Zarron Mein Kunmunaati Hui Kayenaat Hun

Zarron mein kunmunaati hui kayenaat hun
Jo muntazir hai jismo'n ki main wo hayaat hun,

Dono'n ko pyasa maar raha hai koi yazid,
Ye zindagi husain hai aur main furaat hun,

Neza zameen pe gaad ke ghode se kood ja,
Par main zameen pe aabla-pa khaali haath hun,

Kaisa falak hun jis pe samandar sawaar hai,
Sooraj bhi mere sar pe hai main kaisi raat hun,

Andhe kuein mein maar ke jo phenk aaye the,
Un bhaiyon se kahiyo abhi tak hayaat hun,

Aati hui train ke jo aage rakh gayi,
Us maa se ye na kahna ba-qaid-e-hayaat hun,

Bazaar ka naqeeb samajh kar mujhe na chhed, 
Khamosh rahne de main tere ghar ki baat hun.!

"Basheer Badr"
___
Naqeeb = herald, chief, proclaimer,

Yunhi Be-sabab Na Phira Karo Koi Shaam Ghar Mein Raha Karo

Yunhi be-sabab na phira karo koi shaam ghar mein raha karo,
Wo ghazal ki sachchi kitaab hai use chupke chupke padha karo,

Koi haath bhi na milayega jo gale miloge tapaak se,
Ye naye mizaaj ka shahar hai zara faasle se mila karo,

Abhi raah mein kayi mod hain koi aayega koi jayega,
Tumhein jis ne dil se bhula diya use bhoolne ki dua karo,

Mujhe ishtihaar si lagti hain ye mohabbaton ki kahaniyan,
Jo kaha nahin wo suna karo jo suna nahin wo kaha karo,

Kabhi husn-e-parda-nasheen bhi ho zara aashiqana libaas mein,
Jo main ban sanwar ke kahin chalun mere saath tum bhi chala karo,

Nahin be-hijaab wo chaand sa ke nazar ka koi asar na ho,
Use itni garmi-e-shauq se badi der tak na taka karo,

Ye Khizaa'n ki zard si shaal mein jo udaas ped ke paas hai,
Ye tumhaare ghar ki bahaar hai use aansuon se hara karo.!

"Basheer Badr"

Wo Soorat Gard-e-ghum Mein Chhup Gayi Ho

Wo soorat gard-e-ghum mein chhup gayi ho,
Bahut mumkin ye wo hi aadmi ho,

Main thehra aabshaar-e-shahr-e-pur-fan,
Ghane jangal ki tum bahti nadi ho,

Bahut masroof hai angusht-e-naghma,
Magar tum to abhi tak baansuri ho,

Meri aankhon mein registaan base hain,
Koi aise mein saawan ki jhadi ho,

Diya jo bujh chuka hai phir jalaana,
Bahut mahsoos jab meri kami ho,

Ye shab jaise koi be-maa  ki bachchi,
Akele rote rote so gayi ho,

Wo dariya mein nahaana chandni ka,
Ke chaandi jaise ghul kar bah rahi ho,

Kahaani kahne waale kah rahe hain,
Magar jaane wahi jis par padi ho,

Miyaan! diwaan ka mat roaab daalo,
Padho koi ghazal jo waaqai ho,

Ghazal wo mat sunaana hum ko shaair,
Jo behad saama'in mein chal chuki ho.!!

"Basheer Badr"
___
Aabshaar-e-shahr-e-pur-fan = cascade of city full of creativity and arts,
Angusht-e-naghma = finger making melody,
Saama'in = audience,

Wo Apne Ghar Chala Gaya Afsos Mat Karo

Wo apne ghar chala gaya afsos mat karo,
Itna hi us ka saath tha afsos mat karo,

Insan apne aap mein majboor hai bahut,
Koi nahin hai bewafa afsos mat karo,

Is baar tum ko aane mein kuchh der ho gayi,
Thak-haar ke wo so gaya afsos mat karo,

Duniya mein aur chahne waale bhi hain bahut,
Jo hona tha wo ho gaya afsos mat karo,

Is zindagi ke mujh pe kayi qarz hain magar,
Main jald laut aaunga afsos mat karo,

Ye dekho phir se aa gayin phoolon pe titliyaan,
Ek roz wo bhi aayega afsos mat karo,

Wo tum se aaj door hai kal paas aayega,
Phir se khuda milayega afsos mat karo,

Bekaar ji pe bojh liye phir rahe ho tum,
Dil hai tumhaara phool sa afsos mat karo.!!

