Suno Humdam, Main Rasta Bhool Baithi Hun

||| Nazm |||

Suno humdam...
Main rasta bhool baithi hun,

Udaasi ka ghana jangal,
Mere ahsaas pe
Taarikiyon ke an-ginat saaye bichhata hai,
Mujhe aaseb ki soorat daraata hai,

Hawa ki cheekh meri neend ko aise nigalti hai,
Ke jaise aag sookhi lakdiyon ko raakh karti hai,

Jahaan main paanw rakhti hun,
Wahaan par waswason ke naag
Phan phailaye baithe hain,

Main jitne zor se aawaaz deti hun,
Meri khamoshiyan
Apne tasalsul mein mujhe aane nahin detin,

Meri aawaz ghut jaati hai,
Andar hi kahin par doob jaati hai,

Suno humdam...
Main tanha hun,

Kabhi aao, pakad kar haath le jaao,
Mujhe taarikiyon ki raat se
Raushan dinon tak saath le jaao.!!

"Naaz Butt"

Wasl Ke Fasaane Se, Hijr Ke Zamaane Tak

||| Nazm |||

Wasl ke fasaane se,
Hijr ke zamaane tak,

Faasla hai sadiyon ka,
Faasla kuchh aisa hai,
Umr ki musaafat bhi
Jis ko tay na kar paaye,

Manzilon ke milne tak,
Aarzu hi mar jaaye,

Chaar samt aahon ke,
Dil-figaar manzar hain,

Manzaron ki baarish mein,
Aankh bheegi rahti hai,
Aaine se kahti hai,
Kis liye sanwarti hoon,
Kyun singhaar karti hoon,

Ajnabi musaafir ka
Intizaar karti hoon,
Roz roz jeeti hoon,
Roz roz marti hoon.!!

"Naaz Butt"
___
Musaafat = journey,
Dil-figaar = mournful, pensive, melancholy,

Suno Jaanaa, Mujhe Kuchh Der Sona Hai

||| Nazm |||

Suno jaanaa,
Mujhe kuchh der sona hai,

Aur apni aankh ki putli mein raqsaa'n
Titliyon ke lams ko mahsoos karna hai,

Suno jaanaa,
Main aankhen band karti hun,
To un makhmoor lamhon mein,
Tumhaare reshmi ahsaas ki ek narm si khushbu,
Nawah-e-jism-o-jaan mein phail jaati hai,

Faza mahmez hoti hai,

Usi saa'at hawa-e-neem-shab nirmal suro'n mein gungunati hai,

Tumhaari yaad aati hai,
To meri aankh ki putli mein raqsaa'n titliyan mujh ko sataati hain,

Badan mein phail jaati hain,

Suno jaanaa,
Mujhe kuchh der sone do,

Wisaal-asaar lamhon ka
Pata deti gulabi titliyon ke lams ko
Mahsoos karne do,

Mujhe kuchh der sona hai,
Mujhe kuchh der sone do.!!

"Naaz Butt"
___
Makhmoor = intoxicated, inebriated, drunk,
Nawah-e-jism-o-jaan = Vicinity, environs of body and life,
Faza = ambience,
Mahmez = a spur, to goad, spur,
Saa'at = a moment,

Mohabbat Noor Hai Jaanaa

||| Nazm |||

Zamana is ki khwahish mein azal se choor hai jaanaa,

Mohabbat noor hai jaanaa,
Mohabbat noor hai jaanaa,

Rukh-e-mahtab se raushan nigaar-e-khwab se raushan,
Nazar mein khulne waale sabza-e-shadab se raushan,

Sitaaron se kahin badh kar chamak is ke jilau mein hai,
Jo aab-o-taab hai is mein kahaan suraj ki zau mein hai,

Ye nakhl-e-ishq par jaise wafa ka baur hai jaanaa,

Mohabbat noor hai jaanaa,
Mohabbat noor hai jaanaa,

Ye jis dil mein utar jaaye use ma'amoor kar jaaye,
Sarapa rang kar jaaye tamannaon se bhar jaaye,

Ye aisa kaif hai jo har qadam par zindagi pur-noor karta hai,
Utar kar rooh mein is ke andhere door karta hai,

Ye wo ahsaas hai jo har ghadi bharpoor hai jaanaa,

Mohabbat noor hai jaanaa,
Mohabbat noor hai jaanaa.!!

