Ana Hawas Ki Dukaanon Mein Aa Ke Baith Gayi

Ana hawas ki dukaanon mein aa ke baith gayi,
Ajeeb maina hai shikron mein aa ke baith gayi..

Jaga raha hai zamana magar nahin khultin,
Kahaan ki neend in aankhon mein aa ke baith gayi..

Wo faakhta jo mujhe dekhte hi udti thi,
Bade saleeqe se bachchon mein aa ke baith gayi..

Tamaam talkhiyan saaghar mein raqs karne lagin,
Tamaam gard kitaabon mein aa ke baith gayi..

Tamaam shahar mein mauzu-e-guftugu hai yahi,
Ke shahzaadi ghulaamon mein aa ke baith gayi..

Nahin thi doosri koi jagah bhi chhupne ki,
Humari umr khilaunon mein aa ke baith gayi..

Utho ke os ki boondein jaga rahi hain tumhein,
Chalo ke dhoop dareechon mein aa ke baith gayi..

Chali thi dekhne suraj ki bad-mizaaji ko,
Magar ye os bhi phoolon mein aa ke baith gayi..

Tujhe main kaise bataaun ke shaam hote hi,
Udaasi kamre ke taaqo'n mein aa ke baith gayi.!!

"Munawwar Rana"
____________________

Shikron = falcons,
____________________

انا ہوس کی دکانوں میں آ کے بیٹھ گئی
عجیب مینا ہے شکروں میں آ کے بیٹھ گئی.. 

جگا رہا ہے زمانہ مگر نہیں کھلتیں
کہاں کی نیند ان آنکھوں میں آ کے بیٹھ گئی..

وہ فاختہ جو مجھے دیکھتے ہی اڑتی تھی
بڑے سلیقے سے بچوں میں آ کے بیٹھ گئی..

تمام تلخیاں ساغر میں رقص کرنے لگیں
تمام گرد کتابوں میں آ کے بیٹھ گئی..

تمام شہر میں موضوع گفتگو ہے یہی
کہ شاہزادی غلاموں میں آ کے بیٹھ گئی..

نہیں تھی دوسری کوئی جگہ بھی چھپنے کی
ہماری عمر کھلونوں میں آ کے بیٹھ گئی..

اٹھو کہ اوس کی بوندیں جگا رہی ہیں تمہیں
چلو کہ دھوپ دریچوں میں آ کے بیٹھ گئی..

چلی تھی دیکھنے سورج کی بد مزاجی کو
مگر یہ اوس بھی پھولوں میں آ کے بیٹھ گئی..

تجھے میں کیسے بتاؤں کہ شام ہوتے ہی
اداسی کمرے کے طاقوں میں آ کے بیٹھ گئی..

Hanste Hue Maa baap Ki Gaali Nahin Khaate

Hanste hue maa-baap ki gaali nahin khaate,
Bachche hain to kyun shauq se mitti nahin khaate..

Tum se nahin milne ka iraada to hai lekin,
Tum se na milenge ye qasam bhi nahin khaate..

So jaate hain footpath pe akhbaar bichha kar,
Mazdoor kabhi neend ki goli nahin khaate..

Bachche bhi ghareebi ko samajhne lage shayad,
Ab jaag bhi jaate hain to sahri nahin khaate..

Daawat to badi cheez hai hum jaise qalandar,
Har ek ke paiso'n ki dawa bhi nahin khaate..

Allah ghareebon ka madad-gaar hai 'Rana',
Hum logo'n ke bachche kabhi sardi nahin khaate.!!

"Munawwar Rana"
____________________

ہنستے ہوئے ماں باپ کی گالی نہیں کھاتے
بچے ہیں تو کیوں شوق سے مٹی نہیں کھاتے..

تم سے نہیں ملنے کا ارادہ تو ہے لیکن
تم سے نہ ملیں گے یہ قسم بھی نہیں کھاتے..

سو جاتے ہیں فٹ پاتھ پہ اخبار بچھا کر
مزدور کبھی نیند کی گولی نہیں کھاتے..

بچے بھی غریبی کو سمجھنے لگے شاید
اب جاگ بھی جاتے ہیں تو سحری نہیں کھاتے..

دعوت تو بڑی چیز ہے ہم جیسے قلندر
ہر ایک کے پیسوں کی دوا بھی نہیں کھاتے..

اللہ غریبوں کا مددگار ہے راناؔ
ہم لوگوں کے بچے کبھی سردی نہیں کھاتے..

Kabhi Khushi Se Khushi Ki Taraf Nahin Dekha

Kabhi khushi se khushi ki taraf nahin dekha..
Tumhaare baad kisi ki taraf nahin dekha.!

Ye soch kar ke tera intizaar laazim hai..
Tamam umr ghadi ki taraf nahin dekha.!

Yahaan to jo bhi hai aab-e-rawaa'n ka aashiq hai..
Kisi ne khushk nadi ki taraf nahin dekha.!

Wo jis ke waaste pardes ja raha hun main..
Bichhadte waqt usi ki taraf nahin dekha.!

