Khul Kar Aakhir Jahl Ka Elaan Hona Chahiye

Khul kar aakhir jahl ka elaan hona chahiye,
Haq-paraston ke liye zindaan hona chahiye...

Is watan mein muqtadir hone ki pahli shart hai,
Aadmi ke roop mein shaitaan hona chahiye...

Aap jaiso'n ko riaaya jhelti hai kis tarah,
Aap ko to soch kar hairaan hona chahiye...

Neem mulla khatra-e-imaan hota hai agar,
Poora mulla ghaasib-e-imaan hona chahiye...

Dil se sharminda hun ye ash'aar jo main ne kahe,
Aap ke aizaaz mein deewaan hona chahiye.!!

"Fariha Naqwi"
__________

Jahl = ignorance,
Muqtadir = powerful, strong, able,
Ghaasib-e-imaan = plunderer of belief,
Aijaaz = honour, respect, esteem,

Ise Bhi Chhorhun Use Bhi Chhorhun Tumhein Sabhi Se Hi Mas'ala Hai

Ise bhi chhorhun use bhi chhorhun tumhein sabhi se hi mas'ala hai,

Meri samajh se to baala-tar hai ye pyar hai ya muaahida hai...

"Jo tu nahin thi to aur bhi the jo tu na hogi to aur honge", 

Kisi ke dil ko jala ke kahte ho meri jaan ye muhawara hai...

Hum aaj qaus-e-quzah ke maanind ek dooje pe khil rahe hain,

Mujhe to pahle se lag raha tha ye aasmanon ka silsila hai...

Wo apne apne tamaam saathi, tamaam mahboob le ke aayen,

To mere haathon mein haath de de humein bhi izn-e-mubahla hai...

Are o jaao! yoon sar na khao! humara us se muqabla kya?

Na wo zaheen-o-fateen yaaro na wo haseen hai na shayera hai.!!

"Fariha Naqwi"

Beete Khwab Ki Aadi Aankhein Kaun Unhein Samjhaye

Beete khwab ki aadi aankhein kaun unhein samjhaye,

Har aahat par dil yoon dhadke jaise tum ho aaye...

Zid mein aa kar chhod rahi hai un baanhon ke saaye,

Jal jaayegi mom ki gudiya duniya dhoop-saraye...

Shaam hui to ghar ki har ek shay par aa kar jhapte,

Aangan ki dahleez pe baithe veeraani ke saaye...

Har ek dhadkan dard ki gahri tees mein dhhal jaati hai,

Raat gaye jab yaad ka panchhi apne par phailaye...

Andar aisa habs tha main ne khol diya darwaza,

Jis ne dil se jaana hai wo khamoshi se jaaye...

Kis kis phool ki shadaabi ko maskh karoge bolo,

Ye to us ki den hai jis ko chaahe wo mahkaye.!!

"Fariha Naqwi"
__________

Habs = suffocation,
Maskh = distortion, mutilation,

Tumhein Pata Hai, Mere Haath Ki Lakeeron Mein

Tumhein Pata Hai, Mere Haath Ki Lakeeron Mein..
Tumhaare Naam Ke Saare Huroof Bante Hai.!!

"Fariha Naqwi"

De Rahe Hain Log Mere Dil Pe Dastak Baar Baar

De rahe hain log mere dil pe dastak baar baar,
Dil magar ye kah raha hai sirf tu aur sirf tu.!

"Fariha Naqwi"

Wo Agar Ab Bhi Koi Ahd Nibhana Chaahe

Wo agar ab bhi koi ahd nibhana chaahe,
Dil ka darwaza khula hai jo wo aana chaahe,

Ain mumkin hai use mujh se mohabbat hi na ho,
Dil bahar-taur use apna banana chaahe, 

Din guzar jaate hain qurbat ke naye rangon se,
Raat par raat hai wo khwaab purana chaahe,

Ek nazar dekh mujhe, meri ibaadat ko dekh,
Bhool payega agar mujh ko bhulana chaahe,

Wo khuda hai to bhala us se shikayat kaisi?
Muqtadir hai wo sitam mujh pe jo dhaana chaahe,

Khoon umad aaya ibaarat mein, waraq cheekh uthe, 
Main ne wahshat mein tere khat jo jalana chaahe,

Noch daalungi use ab ke yahi socha hai,
Gar meri aankh koi khwaab sajaana chaahe.!!