"Basheer Badr"

Wahi Taaj Hai Wahi Takht Hai Wahi Zahar Hai Wahi Jaam Hai

Wahi taaj hai wahi takht hai wahi zahar hai wahi jaam hai,
Ye wahi khuda ki zameen hai ye wahi buto'n ka nizaam hai,

Bade shauq se mera ghar jala koi aanch tujh pe na aayegi,
Ye zabaan kisi ne khareed li ye qalam kisi ka ghulaam hai,

Yahaan ek bachche ke khoon se jo likha hua hai use padhein,
Tera keertan abhi paap hai abhi mera sajda haraam hai,

Main ye maanta hun mere diye teri aandhiyon ne bujha diye,
Magar ek jugnu hawaaon mein abhi raushni ka imaam hai,

Mere fikr-o-fan teri anjuman na urooj tha na zawaal hai,
Mere lab pe tera hi naam tha mere lab pe tera hi naam hai.!

"Basheer Badr"

Udaasi Aasman Hai Dil Mera Kitna Akela Hai

Udaasi aasman hai dil mera kitna akela hai,
Parinda shaam ke pul par bahut khamosh baitha hai,

Main jab so jaaun in aankhon pe apne honth rakh dena,
Yaqeen aa jayega palkon tale bhi dil dhadakta hai,

Tumhaare shahar ke saare diye to so gaye kab ke,
Hawa se poochhna dahleez pe ye kaun jalta hai,

Agar fursat mile paani ki tahreeron ko padh lena,
Har ek dariya hazaaron saal ka afsana likhta hai,

Kabhi main apne haathon ki lakeeron se nahin uljha,
Mujhe maloom hai qismat ka likkha bhi badalta hai..!!

"Basheer Badr"

Udaas Aankhon Se Aansu Nahin Nikalte Hain

Udaas aankhon se aansu nahin nikalte hain,
Ye motiyon ki tarah sipiyon mein palte hain,

Ghane dhuein mein farishte bhi aankh malte hain,
Tamaam raat khajooron ke ped jalte hain,

Main shahraah nahin raaste ka patthar hun,
Yahaan sawaar bhi paidal utar ke chalte hain,

Unhein kabhi na batana main un ki aankhon mein,
Wo log phool samajh kar mujhe masalte hain,

Kayi sitaaron ko main jaanta hun bachpan se,
Kahin bhi jaaun mere saath saath chalte hain,

Ye ek ped hai aa is se mil ke ro lein hum,
Yahaan se tere mere raaste badalte hain.!!

"Basheer Badr"
___
Shahraah = a public road, the highway

Taaron Bhari Palkon Ki Barsaai Hui Ghazlein

Taaron bhari palkon ki barsaai hui ghazlein,
Hai kaun piroe jo bikhraai hui ghazlein,

Wo lab hain ki do misre aur donon barabar ke,
Zulfein ke dil-e-shaair par chhaai hui ghazlein,

Ye phool hain ya sheyron ne sooratein paai hain,
Shaakhein hain ki shabnam mein nahlaai hui ghazlein,

Khud apni hi aahat par chaunke hun hiran jaise,
Yun raah mein milti hain ghabraai hui ghazlein,

In lafzon ki chaadar ko sarkaao to dekhoge,
Ahsas ke ghunghat mein sharmaai hui ghazlein,

Us jaan-e-taghazzul ne jab bhi kaha kuchh kahiye,
Main bhool gaya akasr yaad aai hui ghazlein..!!

"Basheer Badr"
___
Jaan-e-taghazzul = life, essence of lyricism

Sunsaan Raaston Se Sawaari Na Aayegi

Sunsaan raaston se sawaari na aayegi,
Ab dhool se ati hui laari na aayegi,

Chhappar ke chaye-khaane bhi ab oonghne lage,
Paidal chalo ke koi sawaari na aayegi,

Tahreer o guftugu mein kise dhundhte hain log,
Tasveer mein bhi shakl humari na aayegi,

Sar par zameen le ke hawaaon ke saath ja,
Aahista chalne waale ki baari na aayegi,

Pahchan apni hum ne mitaai hai is tarah,
Bachchon mein koi baat humari na aayegi.!!

"Basheer Badr"

Soye Kahaan The Aankhon Ne Takiye Bhigoye The

Soye kahaan the aankhon ne takiye bhigoye the,
Hum bhi kabhi kisi ke liye khoob roye the,

Angnaai mein khade hue beri ke ped se,
Wo log chalte waqt gale mil ke roye the,

Har saal zard phoolon ka ek qaafila ruka,
Us ne jahaan pe dhool ate paanw dhoye the,

Is haadse se mera taalluq nahin koi,
Mele mein ek saath kai bachche khoye the,

Aankhon ki kashtiyon mein safar kar rahe hain wo,
Jin doston ne dil ke safeene duboye the,

Kal raat main tha mere alawa koi na tha,
Shaitan mar gaya tha farishte bhi soye the.!!