Na rok le humein rota hua koi chehra..
Chale to mud ke gali ki taraf nahin dekha.! 

Bichhadte waqt bahut mutmaeen the hum dono'n..
Kisi ne mud ke kisi ki taraf nahin dekha.!

Rawish buzurgon ki shaamil hai meri ghutti mein..
Zaruratan bhi sakhi ki taraf nahin dekha.!!

"Munawwar Rana"
____________________

کبھی خوشی سے خوشی کی طرف نہیں دیکھا
تمہارے بعد کسی کی طرف نہیں دیکھا..

یہ سوچ کر کہ ترا انتظار لازم ہے
تمام عمر گھڑی کی طرف نہیں دیکھا..

یہاں تو جو بھی ہے آب رواں کا عاشق ہے
کسی نے خشک ندی کی طرف نہیں دیکھا..

وہ جس کے واسطے پردیس جا رہا ہوں میں
بچھڑتے وقت اسی کی طرف نہیں دیکھا..

نہ روک لے ہمیں روتا ہوا کوئی چہرہ
چلے تو مڑ کے گلی کی طرف نہیں دیکھا..

بچھڑتے وقت بہت مطمئن تھے ہم دونوں
کسی نے مڑ کے کسی کی طرف نہیں دیکھا..

روش بزرگوں کی شامل ہے میری گھٹی میں
ضرورتاً بھی سکھی کی طرف نہیں دیکھا..

____________________

कभी ख़ुशी से ख़ुशी की तरफ़ नहीं देखा,
तुम्हारे बा'द किसी की तरफ़ नहीं देखा।

ये सोच कर कि तिरा इंतिज़ार लाज़िम है,
तमाम-उम्र घड़ी की तरफ़ नहीं देखा।

यहाँ तो जो भी है आब-ए-रवाँ का आशिक़ है,
किसी ने ख़ुश्क नदी की तरफ़ नहीं देखा।

वो जिस के वास्ते परदेस जा रहा हूँ मैं,
बिछड़ते वक़्त उसी की तरफ़ नहीं देखा।

न रोक ले हमें रोता हुआ कोई चेहरा,
चले तो मुड़ के गली की तरफ़ नहीं देखा।

बिछड़ते वक़्त बहुत मुतमइन थे हम दोनों,
किसी ने मुड़ के किसी की तरफ़ नहीं देखा।

रविश बुज़ुर्गों की शामिल है मेरी घुट्टी में,
ज़रूरतन भी सखी की तरफ़ नहीं देखा।।

Kaale Kapde Nahin Pahne Hain To Itna Kar Le

Kaale kapde nahin pahne hain to itna kar le,
Ek zara der ko kamre mein andhera kar le..

Ab mujhe paar utar jaane de aisa kar le,
Warna jo aaye samajh mein teri dariya kar le..

Khud-ba-khud raasta de dega ye tufaan mujhe,
Tujh ko paane ka agar dil ye iraada kar le..

Aaj ka kaam tujhe aaj hi karna hoga,
Kal jo karna hai to phir aaj taqaza kar le.. 

Ab bade logo'n se achchhai ki ummid na kar,
Kaise mumkin hai karaila koi meetha kar le..

Gar kabhi rona hi pad jaaye to itna rona,
Aa ke barsaat tere saamne tauba kar le..

Muddaton baad wo aayega humare ghar mein,
Phir se ai dil kisi ummid ko zinda kar le..

Hum-safar laila bhi hogi main tabhi jaaunga,
Mujh pe jitne bhi sitam karne hon sahra kar le.!!

"Munawwar Rana"
____________________

کالے کپڑے نہیں پہنے ہیں تو اتنا کر لے
اک ذرا دیر کو کمرے میں اندھیرا کر لے..

اب مجھے پار اتر جانے دے ایسا کر لے
ورنہ جو آئے سمجھ میں تری دریا کر لے..

خودبخود راستہ دے دے گا یہ طوفان مجھے
تجھ کو پانے کا اگر دل یہ ارادہ کر لے..

آج کا کام تجھے آج ہی کرنا ہوگا
کل جو کرنا ہے تو پھر آج تقاضا کر لے..

اب بڑے لوگوں سے اچھائی کی امید نہ کر
کیسے ممکن ہے کریلا کوئی میٹھا کر لے..

گر کبھی رونا ہی پڑ جائے تو اتنا رونا
آ کے برسات ترے سامنے توبہ کر لے..

مدتوں بعد وہ آئے گا ہمارے گھر میں
پھر سے اے دل کسی امید کو زندہ کر لے..

ہم سفر لیلیٰ بھی ہوگی میں تبھی جاؤں گا
مجھ پہ جتنے بھی ستم کرنے ہوں صحرا کر لے..

Khoon Rulwayegi Ye Jangal-parasti Ek Din

Khoon rulwayegi ye jangal-parasti ek din,
Sab chale jayenge khaali kar ke basti ek din..

Choosta rahta hai ras bhaunra abhi tak dekh lo,
Phool ne bhoole se ki thi sarparasti ek din..