"Naaz Butt"
___
Jilau = in the company of/ side,
Zau = light, sunlight, glow,
Nakhl-e-ishq = tree of love,
Baur = ripening,
Ma'amoor = decorated, embellished, saturated, populous,

Ajab Samaa'n Hai

||| Nazm |||

Ajab samaa'n hai,
Main band aankhon se tak rahi hun,

Khumar-e-shab mein gulaab-rut ki rafaqaton se mahak rahi hun,

Wo narm khushbu ki tarah dil mein utar raha hai,
Mein qurb-e-jaan ki latafaton se bahak rahi hun,

Ye chahaton ki haseen baarish ka moajiza hai,
Ke mari porein sulag rahi hain,
Main qatra qatra pighal rahi hun,

Main rang-o-khushbu ka lams pa kar,
Wafa ke paikar mein dhhal rahi hun,

Na main zameen par,
Na aasman mein,

Wo aisa jaadu jaga raha hai,

Gulaabi barish
Sunahre sapnon ke saare matlab
Wo dheere dheere sujha raha hai

Mujhe wo mujh se chura raha hai..!!

"Naaz Butt"
___
Qurb-e-jaan = nearness to life,
Latafaton = Subtleties; pleasures; joys,
Porein = Joints in body; spaces between joints,

Us Lams Ka Koi Naam To Ho Jo Tujh Ko Soch Ke Jagta Hai

||| Nazm |||

Us lams ka koi naam to ho jo tujh ko soch ke jagta hai,
Jo tere zikr ke aate hi rag rag mein daudne lagta hai,

Kyun tere naam ko sunte hi meri saans mahakne lagti hai,
Ahsaas nashe mein hota hai har fikr bahakne lagti hai,

Ek nadeeda ahsaas meri poro'n mein ghulne lagta hai,
Ek band dareecha hasrat ka khwaabon mein khulne lagta hai,

Jab chaand nikal kar baadal se aankhon mein sapna bota hai,
Ek khwahish ki tanhaai se bedaar junoon jab hota hai,

Jab dasht-e-talab mein pyaas meri aankhon ko nigalne lagti hai,
Jab aas ummeed ki duniya mein ek shaam si dhhalne lagti hai,

Jis waqt ghamo'n ki wahshat ka ek saaya mujh par jhukta hai,
Us waqt tera ahsaas mere pahlu mein aa kar rukta hai,

Aur us ahsas ke chhoote hi main taabinda ho jaati hun,
Meri saansein chalne lagti hain phir se zinda ho jaati hun.!!

"Naaz Butt"
___
Taabinda = shining bright, luminous,

Kayi Sadiyon Se Sahra Ki Sulagti Ret Par

||| Nazm |||

Kayi sadiyon se sahra ki sulagti ret par,
Tanha khadi main sochti hun,

Nahin koi nahin hai,
Nahin koi nahin hai jo mere andar bilakti khamushi ko,
Thapkiyaan de kar sula daale,
Mohabbat ok mein bhar kar pila daale,

Ye kaisi be-niyaazi hai,
Ke jalti erhiyon ki siskiyaan sun kar bhi baadal chup raha hai,

Ye kaise rat-jage aankhon mein utre hain,
Ke jin ke silsile qarnon pe phaile hain,

Magar main hijr ke mausam liye,
Kab se
Kisi banjar zameen ke khwaab ka tawaan bharti hun.!!