"Fariha Naqwi"
___
Muqtadir = powerful, strong, able,

Use Bhoolne Ka Sitam Kar Rahe Hain

Use bhoolne ka sitam kar rahe hain,
Hum apni aziyat ko kam kar rahe hain,

Humari nigaahon se sapne chura kar,
Wo kis ki nigaahon mein zam kar rahe hain,

Hayat-e-rawaan ki har ek na-rawaai,
Hum apne lahu se raqam kar rahe hain,

Bhali kyun lage hum ko khushiyon ki dastak,
Abhi hum mohabbat ka ghum kar rahe hain,

Kise dukh sunayein sabhi to yahaan par,
Shumaar apne apne alam kar rahe hain,

Sukhan ko siyasat ka zeena dikha kar,
Tamasha ye ahl-e-qalam kar rahe hain.!!

"Fariha Naqwi"

Tumhein Paane Ki Haisiyyat Nahin Hai

Tumhein paane ki haisiyyat nahin hai,
Magar khone ki bhi himmat nahin hai,

Bahut socha bahut socha hai main ne,
Judaai ke siwa surat nahin hai,

Tumhein roka to ja sakta hai lekin,
Mere a'asaab mein quwwat nahin hai,

Mere ashko mere be-kaar ashko!!
Tumhaari ab use haajat nahin hai,

Abhi tum ghar se baahar mat nikalna,
Tumhaari hosh ki haalat nahin hai,

Dua kya dun bhala jaate hue main,
Tumhein takne se hi fursat nahin hai,

Mohabbat kam na hogi yaad rakhna!!
Ye badhti hai, ke ye daulat nahin hai,

Zamane ab tere madd-e-muqaabil,
Koi kamzor si aurat nahin hai.!!

"Fariha Naqwi"

Shanasaai Ka Silsila Dekhti Hun

Shanasaai ka silsila dekhti hun,
Ye tum ho ke main aaina dekhti hun,

Hatheli se thanda dhuan uth raha hai,
Yahi khwaab har martaba dekhti hun,

Badhe ja rahi hai ye raushan-nigaahi,
Khurafaat-e-zulmat-kada dekhti hun,

Mere hijr ke faisle se daro tum,
Main khud mein ajab hausla dekhti hun.!

"Fariha Naqwi"

Laakh Dil Ne Pukaarna Chaha

Laakh dil ne pukaarna chaha,
Main ne phir bhi tumhein nahin roka,

Tum meri wahshaton ke saathi the,
Koi aasan tha tumhein khona?

Tum mera dard kya samajh paate,
Tum ne to sheyr tak nahin samjha,

Kya kisi khwaab ki talaafi hai?
Aankh ki dhajjiyon ka ud jaana,

Is se raahat kasheed kar, din raat,
Dard ne mustaqil nahin rahna,

Aap ke mashwaron pe chalna hai?
Achchha suniye main saans le lun kya?

Khwaab mein amrita ye kahti thi,
In se koi sila nahin beta,

Dekh tezaab se jale chehre,
Hum hain aise samaaj ka hissa,

Ladkhadaana nahin mujhe phir bhi,
Tum mera haath thaam kar rakhna,

Warisaan-e-ghum-o-alam hain hum,
Hum saloni kitaab ka qissa,

Sun meri bad-gumaan pari, sun to,
Har koi bhediya nahin hota.!!

"Fariha Naqwi"

Ai Meri Zaat Ke Sukoon Aa Ja

Ai Meri Zaat Ke Sukoon Aa Ja,
Tham Na Jaaye Kahin Junoo'n Aa Ja.!

Raat Se Ek Soch Mein Gum Hoon,
Kis Bahaane Tujhe Kahoon Aa Ja.!

Haath Jis Mod Par Chhudaya Tha,
Main Wahin Par Hoon Sar-nigoon Aa Ja.!

Yaad Hai Surkh Phool Ka Tohfa.?
Ho Chala Wo Bhi Neelgoon Aa Ja.!

Chaand Taaron Se Kab Talak Aakhir,
Teri Baatein Kiya Karoon Aa Ja.!

Apni Wahshat Se Khauf Aata Hai,
Kab Se Veeraan Hai Androon Aa Ja.!

Is Se Pahle K Main Aziyat Mein,
Apni Aankhon Ko Noch Loon Aa Ja.!

Dekh, Main Yaad Kar Raha Hoon Tujhe,
Phir Main Ye Bhi Na Kar Sakoon Aa Ja.!!

"Fariha Naqwi"