Dene waale ne tabiyat kya ajab di hai use,
Ek din khana-badoshi, ghar-girhasti ek din..

Kaise kaise log dastaaro'n ke maalik ho gaye,
Bik rahi thi shahar mein thodi si sasti ek din..

Tum ko ai veeraniyon shayad nahin maloom hai,
Hum banayenge isi sahra ko basti ek din..

Roz-o-shab hum ko bhi samjhaati hai mitti qabr ki,
Khaak mein mil jayegi teri bhi hasti ek din.!!

"Munawwar Rana"
____________________

خون رلوائے گی یہ جنگل پرستی ایک دن
سب چلے جائیں گے خالی کر کے بستی ایک دن..

چوستا رہتا ہے رس بھونرا ابھی تک دیکھ لو
پھول نے بھولے سے کی تھی سر پرستی ایک دن..

دینے والے نے طبیعت کیا عجب دی ہے اسے
ایک دن خانہ بدوشی گھر گرہستی ایک دن.. 

کیسے کیسے لوگ دستاروں کے مالک ہو گئے
بک رہی تھی شہر میں تھوڑی سی سستی ایک دن..

تم کو اے ویرانیوں شاید نہیں معلوم ہے
ہم بنائیں گے اسی صحرا کو بستی ایک دن.. 

روز و شب ہم کو بھی سمجھاتی ہے مٹی قبر کی
خاک میں مل جائے گی تیری بھی ہستی ایک دن..

Kisi Ghareeb Ki Barson Ki Aarzu Ho Jaaun

Kisi ghareeb ki barso'n ki aarzu ho jaaun,
Main is surang se niklun to aab-ju ho jaaun..

Bada haseen taqaddus hai us ke chehre par,
Main us ki aankhon mein jhaankun to ba-wazu ho jaaun..

Mujhe pata to chale mujh mein aib hain kya kya,
Wo aaina hai to main us ke ru-ba-ru ho jaaun..

Kisi tarah bhi ye veeraniyan hon khatm meri,
Sharaab-khane ke andar ki haaw-hu jaaun. 

Meri hatheli pe honthon se aisi mohr laga,
Ke umr-bhar ke liye main bhi surkh-ru ho jaaun..

Kami zara si bhi mujh mein na koi rah jaaye,
Agar main zakhm ki surat hun to rafu ho jaaun..

Naye mizaaj ke shahro'n mein ji nahin lagta,
Puraane waqto'n ka phir se main lucknow ho jaaun.!!

"Munawwar Rana"
____________________

کسی غریب کی برسوں کی آرزو ہو جاؤں
میں اس سرنگ سے نکلوں تو آب جو ہو جاؤں..

بڑا حسین تقدس ہے اس کے چہرے پر
میں اس کی آنکھوں میں جھانکوں تو با وضو ہو جاؤں..

مجھے پتہ تو چلے مجھ میں عیب ہیں کیا کیا
وہ آئنہ ہے تو میں اس کے روبرو ہو جاؤں.. 

کسی طرح بھی یہ ویرانیاں ہوں ختم مری
شراب خانے کے اندر کی ہاؤ ہو جاؤں..

مری ہتھیلی پہ ہونٹوں سے ایسی مہر لگا
کہ عمر بھر کے لئے میں بھی سرخ رو ہو جاؤں..

کمی ذرا سی بھی مجھ میں نہ کوئی رہ جائے
اگر میں زخم کی صورت ہوں تو رفو ہو جاؤں..

نئے مزاج کے شہروں میں جی نہیں لگتا
پرانے وقتوں کا پھر سے میں لکھنؤ ہو جاؤں..

Kisi Ko Ghar Mila Hisse Mein Ya Koi Dukaan Aai

Kisi ko ghar mila hisse mein ya koi dukaan aai,
Main ghar mein sab se chhota tha mere hisse mein maa aai.!

Yahaan se jaane waala laut kar koi nahin aaya,
Main rota rah gaya lekin na wapas ja ke maa aai.!

Adhoore raaste se lautna achchha nahin hota,
Bulaane ke liye duniya bhi aai to kahaan aai.!

Kisi ko gaanw se pardes le jayegi phir shayad,
Udaati rail-gaadi dhher saara phir dhuaan aai.!

Mere bachchon mein saari aadatein maujood hain meri,
To phir in bad-naseebon ko na kyun urdu zabaan aai.!

Qafas mein mausamo'n ka koi andaaza nahin hota,
Khuda jaane bahaar aai chaman mein ya khizaa'n aai.!

Gharaunde to gharaunde hain chattaanein toot jaati hain,
Udaane ke liye aandhi agar naam-o-nishaan aai.!

Kabhi ai khush-naseebi mere ghar ka rukh bhi kar leti,
Idhar pahunchi udhar pahunchi yahaan aai wahaan aai.!!

"Munawwar Rana"
____________________

کسی کو گھر ملا حصے میں یا کوئی دکاں آئی
میں گھر میں سب سے چھوٹا تھا مرے حصے میں ماں آئی..