"Naaz Butt"
___
Qarnon = eons,
Tawaan = penalty, fine, damages, compensation,

Subah Se Shaam Tak Silsila Zeest Ka

||| Nazm |||

Subah se shaam tak
Silsila zeest ka,
Kis qadar hai kathin kis qadar be-amaa'n,

Lamha lamha sisakti hui zindagi,
Har qadam par bilakti hui zindagi,

Khwahishon ki aseeri pe nauha-kunaa'n,
Har ghadi jism-o-jaan
Rooh ghayal kharaashon ke dil par nishaa'n,

Roz-e-awwal se jaari-o-saari yahaan,
Wahshaton ka samaa'n,

Koi pal bhi aziyat se khaali nahin,
Kaun si aankh hai jo sawaali nahin,

Koi waaris nahin koi waali nahin,
Gulshan-e-khwaab ka koi maali nahin,

Khatm hota nahin shor-e-aah-o-fughaa'n,
Hai azal se abad tak yahi dastaan
Al-amaa'n Al-amaa'n..!!

"Naaz Butt"

Tujh Ko Sochun Main Su-ba-su Ho Kar

Tujh ko sochun main su-ba-su ho kar,
Main to bas rah gayi hun tu ho kar,

Ye tere lams ka karishma hai,
Phail jaati hun rang-o-bu ho kar,

Tu na ho to main baanjh mitti hun,
Raakh ho jaaun be-numu ho kar,

Hai teri qaid mein hi aazadi,
Dhhaanp le mujh ko chaar su ho kar,

Aaina hun tere wajood ka main,
Aa kabhi dekh ru-ba-ru ho kar,

"Naaz" ke lab pe har ghadi raqsaa'n,
Tu hi rahta hai guftugu ho kar..!!

"Naaz Butt"
___
Su-ba-su = place to place, here and there,
Be-numu = without growth,
Raqsaa'n = dancing,

Tera Naseeb Banun Teri Chahaton Mein Rahun

Tera naseeb banun teri chahaton mein rahun,
Tamam umr mohabbat ki wahshaton mein rahun,

Khumaar hasrat-e-deedar mein rahun har dam,
Sawaad-e-ishq yunhi teri shiddaton mein rahun,

Ye zindagi ki haraarat tere sabab se hai,
Main lamha lamha junoon ki tamazaton mein rahun,

Ye ahtimaam-e-shab-o-roz ho meri khaatir,
Tere khyaal ki rangeen khalwaton mein rahun,

Sanwaarti hain sada jis ki chahatein mujh ko,
Meri dua hai ki main us ki hasraton mein rahun,

Ai abr-e-wasl baras aur khul ke mujh pe baras,
Main bheegi bheegi hawa ki shararaton mein rahun,

Shareek-e-shauq-e-safar hai agar wo mera "Naaz", 
Main kyun na mausam-e-gul ki bashaaraton mein rahun.!!

"Naaz Butt"
___
Sawaad-e-ishq = environs/conditions of love,
Tamazaton = heat,
Ahtimaam-e-shab-o-roz = management of night and day,
Khalwaton = in isolation, solitary, privacy, to meet privately,
Shareek-e-shauq-e-safar = companion in hobby of travelling,
Bashaaraton = Good news, glad tidings, joyful annunciations made to one in sleep or in a vision by some saint; happy dreams or visions; divine,

Pahle Dukh Dard Kayi Dil Mein Sambhaale Main Ne

Pahle dukh dard kayi dil mein sambhaale main ne,
Phir kiya khud ko tere ghum ke hawaale main ne,

Kyun khule tujh pe safar mein thi aziyat kaisi,
Kab dikhaye hain tujhe rooh ke chhaale main ne,

Tu ne har gaam jo bakhshe hain andhere mujh ko,
Un andheron mein tere khwaab ujaale main ne,

Teri tasveer mere paas thi yaani tu tha,
Din tere hijr ke is khwaab mein taale main ne,

Tere ghum se kiya duniya ke ghumon ka chaara,
Yaani ek khaar se sab khaar nikaale main ne,

Shahar waalon ne inhein abr-e-karam samjha "Naaz",
Apne aansu jo hawaaon mein uchhaale main ne.!!