"Basheer Badr"

Socha Nahin Achchha Bura Dekha Suna Kuchh Bhi Nahin

Socha nahin achchha bura dekha suna kuchh bhi nahin,
Maanga khuda se raat din tere siwa kuchh bhi nahin,

Socha tujhe dekha tujhe chaha tujhe pooja tujhe,
Meri KHata meri wafa teri khata kuchh bhi nahin,

Jis par humari aankh ne moti bichhaye raat bhar,
Bheja wahi kaghaz use hum ne likha kuchh bhi nahin,

Ek shaam ke saaye tale baithe rahe wo der tak,
Aankhon se ki baatein bahut munh se kaha kuchh bhi nahin,

Ahsas ki khushbu kahaan aawaz ke jugnu kahaan,
Khamosh yaadon ke siwa ghar mein raha kuchh bhi nahin,

Do-chaar din ki baat hai dil khaak mein mil jayega,
Jab aag par kaghaz rakha baaqi bacha kuchh bhi nahin.!!

"Basheer Badr"

Shoala-e-gul Gulaab Shoala Kya

Shoala-e-gul gulaab shoala kya,
Aag aur phool ka ye rishta kya,

Tum meri zindagi ho ye sach hai,
Zindagi ka magar bharosa kya,

Kitni sadiyon ki qismaton ka main,
Koi samjhe bisaat-e-lamha kya,

Jo na aadab-e-dushmani jaane,
Dosti ka use saleeqa kya,

Kaam ki poochhte ho gar saahab,
Aashiqi ke alawa pesha kya,

Baat matlab ki sab samajhte hain,
Saahab-e-nashsha gharq-e-baada kya,

Dil-dukhon ko sabhi sataate hain,
Sheyr kya geet kya fasaana kya,

Sab hain kirdaar ek kahaani ke,
Warna shaitaan kya farishta kya,

Din haqeeqat ka ek jalwa hai,
Raat bhi hai usi ka parda kya,

Tu ne mujh se koi sawaal kiya,
Karwaan-e-hayat-e-rafta kya,

Jaan kar hum "Bashir Badr" hue,
Is mein taqdeer ka nawishta kya.!!

"Basheer Badr"
___
Shoala-e-gul = flame of flower,
Nawishta = written , inscribed,

Shabnam Ke Aansu Phool Par Ye To Wahi Qissa Hua

Shabnam ke aansu phool par ye to wahi qissa hua,
Aankhein meri bheegi hui chehra tera utra hua,

Ab in dinon meri ghazal khushbu ki ek tasveer hai,
Har lafz ghunche ki tarah khil kar tera chehra hua,

Shayad use bhi le gaye achchhe dinon ke qaafile,
Is baagh mein ek phool tha teri tarah hansta hua,

Har cheez hai bazaar mein is haath de us haath le,
Izzat gayi shohrat mili ruswa hue charcha hua,

Mandir gaye masjid gaye peeron faqeeron se mile,
Ek us ko paane ke liye kya kya kiya kya kya hua,

Anmol moti pyaar ke duniya chura kar le gayi,
Dil ki haweli ka koi darwaza tha toota hua,

Barsaat mein deewar-o-dar ki saari tahreeren mitin,
Dhoya bahut mit ta nahin taqdeer ka likkha hua.!!

"Basheer Badr"

Shabnam Ke Aansu Phool Par Ye To Wahi Qissa Hua

Shabnam ke aansu phool par ye to wahi qissa hua,
Aankhein meri bheegi hui chehra tera utra hua,

Ab in dinon meri ghazal khushbu ki ek tasveer hai,
Har lafz ghunche ki tarah khil kar tera chehra hua,

Shayad use bhi le gaye achchhe dinon ke qaafile,
Is baagh mein ek phool tha teri tarah hansta hua,

Har cheez hai bazaar mein is haath de us haath le,
Izzat gayi shohrat mili ruswa hue charcha hua,

Mandir gaye masjid gaye peeron faqeeron se mile,
Ek us ko paane ke liye kya kya kiya kya kya hua,

Anmol moti pyaar ke duniya chura kar le gayi,
Dil ki haweli ka koi darwaza tha toota hua,

Barsaat mein deewar-o-dar ki saari tahreeren mitin,
Dhoya bahut mit ta nahin taqdeer ka likkha hua.!!