یہاں سے جانے والا لوٹ کر کوئی نہیں آیا
میں روتا رہ گیا لیکن نہ واپس جا کے ماں آئی..

ادھورے راستے سے لوٹنا اچھا نہیں ہوتا
بلانے کے لیے دنیا بھی آئی تو کہاں آئی..

کسی کو گاؤں سے پردیس لے جائے گی پھر شاید
اڑاتی ریل گاڑی ڈھیر سارا پھر دھواں آئی..

مرے بچوں میں ساری عادتیں موجود ہیں میری
تو پھر ان بد نصیبوں کو نہ کیوں اردو زباں آئی..

قفس میں موسموں کا کوئی اندازہ نہیں ہوتا
خدا جانے بہار آئی چمن میں یا خزاں آئی..

گھروندے تو گھروندے ہیں چٹانیں ٹوٹ جاتی ہیں
اڑانے کے لیے آندھی اگر نام و نشاں آئی..

کبھی اے خوش نصیبی میرے گھر کا رخ بھی کر لیتی
ادھر پہنچی ادھر پہنچی یہاں آئی وہاں آئی..

Mahfil Mein Aaj Marsiya-khwaani Hi Kyun Na Ho

Mahfil mein aaj marsiya-khwaani hi kyun na ho,
Aankhon se bahne dijiye paani hi kyun na ho...

Nashshe ka ehtimaam se rishta nahin koi,
Paighaam us ka aaye zabaani hi kyun na ho..

Aise ye ghum ki raat guzarna muhaal hai, 
Kuchh bhi suna mujhe wo kahani hi kyun na ho...

Koi bhi saath deta nahin umr-bhar yahaan,
Kuchh din rahegi saath jawani hi kyun na ho...

Is tishnagi ki qaid se jaise bhi ho nikal,
Peene ko kuchh bhi chahiye paani hi kyun na ho...

Duniya bhi jaise taash ke patton ka khel hai,
Joker ke saath rahti hai raani hi kyun na ho...

Tasveer us ki chahiye har haal mein mujhe,
Paagal ho sar-phiri ho deewani hi kyun na ho...

Sona to yaar sona hai chaahe jahaan rahe,
Biwi hai phir bhi biwi puraani hi kyun na ho...

Ab apne ghar mein rahne na denge kisi ko hum,
Dil se nikaal denge nishani hi kyun na ho.!!

"Munawwar Rana"
____________________

محفل میں آج مرثیہ خوانی ہی کیوں نہ ہو
آنکھوں سے بہنے دیجیے پانی ہی کیوں نہ ہو..

نشے کا اہتمام سے رشتہ نہیں کوئی
پیغام اس کا آئے زبانی ہی کیوں نہ ہو..

ایسے یہ غم کی رات گزرنا محال ہے
کچھ بھی سنا مجھے وہ کہانی ہی کیوں نہ ہو..

کوئی بھی ساتھ دیتا نہیں عمر بھر یہاں
کچھ دن رہے گی ساتھ جوانی ہی کیوں نہ ہو..

اس تشنگی کی قید سے جیسے بھی ہو نکال
پینے کو کچھ بھی چاہیے پانی ہی کیوں نہ ہو..

دنیا بھی جیسے تاش کے پتوں کا کھیل ہے
جوکر کے ساتھ رہتی ہے رانی ہی کیوں نہ ہو..

تصویر اس کی چاہیے ہر حال میں مجھے
پاگل ہو سرپھری ہو دوانی ہی کیوں نہ ہو..

سونا تو یار سونا ہے چاہے جہاں رہے
بیوی ہے پھر بھی بیوی پرانی ہی کیوں نہ ہو..

اب اپنے گھر میں رہنے نہ دیں گے کسی کو ہم
دل سے نکال دیں گے نشانی ہی کیوں نہ ہو.. 

Main Is Se Pahle Ke Bikhrun Idhar Udhar Ho Jaaun

Main is se pahle ke bikhrun idhar udhar ho jaaun,
Mujhe sambhaal le mumkin hai dar-ba-dar ho jaaun..

Ye aab-o-taab jo mujh mein hai sab usi se hai,
Agar wo chhod de mujh ko to main khandar ho jaaun..

Meri madad se khajooro'n ki fasl pakne lage,
Main chahta hun ke sahra ki dopahar ho jaaun..

Main aas-paas ke mausam se hun tar-o-taaza,
Main apne jhund se niklun to be-samar ho jaaun..

Badi ajeeb si hiddat hai us ki yaadon mein,
Agar main chhu lun paseene se tar-ba-tar ho jaaun..

Main kachchi mitti ki surat hun tere haathon mein,
Mujhe tu dhhaal de aise ki mo'atabar ho jaaun..

Bachi-khuchi hui saanson ke saath pahunchana,
Suno hawao agar main shikasta-par ho jaaun.!!

"Munawwar Rana"
____________________

میں اس سے پہلے کہ بکھروں ادھر ادھر ہو جاؤں
مجھے سنبھال لے ممکن ہے در بدر ہو جاؤں..

