haasil kuchh bhi hairat ke siwa hota nahin..

Ashraf-ul-makhlooq kahte hain usi majboor ko,
Jis ka koi kaam be-dast-e-dua hota nahin..

Jitne armaan dil mein the 'Makhmoor' sab maujood hain,
Ek bhi to apne markaz se juda hota nahin.!!

"Makhmoor Dehlvi"

Rukh Har Ek Teer-e-nazar Ka Hai Mere Dil Ki Taraf

Rukh har ek teer-e-nazar ka hai mere dil ki taraf,
Aane waale aa rahe hain apni manzil ki taraf...

Doobne waale ki mayoosi pe dil tharra gaya,
Kis nigah-e-yaas se dekha tha saahil ki taraf...

Sach hai ek ujdi hui duniya ke kya lail-o-nahaar,
Tum se bhi ab to na dekha jayega dil ki taraf...

Kis fasurda-khaatiri se raat bhar jalti rahi,
Der tak dekha kiye hum shamm-e-mahfil ki taraf...

Apni marzi se nahin apne iraade se nahin,
Har musafir ke qadam uthte hain manzil ki taraf...

Tum ko kya maloom kya banti hai dil par ishq mein,
Aaina le kar zara dekho muqabil ki taraf... 

Ho gaya 'Makhmoor' raaz-e-zindagi ka inkishaaf,
Mauj aati hai fana hone ko saahil ki taraf.!!

"Makhmoor Dehlvi"
__________

lail-o-nahaar = night and day,
Fasurda-khaatiri = melancholic temperament,
Inkishaaf = disclosure, exposition,

Kise Apna Banayen Koi Is Qaabil Nahin Milta

Kise apna banayen koi is qaabil nahin milta,

Yahaan patthar bahut milte hain lekin dil nahin milta...

Nohabbat ka sila isaar ka haasil nahin milta,

Wo nazrein baar-ha milti hain lekin dil nahin milta...

Tumhaara roothna tamheed thi afsana-e-ghum ki,

Zamana ho gaya hum se mizaaj-e-dil nahin milta... 

Jahaan tak dekhta hun main jahaan tak main ne samjha hai,

Koi tere siwa ta'areef ke qaabil nahin milta...

Haram ki manzilein hon ya sanam-khane ki raahein hon,

Khuda milta nahin jab tak maqaam-e-dil nahin milta...

Musafir apni manzil par pahunch kar chain paate hain,

Wo maujein sar patakti hain jinhein saahil nahin milta...

Hum apna ghum liye baithe hain us bazm-e-tarab mein bhi,

Kisi naghme se ab 'Makhmoor' saaz-e-dil nahin milta.!!

"Makhmoor Dehlvi"
__________

Isaar = sacrifice, selflessness,
Tamheed = preamble, preface, introduction, excuse,
Bazm-e-tarab = Gathering Of Happiness,

Kise Apna Banayen Koi Is Qaabil Nahin Milta

Kise apna banayen koi is qaabil nahin milta,

Yahaan patthar bahut milte hain lekin dil nahin milta...

Nohabbat ka sila isaar ka haasil nahin milta,

Wo nazrein baar-ha milti hain lekin dil nahin milta...

Tumhaara roothna tamheed thi afsana-e-ghum ki,

Zamana ho gaya hum se mizaaj-e-dil nahin milta... 

Jahaan tak dekhta hun main jahaan tak main ne samjha hai,

Koi tere siwa ta'areef ke qaabil nahin milta...

Haram ki manzilein hon ya sanam-khane ki raahein hon,

Khuda milta nahin jab tak maqaam-e-dil nahin milta...

Musafir apni manzil par pahunch kar chain paate hain,

Wo maujein sar patakti hain jinhein saahil nahin milta...

Hum apna ghum liye baithe hain us bazm-e-tarab mein bhi,

Kisi naghme se ab 'Makhmoor' saaz-e-dil nahin milta.!!

"Makhmoor Dehlvi"

Khuda Jab Tak Na Chaahe Aadmi Se Kuchh Nahin Hota

Khuda jab tak na chaahe aadmi se kuchh nahin hota,

Mujhe maloom hai meri khushi se kuchh nahin hota...

Mohabbat jazba-e-isaar se parwaan chadhti hai,

Khuloos-e-dil na ho to dosti se kuchh nahin hota...

Wahaan tera karam tera bharosa kaam aata hai,

Jahaan majboor ho kar aadmi se kuchh nahin hota...

Ziya-e-shams bhi maujood hai noor-e-qamar bhi hai,

Basirat hi na ho to raushni se kuchh nahin hota...

Gharaz tere siwa har ek ko majboor paata hun,

Bharosa jis pe karta hun usi se kuchh nahin hota...

