Yoon Saja Chaand Ke Jhalka Tere Andaaz Ka Rang

Yoon saja chaand ke jhalka tere andaaz ka rang,
Yoon faza mahki ke badla mere humraaz ka rang,

Saya-e-chashm mein hairaan rukh-e-raushan ka jamaal,
Surkhi-e-lab mein pareshaan teri aawaz ka rang,

Be-piye hun ke agar lutf karo aakhir-e-shab,
Shisha-e-may mein dhhale subah ke aaghaz ka rang,

Chang o nai rang pe the apne lahu ke dam se,
Dil ne lay badli to maddham hua har saaz ka rang,

Ek sukhan aur ke phir rang-e-takallum tera,
Harf-e-saada ko inayat kare aijaaz ka rang..!!

"Faiz Ahmad Faiz"
__________

Chang = a kind of harp, Lute, Tambourine,
Rang-e-takallum = colour of speech, style of speech,
Aijaaz = marvel, miracle,

Ye Kis Khalish Ne Phir Dil Mein Aashiyana Kiya

Ye kis khalish ne phir is dil mein aashiyana kiya,
Phir aaj kis ne sukhan hum se ghayebana kiya,

Ghum-e-jahaan ho rukh-e-yaar ho ke dast-e-adu,
Sulook jis se kiya hum ne aashiqana kiya, 

The khaak-e-rah bhi hum log qahr-e-tufaan bhi,
Saha to kya na saha aur kiya to kya na kiya,

Khusha ke aaj har ek muddai ke lab par hai,
Wo raaz jis ne humein raanda-e-zamana kiya,

Wo heela-gar jo wafa-ju bhi hai jafa-khu bhi,
Kiya bhi 'Faiz' to kis but se dostana kiya..!!

"Faiz Ahmad Faiz"
__________

Raanda-e-zamana = outcast,
Heela-gar = One Who Makes Excuses,

Yaad-e-ghazaal-chashma'n Zikr-e-saman-azaara'n

Yaad-e-ghazaal-chashma'n zikr-e-saman-azaara'n,
Jab chaha kar liya hai kunj-e-qafas bahaara'n,

Aankhon mein dard-mandi honthon pe uzr-khwahi,
Jaanana waar aai shaam-e-firaq-e-yara'n,

Namoos-e-jaan-o-dil ki baazi lagi thi warna,
Aasaan na thi kuchh aisi raah-e-wafa-shiaara'n,

Mujrim ho khwah koi rahta hai naasehon ka,
Ru-e-sukhan hamesha su-e-jigar-figaara'n, 

Hai ab bhi waqt zahid tarmim-e-zuhd kar le,
Su-e-haram chala hai amboh-e-baada-khwara'n,

Shayad qareeb pahunchi subah-e-wisaal humdam,
Mauj-e-saba liye hai khushbu-e-khush-kinaara'n,

Hai apni kisht-e-veeraan sarsabz is yaqeen se,
Aayenge is taraf bhi ek roz abr-o-baaraa,n,

Aayegi 'Faiz' ek din baad-e-bahaar le kar,
Taslim-e-may-farosha'n paigham-e-may-gusaara'n..!!

"Faiz Ahmad Faiz"
__________

Yaad-e-ghazaal-chashma'n = memory of deer-eyed,
Zikr-e-saman-azaara'n = mention of jasmine-cheeked,
Kunj-e-qafas = grove/ nook of a cage,
Uzr-khwahi = making excuses,
Namoos-e-jaan-o-dil = chastity, pudicity, purity of body and heart,
Raah-e-wafa-shiaara'n = way of those habituated to constancy,
Khwaah = wishing, desiring, soliciting, whether,
Su-e-jigar-figaara'n = towards broken heart,
Tarmim-e-zuhd = amendment of being devout, religious amendment,
Amboh-e-baada-khwara'n = crowd of drinkers,
Khushbu-e-khush-kinaara'n = fragrance nearby,
fragrance of jujube,
Kisht-e-veeraan = deserted field,
Abr-o-baaraa'n = clouds and rain,
Taslim-e-may-farosha'n = agreement, acceptance of wine-sellers,
Paigham-e-may-gusaara'n = message of wine drinkers,