یہ آب و تاب جو مجھ میں ہے سب اسی سے ہے
اگر وہ چھوڑ دے مجھ کو تو میں کھنڈر ہو جاؤں..

مری مدد سے کھجوروں کی فصل پکنے لگے
میں چاہتا ہوں کہ صحرا کی دوپہر ہو جاؤں..

میں آس پاس کے موسم سے ہوں تر و تازہ
میں اپنے جھنڈ سے نکلوں تو بے ثمر ہو جاؤں..

بڑی عجیب سی حدت ہے اس کی یادوں میں
اگر میں چھو لوں پسینے سے تر بہ تر ہو جاؤں..

میں کچی مٹی کی صورت ہوں تیرے ہاتھوں میں
مجھے تو ڈھال دے ایسے کہ معتبر ہو جاؤں..

بچی کھچی ہوئی سانسوں کے ساتھ پہنچانا
سنو ہواؤ اگر میں شکستہ پر ہو جاؤں..

Pairo'n Ko Mere Deeda-e-tar Bandhe Hue Hai

Pairo'n ko mere deeda-e-tar bandhe hue hai..
Zanjeer ki surat mujhe ghar bandhe hue hai.!

Har chehre mein aata hai nazar ek hi chehra,
Lagta hai koi meri nazar baandhe hue hai.!

Bichhdenge to mar jayenge hum dono'n bichhad kar,
Ek dor mein hum ko yahi darr baandhe hue hai.!

Parwaaz ki taaqat bhi nahin baaqi hai lekin,
Sayyaad abhi tak mere par baandhe hue hai.!

Hum hain ke kabhi zabt ka daaman nahin chhoda,
Dil hai ki dhadakne pe kamar baandhe hue hai.!

Aankhein to use ghar se nikalne nahin deti,
Aansu hai ke samaan-e-safar baandhe hue hai.!

Phenki na 'Munawwar' ne buzurgon ki nishaani,
Dastaar puraani hai magar baandhe hue hai.!!

"Munawwar Rana"
____________________

پیروں کو مرے دیدۂ تر باندھے ہوئے ہے
زنجیر کی صورت مجھے گھر باندھے ہوئے ہے..

ہر چہرے میں آتا ہے نظر ایک ہی چہرا
لگتا ہے کوئی میری نظر باندھے ہوئے ہے..

بچھڑیں گے تو مر جائیں گے ہم دونوں بچھڑ کر
اک ڈور میں ہم کو یہی ڈر باندھے ہوئے ہے..

پرواز کی طاقت بھی نہیں باقی ہے لیکن
صیاد ابھی تک مرے پر باندھے ہوئے ہے..

ہم ہیں کہ کبھی ضبط کا دامن نہیں چھوڑا
دل ہے کہ دھڑکنے پہ کمر باندھے ہوئے ہے..

آنکھیں تو اسے گھر سے نکلنے نہیں دیتیں
آنسو ہے کہ سامان سفر باندھے ہوئے ہے..

پھینکی نہ منورؔ نے بزرگوں کی نشانی
دستار پرانی ہے مگر باندھے ہوئے ہے..

Tumhaare Jism Ki Khushbu Gulo'n Se Aati Hai

Tumhaare jism ki khushbu gulo'n se aati hai,
Khabar tumhaari bhi ab doosro'n se aati hai...

Humin akele nahin jagte hain raato'n mein,
Use bhi neend badi mushkilon se aati hai...

Humari aankhon ko maila to kar diya hai magar,
Mohabbato'n mein chamak aansuon se aati hai...

Isi liye to andhere haseen lagte hain,
Ke raat mil ke tere gesuon se aati hai...

Ye kis maqaam pe pahuncha diya mohabbat ne,
Ke teri yaad bhi ab koshisho'n se aati hai.!!

"Munawwar Rana"
____________________

 

تمہارے جسم کی خوشبو گلوں سے آتی ہے
خبر تمہاری بھی اب دوسروں سے آتی ہے..

ہمیں اکیلے نہیں جاگتے ہیں راتوں میں
اسے بھی نیند بڑی مشکلوں سے آتی ہے..

ہماری آنکھوں کو میلا تو کر دیا ہے مگر
محبتوں میں چمک آنسوؤں سے آتی ہے..

اسی لئے تو اندھیرے حسین لگتے ہیں
کہ رات مل کے ترے گیسوؤں سے آتی ہے..

یہ کس مقام پہ پہنچا دیا محبت نے
کہ تیری یاد بھی اب کوششوں سے آتی ہے..

Itna Mohtaaj Na Kar Chashm-e-basirat Mujh Ko

Itna Mohtaaj Na Kar Chashm-e-basirat Mujh Ko,
Roz Imdaad Charaghon Se Nahi Li Jaati..

Zindagi Teri Mulaqaat Mein Ye Ruswaai Hui,
Saans Tak Tere Mareezon Se Nahi Li Jaati.!

"Munawwar Rana"

اتنا محتاج نہ کر چشم بصیرت مجھ کو
روز امداد چراغوں سے نہیں لی جاتی.. 