"Naaz Butt"

Kuchh Is Ada Se Humein Ghum-gusaar Milte Hain

Kuchh is ada se humein ghum-gusaar milte hain,
Hazaar zakhm pas-e-aitibaar milte hain,

Shab-e-firaaq ki wahshat na poochhiye hum se,
Hum apne hijr se deewana-waar milte hain,

Ye shahar-e-zakhm-faroshaan hai haaye kya kijiye,
Ke pa-e-gul bhi yahaan khaar khaar milte hain,

Wo jin ki kokh mein shauq-e-khirad panapta hai,
Wo walwale bhi junoon ka shikaar milte hain,

Saja ke rakhte hain jin ko chamak ki khwahish mein,
Wo aaine bhi humein daagh-daar milte hain,

Humein unhi se tawaqqo hai "Naaz" manzil ki,
Jo raaste humein ban kar ghubaar milte hain..!!

"Naaz Butt"
___
Shauq-e-khirad = desire for rationality/wisdom

Chhupayen Kis Tarah Aankhein Chamak Mohabbat Ki

Chhupayen kis tarah aankhein chamak mohabbat ki,
In aainon mein hai har dam jhalak mohabbat ki,

Dhadak rahi hai koi yaad surkh phoolon mein,
Jhapak rahi hai dilon mein palak mohabbat ki,

Ajeeb rang kisi ki nazar se chhitke hain,
Badan mein phail rahi hai dhanak mohabbat ki,

Har ek shaakh pe khilne lage bahaar mein phool,
Har ek dil mein uthi hai kasak mohabbat ki,

Dikhaai deta hai ek aks chaand taaron mein,
Sajaata rahta hai raahein falak mohabbat ki,

Haseen hote hain din khwaab se lapete hue,
Gulaab karti hain raatein mahak mohabbat ki,

Kayi dinon se mujhe "Naaz" aisa lagta hai,
Qaraar le gayi jaise lapak mohabbat ki.!!

"Naaz Butt"

Chaman Sa Dasht Ta-hadd-e-nazar Kitna Haseen Hai

Chaman sa dasht ta-hadd-e-nazar kitna haseen hai,
Tu mera hum-qadam hai to safar kitna haseen hai,

Meri jaanib lapakti manzilon se poochh lena,
Kisi ke saath chalne ka hunar kitna haseen hai,

Wo mere saamne baitha hua hai mera ho kar,
Dua-e-neem-shab ka ye asar kitna haseen hai,

Zahe qismat ki saaye-daar bhi hai ba-samar bhi,
Mere sar par mohabbat ka shajar kitna haseen hai,

Ajab khwaab-aashna aankhein hui hain wasl ki shab,
Khuli hai aankh to rang-e-sahar kitna haseen hai,

Main hansti khelti hun jis ke khwaab na-rasa mein,
Mera ahsas-e-hasrat hai magar kitna haseen hai,

Nahin hai "Naaz" kam jannat se mera aashiyana,
Mohabbat se muzayyan mera ghar kitna haseen hai.!!

"Naaz Butt"
___
Muzayyan = adorned, decorated, embellished,

Be-khabar Hote Hue Bhi Ba-khabar Lagte Ho Tum

Be-khabar hote hue bhi ba-khabar lagte ho tum,
Door rah kar bhi mujhe nazdeek-tar lagte ho tum,

Kyun na aaun saj sanwar kar main tumhaare saamne,
Khush-ada lagte ho mujh ko khush-nazar lagte ho tum,

Tum ne lams-e-mo'tabar se bakhsh di wo raushni,
Mujh ko meri aarzuon ki sahar lagte ho tum,

Jis ke saaye mein amaa'n milti hai meri zeest ko,
Mujh ko jalti dhoop mein aisa shajar lagte ho tum,

Kyun tumhaare saath chalne par na aamada ho dil,
Khushbu-e-ahsaas mere hum-safar lagte ho tum,

"Naaz" tum par naaz karti hai mohabbat ki qasam,
Zindagi bhar ki duaaon ka asar lagte ho tum.!!

"Naaz Butt"