Yaad Ka Phir Koi Darwaza Khula Aakhir-e-shab

Yaad ka phir koi darwaza khula aakhir-e-shab,
Dil mein bikhri koi khushbu-e-qaba aakhir-e-shab,

Subah phooti to wo pahlu se utha aakhir-e-shab,
Wo jo ek umr se aaya na gaya aakhir-e-shab,

Chaand se maand sitaron ne kaha aakhir-e-shab,
Kaun karta hai wafa ahd-e-wafa aakhir-e-shab,

lams-e-jaanana liye masti-e-paimana liye,
Hamd-e-baari ko uthe dast-e-dua aakhir-e-shab,

Ghar jo veeran tha sar-e-shaam wo kaise kaise,
Furqat-e-yaar ne aabaad kiya aakhir-e-shab,

Jis ada se koi aaya tha kabhi awwal-e-shab,
Usi andaaz se chal baad-e-saba aakhir-e-shab..!!

"Faiz Ahmad Faiz"

Wafa-e-waada Nahin Waada-e-digar Bhi Nahin

Wafa-e-waada nahin waada-e-digar bhi nahin,
Wo mujh se roothe to the lekin is qadar bhi nahin..

Baras rahi hai hareem-e-hawas mein daulat-e-husn, 
Gada-e-ishq ke kaase mein ek nazar bhi nahin..

Na jaane kis liye ummid-waar baitha hun, 
Ek aisi raah pe jo teri rahguzar bhi nahin..

Nigaah-e-shauq sar-e-bazm be-hijaab na ho,
Wo be-khabar hi sahi itne be-khabar bhi nahin..

Ye ahd-e-tark-e-mohabbat hai kis liye aakhir,
Sukoon-e-qalb udhar bhi nahin idhar bhi nahin.!!

"Faiz Ahmad Faiz"

Tumhaari Yaad Ke Jab Zakhm Bharne Lagte Hain

Tumhaari yaad ke jab zakhm bharne lagte hain,
Kisi bahane tumhein yaad karne lagte hain,

Hadees-e-yaar ke unwaan nikharne lagte hain,
To har hareem mein gesu sanwarne lagte hain,

Har ajnabi humein mahram dikhaai deta hai,
Jo ab bhi teri gali se guzarne lagte hain, 

Saba se karte hain ghurbat-naseeb zikr-e-watan,
To chashm-e-subah mein aansu ubharne lagte hain,

Wo jab bhi karte hain is nutq o lab ki bakhiya-gari,
Faza mein aur bhi naghme bikharne lagte hain,

Dar-e-qafas pe andhere ki mohr lagti hai,
To 'Faiz' dil mein sitare utarne lagte hain..!!

"Faiz Ahmad Faiz"
__________

Nutq = power of speech, articulation, reasoning,

Tum Aaye Ho Na Shab-e-intizaar Guzri Hai

Tum aaye ho na shab-e-intizaar guzri hai, 
Talash mein hai sahar baar baar guzri hai,

Junoon mein jitni bhi guzri ba-kaar guzri hai,
Agarche dil pe kharabi hazaar guzri hai,

Hui hai hazrat-e-naseh se guftugu jis shab,
Wo shab zaroor sar-e-ku-e-yaar guzri hai,

Wo baat saare fasane mein jis ka zikr na tha,
Wo baat un ko bahut na-gawaar guzri hai, 

Na gul khile hain na un se mile na may pi hai,
Ajeeb rang mein ab ke bahaar guzri hai,

Chaman pe ghaarat-e-gul-chin se jaane kya guzri,
Qafas se aaj saba be-qaraar guzri hai.!!

"Faiz Ahmad Faiz"
__________

Ghaarat-e-gul-chin = destruction by the flower-plucker,

Teri Ummid Tera Intizaar Jab Se Hai

Teri ummid tera intizaar jab se hai,
Na shab ko din se shikayat na din ko shab se hai,

Kisi ka dard ho karte hain tere naam raqam,
Gila hai jo bhi kisi se tere sabab se hai,

Hua hai jab se dil-e-na-suboor be-qaabu,
Kalaam tujh se nazar ko bade adab se hai,

Agar sharar hai to bhadke jo phool hai to khile,
Tarah tarah ki talab tere rang-e-lab se hai,

Kahaan gaye shab-e-furqat ke jaagne waale,
Sitara-e-sahri hum-kalaam kab se hai.!!