زندگی تیری محبت میں یہ رسوائی ہوئی
سانس تک تیرے مریضوں سے نہیں لی جاتی.!!

"منور رانا"

Dariya-dili Se Abr-e-karam Bhi Nahin Mila

Dariya-dili se abr-e-karam bhi nahin mila,
Lekin mujhe naseeb se kam bhi nahin mila...

Phir ungliyon ko khoon mein dubona pada humein,
Jab hum ko maangne pe qalam bhi nahin mila...

Sach bolne ki raah mein tanha Hamee'n mile,
Is raaste mein shaikh-e-haram bhi nahin mila...

Main ne to saari umr nibhaai hai dosti,
Wo mujh se khaa ke meri qasam bhi nahin mila... 

Dil ko khushi bhi had se zyada nahin mili,
Kaase ke aitibaar se ghum bhi nahin mila..!!

"Munawwar Rana"
____________________

دریا دلی سے ابر کرم بھی نہیں ملا
لیکن مجھے نصیب سے کم بھی نہیں ملا.. 

پھر انگلیوں کو خوں میں ڈبونا پڑا ہمیں
جب ہم کو مانگنے پہ قلم بھی نہیں ملا..

سچ بولنے کی راہ میں تنہا ہمیں ملے
اس راستے میں شیخ حرم بھی نہیں ملا..

میں نے تو ساری عمر نبھائی ہے دوستی
وہ مجھ سے کھا کے میری قسم بھی نہیں ملا..

دل کو خوشی بھی حد سے زیادہ نہیں ملی
کاسے کے اعتبار سے غم بھی نہیں ملا..

Aakhiri Sach

* Nazm *
__________

Chehre tamaam dhundhle nazar aa rahe hain kyun,

Kyun khwab ratjagon ki haweli mein dab gaye,

Hai kal ki baat ungli pakad kar kisi ki main,

Mele main ghoomta tha khilaunon ke waaste,

Jitne waraq likhe the meri zindagi ne sab,
Aandhi ke ek jhonke mein bikhre hue hain sab,

Main chahta hun phir se sametun ye zindagi,

Bachche tamaam pas khade hain bujhe bujhe,

Shokhi na jaane kya hui rangat kahaan gayi,

Jaise kitaab chhod ke jaate hue waraq,

Jaise ke bhoolne lage bachcha koi sabaq,

Jaise jabeen ko chhoone lage maut ka araq,

Jaise charagh neend ki aaghosh ki taraf,

Badhne lage andhere ki zulfein bikher kar, 

Bhoole hue hain honth hansi ka pata talak,

Darwaza dil ka band hua chahta hai ab,

Kya sochna ke phool se bachchon ka saath hai,

Ab main hun aspataal ka bistar hai raat hai.!!

"Munawwar Rana"

چہرے تمام دھندلے نظر آ رہے ہیں کیوں

کیوں خواب رتجگوں کی حویلی میں دب گئے

ہے کل کی بات انگلی پکڑ کر کسی کی میں

میلے میں گھومتا تھا کھلونوں کے واسطے

جتنے ورق لکھے تھے مری زندگی نے سب

آندھی کے ایک جھونکے میں بکھرے ہوئے ہیں سب

میں چاہتا ہوں پھر سے سمیٹوں یہ زندگی

بچے تمام پاس کھڑے ہیں بجھے بجھے

شوخی نہ جانے کیا ہوئی رنگت کہاں گئی

جیسے کتاب چھوڑ کے جاتے ہوئے ورق

جیسے کہ بھولنے لگے بچہ کوئی سبق

جیسے جبیں کو چھونے لگے موت کا عرق

جیسے چراغ نیند کی آغوش کی طرف

بڑھنے لگے اندھیرے کی زلفیں بکھیر کر

بھولے ہوئے ہیں ہونٹ ہنسی کا پتہ تلک

دروازہ دل کا بند ہوا چاہتا ہے اب

کیا سوچنا کہ پھول سے بچوں کا ساتھ ہے

اب میں ہوں اسپتال کا بستر ہے رات ہے..!!

منور رانا

Ye Sar-buland Hote Hi Shaane Se Kat Gaya

Ye sar-buland hote hi shaane se kat gaya, 
Main mohtaram hua to zamaane se kat gaya...

Maa aaj mujh ko chhod ke gaanw chali gayi,
Main aaj apne aaina-khaane se kat gaya...

Jode ki shaan badh gayi mahfil mahak uthi,
Lekin ye phool apne gharaane se kat gaya...

Ai aansuoun tumhaari zaroorat hai ab mujhe,
Kuchh mail to badan ka nahaane se kat gaya...

Us ped se kisi ko shikaayat na thi magar,
Ye ped sirf beech mein aane se kat gaya...

Warna wahi ujaad haweli si zindagi,
Tum aa gaye to waqt thikaane se kat gaya.!!

"Munawwar Rana"
____________________

یہ سر بلند ہوتے ہی شانے سے کٹ گیا
میں محترم ہوا تو زمانے سے کٹ گیا..

