Tum Ne Sach Bolne Ki Jur'at Ki

Tum ne sach bolne ki jur'at ki,
Ye bhi tauheen hai adalat ki,

Manzilein raston ki dhool huin,
Poochhte kya ho tum masafat ki,

Apna zaad-e-safar bhi chhorh gaye,
Jaane waalon ne kitni ujlat ki,

Main jahaan qatl ho raha hun wahaan,
Mere ajdaad ne hukumat ki,

Pahle mujh se juda hua aur phir,
Aks ne aaine se hijrat ki,

Meri aankhon pe us ne haath rakha,
Aur ek khwaab ki mahurat ki,

Itna mushkil nahin tujhe paana,
Ek ghadi chahiye hai fursat ki,

Hum ne to khud se intiqaam liya,
Tum ne kya soch kar mohabbat ki,

Kaun kis ke liye tabaah hua,
Kya zarurat hai is wazahat ki,

Ishq jis se na ho saka us ne,
Shaairi mein ajab siyasat ki,

Yaad aai to hai shanaakht magar,
Intiha ho gayi hai ghaflat ki,

Hum wahaan pahle rah chuke hain 'Salim',
Tum ne jis dil mein ab sukoonat ki.!!

"Saleem Kausar"

Tujh Se Badh Kar Koi Pyara Bhi Nahin Ho Sakta

Tujh se badh kar koi pyara bhi nahin ho sakta,
Par tera saath gawara bhi nahin ho sakta,

Raasta bhi ghalat ho sakta hai manzil bhi ghalat,
Har sitara to sitara bhi nahin ho sakta,

Paanw rakhte hi phisal sakta hai mitti ho ke ret,
Har kinara to kinara bhi nahin ho sakta,

Us tak aawaaz pahunchni bhi badi mushkil hai,
Aur na dekhe to ishaara bhi nahin ho sakta,

Tere bandon ki maeeshat ka ajab haal hua,
Aish kaisa ke guzara bhi nahin ho sakta,

Apna dushman hi dikhaai nahin deta ho jise,
Aisa lashkar to saf-aara bhi nahin ho sakta,

Pahle hi lazzat-e-inkaar se waaqif nahin jo,
Us se inkaar dobara bhi nahin ho sakta,

Husn aisa ke chaka-chaund hui hain aankhein,
Hairat aisi ke nazzara bhi nahin ho sakta,

Chaliye wo shakhs humara to kabhi tha hi nahin,
Dukh to ye hai ki tumhaara bhi nahin ho sakta,

Duniya achchhi bhi nahin lagti hum aison ko 'Salim',
Aur duniya se kinara bhi nahin ho sakta.!!

"Saleem Kausar"

Qurbatein Hote Hue Bhi Faaslon Mein Qaid Hain

Qurbatein hote hue bhi faaslon mein qaid hain,
Kitni aazadi se hum apni hadon mein qaid hain,

Kaun si aankhon mein mere khwaab raushan hain abhi,
Kis ki neendein hain jo mere ratjagon mein qaid hain,

Shahar aabaadi se khaali ho gaye khushbu se phool,
Aur kitni khwahishein hain jo dilon mein qaid hain,

Paanw mein rishton ki zanjeerein hain dil mein khauf ki,
Aisa lagta hai ke hum apne gharon mein qaid hain,

Ye zameen yunhi sikudti jayegi aur ek din,
Phail jayenge jo tufaan saahilon mein qaid hain,

Is jazeere par azal se khaak udti hai hawa,
Manzilon ke bhed phir bhi raaston mein qaid hain,

Kaun ye paataal se ubhra kinaare par 'Salim',
Sar-phiri maujein abhi tak daayeron mein qaid hain.!!

"Saleem Kausar"

Main Use Tujh Se Mila Deta Magar Dil Mere

Main use tujh se mila deta magar dil mere,
Mere kuchh kaam nahin aaye wasaail mere,

Wo junoon-khez masafat thi ki dekha hi nahin,
Umr bhar paanw se lipti rahi manzil mere,

Tu mila hai to nikal aaye hain dushman saare,
Waqt kis kis ko utha laya muqaabil mere,

Abr-e-girya ne wo tufana uthaye ab ke,
Mere dariyaon ko kam pad gaye saahil mere,

Jitna hal karta hun utna hi bigad jaate hain,
Tu nahin jaanta ai dost masaail mere,

Ishq mein haar ke maani hi badal jaate hain,
Tujh ko maloom nahin hai abhi qaatil mere,

Be-ant safar mera muqaddar hai 'Salim',
Mujh mein tay karta hai ye kaun maraahil mere.!!