"Faiz Ahmad Faiz"
__________

Dil-e-na-suboor = impatient heart,
Sharar = spark , flash, gleam,

Teri Surat Jo Dil-Nasheen Ki Hai

Teri surat jo dil-nasheen ki hai,
Aashna shakl har haseen ki hai,

Husn se dil laga ke hasti ki,
Har ghadi hum ne aatisheen ki hai,

Subah-e-gul ho ke shaam-e-may-khana,
Mad'h us ru-e-nazneen ki hai,

Shaikh se be-hiraas milte hain,
Hum ne tauba abhi nahin ki hai,

Zikr-e-dozakh bayaan-e-hoor o qusoor,
Baat goya yahin kahin ki hai,

Ashk to kuchh bhi rang la na sake,
Khoon se tar aaj aasteen ki hai,

Kaise maanein haram ke sahl-pasand,
Rasm jo aashiqon ke deen ki hai,

'Faiz' auj-e-khyaal se hum ne,
Aasman sindh ki zameen ki hai..!!

"Faiz Ahmad Faiz"
__________

Be-hiraas = without getting panicky,
Sahl-pasand = ease-loving,
Auj-e-khyaal = heights of thought,

Tere Ghum Ko Jaan Ki Talash Thi Tere Jaan-nisaar Chale Gaye

Tere ghum ko jaan ki talash thi tere jaan-nisaar chale gaye,
Teri raah mein karte the sar talab sar-e-rahguzaar chale gaye,

Teri kaj-adaai se haar ke shab-e-intizaar chali gayi,
Mere zabt-e-haal se rooth kar mere ghum-gusaar chale gaye,

Na sawal-e-wasl na arz-e-ghum na hikayatein na shikayatein,
Tere ahd mein dil-e-zaar ke sabhi ikhtiyaar chale gaye,

Ye humin the jin ke libaas par sar-e-raah siyahi likhi gayi,
Yahi daagh the jo saja ke hum sar-e-bazm-e-yaar chale gaye,

Na raha junoon-e-rukh-e-wafa ye rasan ye daar karoge kya,
Jinhein jurm-e-ishq pe naaz tha wo gunahgaar chale gaye..!!

"Faiz Ahmad Faiz"

Subah Ki Aaj Jo Rangat Hai Wo Pahle To Na Thi

Subah ki aaj jo rangat hai wo pahle to na thi,
Kya khabar aaj khiramaa'n sar-e-gulzaar hai kaun...

Shaam gulnaar hui jaati hai dekho to sahi,
Ye jo nikla hai liye mish'al-e-rukhsaar hai kaun...

Raat mahki hui aai hai kahin se poochho,
Aaj bikhraye hue zulf-e-trah-daar hai kaun...

Phir dar-e-dil pe koi dene laga hai dastak, 
Jaaniye phir dil-e-wahshi ka talabgaar hai kaun.!!

"Faiz Ahmad Faiz"
__________

Khiramaa'n = graceful walking,

Sitam Ki Rasmein Bahut Thin Lekin Na Thi Teri Anjuman Se Pahle

Sitam ki rasmein bahut thin lekin na thi teri anjuman se pahle,
Saza khata-e-nazar se pahle itaab jurm-e-sukhan se pahle..

Jo chal sako to chalo ke raah-e-wafa bahut mukhtasar hui hai,
Maqaam hai ab koi na manzil faraaz-e-daar-o-rasan se pahle..