ماں آج مجھ کو چھوڑ کے گاؤں چلی گئی
میں آج اپنے آئینہ خانے سے کٹ گیا..

جوڑے کی شان بڑھ گئی محفل مہک اٹھی
لیکن یہ پھول اپنے گھرانے سے کٹ گیا..

اے آنسوؤ تمہاری ضرورت ہے اب مجھے
کچھ میل تو بدن کا نہانے سے کٹ گیا..

اس پیڑ سے کسی کو شکایت نہ تھی مگر
یہ پیڑ صرف بیچ میں آنے سے کٹ گیا..

ورنہ وہی اجاڑ حویلی سی زندگی
تم آ گئے تو وقت ٹھکانے سے کٹ گیا..

Thakan Ko Odh Ke Bistar Mein Ja Ke Let Gaye

Thakan ko odh ke bistar mein ja ke let gaye,
Hum apni qabr-e-muqarrar mein ja ke let gaye...

Tamaam umr hum ek doosre se ladte rahe,
Magar mare to baraabar mein ja ke let gaye...

Humaari tishna-naseebi ka haal mat poochho,
Wo pyaas thi ki samandar mein ja ke let gaye...

Na jaane kaisi thakan thi kabhi nahin utri,
Chale jo ghar se to daftar mein ja ke let gaye...

Ye bewaqoof unhein maut se daraate hain, 
Jo khud hi saaya-e-khanjar mein ja ke let gaye...

Tamaam umr jo nikle na the haweli se,
Wo ek gumbad-e-be-dar mein ja ke let gaye...

Sajaaye phirte the jhoothi anaa jo chehron par,
Wo log qasr-e-sikandar mein ja ke let gaye...

Sazaa humaari bhi kaati hai baal-bachchon ne,
Kei hum udaas hue ghar mein ja ke let gaye..!!

"Munawwar Rana"
____________________

تھکن کو اوڑھ کے بستر میں جا کے لیٹ گئے
ہم اپنی قبر مقرر میں جا کے لیٹ گئے.. 

تمام عمر ہم اک دوسرے سے لڑتے رہے
مگر مرے تو برابر میں جا کے لیٹ گئے..

ہماری تشنہ نصیبی کا حال مت پوچھو
وہ پیاس تھی کہ سمندر میں جا کے لیٹ گئے..

نہ جانے کیسی تھکن تھی کبھی نہیں اتری
چلے جو گھر سے تو دفتر میں جا کے لیٹ گئے..

یہ بے وقوف انہیں موت سے ڈراتے ہیں
جو خود ہی سایۂ خنجر میں جا کے لیٹ گئے..

تمام عمر جو نکلے نہ تھے حویلی سے
وہ ایک گنبد بے در میں جا کے لیٹ گئے..

سجائے پھرتے تھے جھوٹی انا جو چہروں پر
وہ لوگ قصر سکندر میں جا کے لیٹ گئے..

سزا ہماری بھی کاٹی ہے بال بچوں نے
کہ ہم اداس ہوئے گھر میں جا کے لیٹ گئے..

Wo Bichhad Kar Bhi Kahaan Mujh Se Juda Hota Hai

Wo bichhad kar bhi kahaan mujh se juda hota hai,
Ret par os se ek naam likha hota hai...

Khaak aankhon se lagaai to ye ahsaas hua,
Apni mitti se har ek shakhs jurha hota hai...

Saari duniya ka safar khwaab mein kar daala hai,
Koi manzar ho mera dekha hua hota hai...

Main bhulaana bhi nahin chaahta is ko lekin,
Mustaqil zakhm ka rahna bhi bura hota hai...

Khauf mein doobe hue shahar ki qismat hai yahi,
Muntazir rahta hai har shakhs ke kya hota hai..!!

"Munawwar Rana"
____________________

وہ بچھڑ کر بھی کہاں مجھ سے جدا ہوتا ہے
ریت پر اوس سے اک نام لکھا ہوتا ہے.. 

خاک آنکھوں سے لگائی تو یہ احساس ہوا
اپنی مٹی سے ہر اک شخص جڑا ہوتا ہے..

ساری دنیا کا سفر خواب میں کر ڈالا ہے
کوئی منظر ہو مرا دیکھا ہوا ہوتا ہے..

میں بھلانا بھی نہیں چاہتا اس کو لیکن
مستقل زخم کا رہنا بھی برا ہوتا ہے..

خوف میں ڈوبے ہوئے شہر کی قسمت ہے یہی
منتظر رہتا ہے ہر شخص کہ کیا ہوتا ہے..

Sahra Pe Bura Waqt Mere Yaar Pada Hai

Sahra pe bura waqt mere yaar pada hai,
Deewana kayi roz se beemaar pada hai...

Sab raunaq-e-sahra thi isi pagle ke dum se,
Ujda hua deewane ka darbaar pada hai...

Aankhon se tapakti hai wahi wahshat-e-sahra,
Kaandhe bhi bataate hain bada baar pada hai...