Khud apne haal se uljhe hue hain tere deewane,

Hanse jaaye zamane ki hansi se kuchh nahin hota...

Mohabbat bad-gumaan ho jaaye to zinda nahin rahti,

Asar dil par tumhaari be-rukhi se kuchh nahin hota.!!

"Makhmoor Dehlvi"
__________

Jazba-e-isaar = appeal of sacrifice,
Basirat = sight, prudence, intelligence,

Hazaar Ranj Ho Dil Laakh Dard-mand Rahe

Hazaar ranj ho dil laakh dard-mand rahe, 
Khyaal past na ho hausla buland rahe...

Ghum-e-firaaq mein dil kyun na dard-mand rahe,
Bahaar aa ke gayi hum qafas mein band rahe...

Khuda ki yaad mein duniya ko bhool ja ai dil,
Wo kaam kar ke har ek taraf sood-mand rahe...

Mile ke kuchh na mile maangne se kaam rakhun,
Teri janaab mein dast-e-dua buland rahe...

Dikhaain gardish-e-dauraa'n ne suratein kya kya,
Magar mujhe to akele tumhin pasand rahe...

Ghuroor-e-husn unhein inkisaar-e-shewa-e-ishq,
Wo be-niyaaz rahe hum niyaaz-mand rahe...

Janaab-e-shaikh bhi 'Makhmoor' shab ko rindo'n mein,
Ajib haal se masroof-e-wa'az-o-pand rahe.!!

"Makhmoor Dehlvi"
__________

Masroof-e-wa'az-o-pand = engaged in preaching and moralising,

Dui Ka Tazkira Tauheed Mein Paaya Nahin Jaata

Dui ka tazkira tauheed mein paaya nahin jaata,
Jahaan meri rasaai hai mera saaya nahin jaata...

Mere toote hue pa-e-talab ka mujh pe ahsaan hai,
Tumhaare dar se uth kar ab kahin jaaya nahin jaata...

Mohabbat ho to jaati hai mohabbat ki nahin jaati,
Ye shola khud bhadak uthta hai bhadkaya nahin jaata...

Faqeeri mein bhi mujh ko maangne se sharm aati hai,
Sawaali ho ke mujh se hath phailaya nahin jaata...

Chaman tum se ibarat hai bahaarein tum se zinda hain,
Tumhaare saamne phoolon se murjhaya nahin jaata...

Mohabbat ke liye kuchh khaas dil makhsoos hote hain,
Ye wo naghma hai jo har saaz par gaaya nahin jaata...

Mohabbat asl mein 'Makhmoor' wo raaz-e-haqeeqat hai,
Samajh mein aa gaya hai phir bhi samjhaya nahin jaata.!!

"Makhmoor Dehlvi"
__________

Dui = duality/ pairing,
Tauheed = declaring God to be one, unitarianism,
Pa-e-talab = feet of request/demand,
Ibarat = composition, mode of expression, passage of a book,

Dalaail Se Khuda Tak Aql-e-insaani Nahin Jaati

Dalaail se khuda tak aql-e-insaani nahin jaati,
Wo ek aisi haqeeqat hai jo pahchani nahin jaati...

Ise to raah mein arbaab-e-himmat chhod dete hain,
Kisi ke saath manzil tak tan-aasani nahin jaati...

Kise milti hain wo aankhein mohabbat mein jo roti hain,
Mubarak hain wo aansu jin ki arzaani nahin jaati...

Ubharta hi nahin dil doob kar bahr-e-mohabbat mein,
Jab aa jaati hai is dariya mein tughyani nahin jaati...

Gadaai mein bhi mujh par shaan-e-istighna barasti hai,
Mere sar se hawa-e-taaj-e-sultaani nahin jaati...

Muqeem-e-dil hain wo armaan jo poore nahin hote,
Ye wo aabaad ghar hai jis ki veerani nahin jaati...

Kuchh aisa partaw-e-husn-e-azal ne kar diya raushan,
Qayamat tak to ab zarron ki taabani nahin jaati,

Kuchh aise barguzida log bhi hain jin ke haathon se,
Chhuda kar apna daaman pak-daamani nahin jaati...

Hujoom-e-yaas mein bhi zindagi par muskuraata hun,
Musibat mein bhi meri khanda-peshaani nahin jaati.!!

"Makhmoor Dehlvi"
__________

Tughyani = over-flowing, deluge, inundation, flood,
Shaan-e-istighna = the majesty of the contented,
Partaw-e-husn-e-azal = reflection of eternal beauty,
Burgazida = old, aged,
Hujoom-e-yaas = mob of despair,
Khanda-peshaani = cheerful, of smiling countena-nce, having cheerful appearance,