Nahin rahi ab junoon ki zanjir par wo pahli ijaara-daari,
Giraft karte hain karne waale khirad pe deewana-pan se pahle,

Kare koi tegh ka nazara ab un ko ye bhi nahin gawara,
Ba-zid hai qaatil ke jaan-e-bismil figaar ho jism o tan se pahle,

Ghuroor-e-sarw-o-saman se kah do ki phir wahi tajdaar honge,
Jo khaar-o-khas waali-e-chaman the urooj-e-sarw-o-suman se pahle,

Idhar taqaze hain maslahat ke udhar taqaza-e-dard-e-dil hai,
Zabaan sambhalein ke dil sambhalein aseer zikr-e-watan se pahle..!!

"Faiz Ahmad Faiz"
__________

Faraaz-e-daar-o-rasan = eminence of crucifixion,
Ijaara-daari = having a monopoly,
Ghuroor-e-sarw-o-saman = pride of eucalyptus and jasmine,
Khaar-o-khas = rubbish,
Waali-e-chaman = chief of garden,
Urooj-e-sarw-o-saman = height of cypress,

Shaam-e-firaaq Ab Na Poochh Aai Aur Aa Ke Tal Gayi

Shaam-e-firaaq ab na poochh aai aur aa ke tal gayi,
Dil tha ke phir bahal gaya jaan thi ke phir sambhal gayi,

Bazm-e-khyaal mein tere husn ki shama jal gayi,
Dard ka chaand bujh gaya hijr ki raat dhhal gayi,

Jab tujhe yaad kar liya subah mahak mahak uthi,
Jab tera ghum jaga liya raat machal machal gayi,

Dil se to har muaamla kar ke chale the saaf hum,
Kahne mein un ke saamne baat badal badal gayi,

Aakhir-e-shab ke hum-safar 'Faiz' na jaane kya hue,
Rah gayi kis jagah saba, subah kidhar nikal gayi..!!

"Faiz Ahmad Faiz"

Shaikh Saahab Se Rasm-o-raah Na Ki

Shaikh saahab se rasm-o-raah na ki,
Shukr hai zindagi tabaah na ki,

Tujh ko dekha to ser-chashm hue,
Tujh ko chaaha to aur chaah na ki,

Tere dast-e-sitam ka ijz nahin,
Dil hi kaafir tha jis ne aah na ki,

The shab-e-hijr kaam aur bahut,
Hum ne fikr-e-dil-e-tabaah na ki,

Kaun qaatil bacha hai shahar mein 'Faiz',
Jis se yaaron ne rasm-o-raah na ki..!!

"Faiz Ahmad Faiz"

Sahal Yun Raah-e-zindagi Ki Hai

Sahal yun raah-e-zindagi ki hai,
Har qadam hum ne aashiqi ki hai,

Hum ne dil mein saja liye gulshan,
Jab bahaaron ne be-rukhi ki hai,

Zahar se dho liye hain honth apne,
Lutf-e-saaqi ne jab kami ki hai,

Tere kooche mein baadshahi ki,
Jab se nikle gadagari ki hai,

Bas wahi surkh-ru hua jis ne,
Bahr-e-khoon mein shanawari ki hai,

Jo guzarte the 'daagh' par sadme,
Ab wahi kaifiyat sabhi ki hai.!!

"Faiz Ahmad Faiz"

Sabhi Kuchh Hai Tera Diya Hua Sabhi Rahatein Sabhi Kulfatein

Sabhi kuchh hai tera diya hua sabhi rahatein sabhi kulfatein,

Kabhi sohbatein kabhi furqatein kabhi dooriyaan kabhi qurbatein..

Ye sukhan jo hum ne raqam kiye ye hain sab waraq teri yaad ke, 

Koi lamha subah-e-wisaal ka koi shaam-e-hijr ki muddatein..

Jo tumhaari maan lein naseha to rahega daaman-e-dil mein kya,

Na kisi adu ki adawatein na kisi sanam ki murawwatein..

Chalo aao tum ko dikhayen hum jo bacha hai maqtal-e-shahar mein,

Ye mazaar ahl-e-safa ke hain ye hain ahl-e-sidq ki turbatein..

Meri jaan aaj ka ghum na kar ke na jaane kaatib-e-waqt ne,

Kisi apne kal mein bhi bhool kar kahin likh rakhi hon masarratein.!!