Dil mein jo lahoo-jheel thi wo sookh chuki hai,
Aankhon ka do-aaba hai so be-kaar pada hai...

Tum kahte the din ho gaye dekha nahin us ko,
Lo dekh lo ye aaj ka akhbaar pada hai...

Odhe hue ummeed ki ek maili si chaadar,
Darvaaza-e-bakhshish pe gunahgaar pada hai...

Ai khaak-e-watan tujh se main sharminda bahut hoon,
Mahngaai ke mausam mein ye tauhaar pada hai..!!

"Munawwar Rana"
____________________

صحرا پہ برا وقت مرے یار پڑا ہے
دیوانہ کئی روز سے بیمار پڑا ہے..

سب رونق صحرا تھی اسی پگلے کے دم سے
اجڑا ہوا دیوانے کا دربار پڑا ہے..

آنکھوں سے ٹپکتی ہے وہی وحشت صحرا
کاندھے بھی بتاتے ہیں بڑا بار پڑا ہے..

دل میں جو لہو جھیل تھی وہ سوکھ چکی ہے
آنکھوں کا دو آبا ہے سو بے کار پڑا ہے..

تم کہتے تھے دن ہو گئے دیکھا نہیں اس کو
لو دیکھ لو یہ آج کا اخبار پڑا ہے..

اوڑھے ہوئے امید کی اک میلی سی چادر
دروازۂ بخشش پہ گنہ گار پڑا ہے..

اے خاک وطن تجھ سے میں شرمندہ بہت ہوں
مہنگائی کے موسم میں یہ تیوہار پڑا ہے.. 

Phir Se Badal Ke Mitti Ki Soorat Karo Mujhe

Phir se badal ke mitti ki soorat karo mujhe,
Izzat ke saath duniya se rukhsat karo mujhe...

Main ne to tum se ki hi nahin koi aarzoo, 
Paani ne kab kaha tha ki sharbat karo mujhe...

Kuchh bhi ho mujh ko ek nayi shakl chaahiye,
Deewar par bichhaao mujhe chhat karo mujhe...

Jannat pukaarti hai ki main hoon tere liye,
Duniya ba-zid hai mujh se ki jannat karo mujhe..!!

"Munawwar Rana"
____________________

پھر سے بدل کے مٹی کی صورت کرو مجھے
عزت کے ساتھ دنیا سے رخصت کرو مجھے.. 

میں نے تو تم سے کی ہی نہیں کوئی آرزو
پانی نے کب کہا تھا کہ شربت کرو مجھے.. 

کچھ بھی ہو مجھ کو ایک نئی شکل چاہئے
دیوار پر بچھاؤ مجھے چھت کرو مجھے..

جنت پکارتی ہے کہ میں ہوں ترے لئے
دنیا بضد ہے مجھ سے کہ جنت کرو مجھے..

Masarraton Ke Khazaane Hi Kam Nikalte Hain

Masarrato'n ke khazaane hi kam nikalte hain,
kisi bhi seene ko kholo to ghum nikalte hain...

Humaare jism ke andar ki jheel sookh gayi,
Isi liye to ab aansoo bhi kam nikalte hain...

Ye karbala ki zameen hai ise salaam karo,
Yahaan zameen se patthar bhi nam nikalte hain...

Yahi hai zidd to hatheli pe apni jaan liye,
Ameer-e-shahar se kah do ke hum nikalte hain...

Kahaan har ek ko milte hain chaahne waale,
Naseeb waalon ke gesoo mein kham nikalte hain...

Jahaan se hum ko guzarne mein sharm aati hai,
Usi gali se kayi mohtaram nikalte hain...

Tumhi bataao ke main khilkhila ke kaise hansun,
Ke roz khaana-e-dil se alam nikalte hain...

Tumhaare ahd-e-hukoomat ka saaneha ye hai,
Ke ab to log gharo'n se bhi kam nikalte hain.!!

"Munawwar Rana"
____________________ 

مسرتوں کے خزانے ہی کم نکلتے ہیں
کسی بھی سینے کو کھولو تو غم نکلتے ہیں..

ہمارے جسم کے اندر کی جھیل سوکھ گئی
اسی لیے تو اب آنسو بھی کم نکلتے ہیں..

یہ کربلا کی زمیں ہے اسے سلام کرو
یہاں زمین سے پتھر بھی نم نکلتے ہیں..

یہی ہے ضد تو ہتھیلی پہ اپنی جان لیے
امیر شہر سے کہہ دو کہ ہم نکلتے ہیں..

کہاں ہر ایک کو ملتے ہیں چاہنے والے
نصیب والوں کے گیسو میں خم نکلتے ہیں..

جہاں سے ہم کو گزرنے میں شرم آتی ہے
اسی گلی سے کئی محترم نکلتے ہیں..

تمہی بتاؤ کہ میں کھلکھلا کے کیسے ہنسوں
کہ روز خانۂ دل سے علم نکلتے ہیں..

تمہارے عہد حکومت کا سانحہ یہ ہے
کہ اب تو لوگ گھروں سے بھی کم نکلتے ہیں..