"Basheer Badr"

Sau Khuloos Baaton Mein Sab Karam Khyaalon Mein

Sau khuloos baaton mein sab karam khyaalon mein,
Bas zara wafa kam hai tere shahar waalon mein,

Pahli baar nazron ne chaand bolte dekha,
Hum jawaab kya dete kho gaye sawaalon mein,

Raat teri yaadon ne dil ko is tarah chheda,
Jaise koi chutki le narm narm gaalon mein,

Yun kisi ki aankhon mein subah tak abhi the hum,
Jis tarah rahe shabnam phool ke pyaalon mein,

Meri aankh ke taare ab na dekh paaoge,
Raat ke musafir the kho gaye ujaalon mein,

Jaise aadhi shab ke baad chaand neend mein chaunke,
Wo gulaab ki jumbish un siyah baalon mein..!!

"Basheer Badr"
___
Jumbish = motion, agitation, vibration, jerk

Sar-e-raah Kuchh Bhi Kaha Nahin Kabhi Us Ke Ghar Main Gaya Nahin

Sar-e-raah kuchh bhi kaha nahin kabhi us ke ghar main gaya nahin,
Main janam janam se usi ka hun use aaj tak ye pata nahin,

Use paak nazron se choomna bhi ibaadaton mein shumaar hai,
Koi phool laakh qareeb ho kabhi main ne us ko chhua nahin,

Ye khuda ki den ajeeb hai ke isi ka naam naseeb hai,
Jise tu ne chaha wo mil gaya jise main ne chaha mila nahin,

Isi shahar mein kayi saal se mere kuchh qareebi aziz hain,
Unhein meri koi khabar nahin mujhe un ka koi pata nahin.!!

"Basheer Badr"

Sar Se Paa Tak Wo Gulaabon Ka Shajar Lagta Hai

Sar se paa tak wo gulaabon ka shajar lagta hai,
Ba-wazu ho ke bhi chhoote hue darr lagta hai,

Main tere saath sitaaron se guzar sakta hun,
Kitna aasaan mohabbat ka safar lagta hai,

Mujh mein rahta hai koi dushman-e-jaani mera,
Khud se tanhaai mein milte hue darr lagta hai,

But bhi rakkhe hain namazein bhi ada hoti hain,
Dil mera dil nahin Allah ka ghar lagta hai,

Zindagi tu ne mujhe qabr se kam di hai zameen,
Paanw phailaaun to deewar mein sar lagta hai..!!

"Basheer Badr"

Sar Jhukaoge To Patthar Dewta Ho Jayega

Sar jhukaoge to patthar dewta ho jayega,
Itna mat chaaho use wo bewafa ho jayega,

Hum bhi dariya hain humein apna hunar maloom hai,
Jis taraf bhi chal padenge raasta ho jayega,

Kitni sachchaai se mujh se zindagi ne kah diya,
Tu nahin mera to koi doosra ho jayega,

Main khuda ka naam le kar pi raha hun dosto,
Zahar bhi is mein agar hoga dawa ho jayega,

Sab usi ke hain hawa khushbu zameen o aasman,
Main jahaan bhi jaaunga us ko pata ho jayega..!!

"Basheer Badr"

Sanwaar Nok-palak Abruon Mein Kham Kar De

Sanwaar nok-palak abruon mein kham kar de,
Gire pade hue lafzon ko mohtaram kar de,

Ghuroor us pe bahut sajta hai magar kah do,
Isi mein us ka bhala hai ghuroor kam kar de,

Yahaan libaas ki qeemat hai aadmi ki nahin,
Mujhe gilaas bade de sharaab kam kar de,

Chamakne waali hai tahreer meri qismat ki,
Koi charagh ki lau ko zara sa kam kar de,

Kisi ne choom ke aankhon ko ye dua di thi,
Zameen teri khuda motiyon se nam kar de..!!

"Basheer Badr"

Ret Bhari Hai In Aankhon Mein Aansu Se Tum Dho Lena

Ret bhari hai in aankhon mein aansu se tum dho lena,
Koi sookha ped mile to us se lipat ke ro lena,

Us ke baad bahut tanha ho jaise jangal ka rasta,
Jo bhi tum se pyaar se bole saath usi ke ho lena,

Kuchh to ret ki pyaas bujhao janam janam ki pyaasi hai,
Saahil par chalne se pahle apne paanw bhigo lena,

Main ne dariya se seekhi hai paani ki ye parda-daari,
Upar upar hanste rahna gahraai mein ro lena,

Rote kyun ho dil waalon ki qismat aisi hoti hai,
Saari raat yunhi jagoge din nikle to so lena..!!

"Basheer Badr"