"Faiz Ahmad Faiz"

Rang Pairahan Ka Khushbu Zulf Lahrane Ka Naam

Rang pairahan ka khushbu zulf lahrane ka naam,
Mausam-e-gul hai tumhaare baam par aane ka naam,

Dosto us chashm o lab ki kuchh kaho jis ke baghair,
Gulsitaan ki baat rangeen hai na may-khane ka naam,

Phir nazar mein phool mahke dil mein phir shamein jalin,
Phir tasawwur ne liya us bazm mein jaane ka naam,

Dilbari thehra zabaan-e-khalq khulwane ka naam,
Ab nahin lete pari-ru zulf bikhrane ka naam,

Ab kisi laila ko bhi iqraar-e-mahboobi nahin,
In dinon badnaam hai har ek deewane ka naam,

Mohtasib ki khair ooncha hai usi ke faiz se,
Rind ka saaqi ka mai ka khum ka paimane ka naam,

Hum se kahte hain chaman waale gharibaan-e-chaman,
Tum koi achchha sa rakh lo apne veerane ka naam,

'Faiz' un ko hai taqaza-e-wafa hum se jinhein,
Aashna ke naam se pyara hai begaane ka naam..!!

"Faiz Ahmad Faiz"

Raah-e-khizaa'n Mein Talash-e-bahaar Karte Rahe

Raah-e-khizaa'n mein talash-e-bahaar karte rahe,
Shab-e-siyah se talab husn-e-yaar karte rahe,

Khyaal-e-yaar kabhi zikr-e-yaar karte rahe, 
Isi mataa pe hum rozgaar karte rahe,

Nahin shikayat-e-hijraa'n ke is waseele se,
Hum un se rishta-e-dil ustuwaar karte rahe,

Wo din ke koi bhi jab wajh-e-intizaar na thi,
Hum un mein tera siwa intizaar karte rahe,

Hum apne raaz pe nazaa'n the sharmsaar na the,
Har ek se sukhan-e-raaz-daar karte rahe,

Ziya-e-bazm-e-jahaa'n baar baar maand hui,
Hadees-e-shola-rukhaa'n baar baar karte rahe,

Unhin ke faiz se bazaar-e-aql raushan hai,
Jo gaah gaah junoon ikhtiyaar karte rahe.!!

"Faiz Ahmad Faiz"
__________

Ustuwaar = firm, strong,
Hadees-e-shola-rukhaa'n = description of flame-faced,

Raaz-e-ulfat Chhupa Ke Dekh Liya

Raaz-e-ulfat chhupa ke dekh liya,
Dil bahut kuchh jala ke dekh liya,

Aur kya dekhne ko baaqi hai,
Aap se dil laga ke dekh liya,

Wo mere ho ke bhi mere na hue,
Un ko apna bana ke dekh liya,

Aaj un ki nazar mein kuchh hum ne,
Aab ki nazrein bacha ke dekh liya,

'Faiz' takmeel-e-ghum bhi ho na saki,
Ishq ko aazma ke dekh liya..!!

"Faiz Ahmad Faiz"

Qarz-e-nigah-e-yaar Ada Kar Chuke Hain Hum

Qarz-e-nigah-e-yaar ada kar chuke hain hum,
Sab kuchh nisaar-e-rah-e-wafa kar chuke hain hum,

Kuchh imtihan-e-dast-e-jafa kar chuke hain hum,
Kuchh un ki dastaras ka pata kar chuke hain hum,

Ab ahtiyaat ki koi surat nahin rahi,
Qaatil se rasm-o-raah siwa kar chuke hain hum,

Dekhein hai kaun kaun zarurat nahin rahi,
Ku-e-sitam mein sab ko khafa kar chuke hain hum,

Ab apna ikhtiyaar hai chaahe jahaan chalein 
Rahbar se apni raah juda kar chuke hain hum,

Un ki nazar mein kya karein pheeka hai ab bhi rang,
Jitna lahu tha sarf-e-qaba kar chuke hain hum,

Kuchh apne dil ki khu ka bhi shukraana chahiye,
Sau baar un ki khu ka gila kar chuke hain hum..!!

"Faiz Ahmad Faiz"