"Saleem Kausar"

Kabhi Sitaare Kabhi Kahkashaan Bulata Hai

Kabhi sitaare kabhi kahkashaan bulata hai,
Humein wo bazm mein apni kahaan bulata hai,

Na jaane kaun si uftaad aa padi hai ke jo,
Hum ahl-e-ishq ko kaar-e-jahaan bulata hai,

Ye kaisa dam-e-rihaai bichha diya us ne,
Zameen pakadti hai aur aasman bulata hai,

Gali gali mein aqeedon bhari dukaanein hain,
Qadam qadam pe naya aastaan bulata hai,

Bhatak gaye hain magar gum nahin hue hain kahin,
Abhi humein jaras-e-karwaan bulata hai,

Ye aag lagne se pahle ki baaz-gasht hai jo,
Bujhaane waalon ko ab tak dhuan bulata hai,

Ummeed tootne lagti hai jab bhi koi 'Salim',
To ek yaqeen pas-e-wahm-o-gumaan bulata hai.!!

"Saleem Kausar"
___
Uftaad = accident, distress, calamity, difficulties,
Daam-e-rihaai = chain of release,
Aqeedon = beliefs,
Aastaan = abode, threshold, shrine,
Jaras-e-karwaan = sound of caravan,
Baaz-gasht = turning back, returning, return, retreat,
Pas-e-wahm-o-gumaan = beyong whims and imagination, fancy,

Kahin Tum Apni Qismat Ka Likha Tabdeel Kar Lete

Kahin tum apni qismat ka likha tabdeel kar lete,
To shayad hum bhi apna raasta tabdeel kar lete,

Agar hum waaqai kam-hausla hote mohabbat mein,
Maraz badhne se pahle hi dawa tabdeel kar lete,

tumhaare saath chalne par jo dil raazi nahin hota,
Bahut pahle hum apna faisla tabdeel kar lete,

Tumhein in mausamon ki kya khabar milti agar hum bhi,
Ghutan ke khauf se aab o hawa tabdeel kar lete,

Tumhaari tarah jeene ka hunar aata to phir shayad,
Makaan apna wahi rakhte pata tabdeel kar lete,

Wahi kirdaar hain taaza kahani mein jo pahle bhi,
Kabhi chehra kabhi apni qaba tabdeel kar lete,

Judaai bhi na hoti zindagi bhi sahl ho jaati,
Jo hum ek dusre se mas'ala tabdeel kar lete,

Hamesha ki tarah is baar bhi hum bol uthe warna,
Gawaahi dene waale waqia tabdeel kar lete,

Bahut dhundhla gaya yaadon ki rim-jhim mein dil-e-saada,
Wo mil jaata to hum ye aaina tabdeel kar lete.!!

"Saleem Kausar"

Lau Ko Chhoone Ki Hawas Mein Ek Chehra Jal Gaya

Lau ko chhoone ki hawas mein ek chehra jal gaya,
Shama ke itne qareeb aaya ke saya jal gaya,

Pyaas ki shiddat thi sairaabi mein sahra ki tarah,
Wo badan paani mein kya utra ke dariya jal gaya,

Kya ajab kaar-e-tahayyur hai supurd-e-naar-e-ishq,
Ghar mein jo tha bach gaya aur jo nahin tha jal gaya,

Garmi-e-deedar aisi thi tamasha-gah mein,
Dekhne waalon ki aankhon mein tamasha jal gaya,

Khud hi Khakistar kiya us ne mujhe aur us ke baad,
Mujh se khud hi poochhta hai bol kya kya jal gaya,

Sirf yaad-e-yaar baqi rah gayi dil mein 'Salim',
Ek ek kar ke sabhi asbaab-e-duniya jal gaya.!!

"Saleem Kausar"

Main Khyaal Hun Kisi Aur Ka Mujhe Sochta Koi Aur Hai

Main khyaal hun kisi aur ka mujhe sochta koi aur hai,
Sar-e-aaina mera aks hai pas-e-aaina koi aur hai,

Main kisi ke dast-e-talab mein hun to kisi ke harf-e-dua mein hun,
Main naseeb hun kisi aur ka mujhe maangta koi aur hai,

Ajab aitebaar o be-aitebaari ke darmiyan hai zindagi,
Main qareeb hun kisi aur ke mujhe jaanta koi aur hai,

Meri raushni tere khadd-o-khaal se mukhtalif to nahin magar,
Tu qareeb aa tujhe dekh lun tu wahi hai ya koi aur hai,

Tujhe dushmanon ki khabar na thi mujhe doston ka pata nahin,
Teri dastaan koi aur thi mera waqia koi aur hai,

Wahi munsifon ki riwayatein wahi faislon ki ibaratein,
Mera jurm to koi aur tha par meri saza koi aur hai,

Kabhi laut aayen to poochhna nahin dekhna unhein ghaur se,
Jinhen raaste mein khabar hui ke ye rasta koi aur hai,

Jo meri riyazat-e-neem-shab ko 'Salim' subah na mil saki,
To phir is ke maani to ye hue ki yahaan khuda koi aur hai.!!

"Saleem Kausar"