Tum Se Chhut Kar Zindagi Ka Naqsh-e-pa Milta Nahin

Tum se chhut kar zindagi ka naqsh-e-pa milta nahin,
Phir raha hun ku-ba-ku apna pata milta nahin..

Main hun ya phirta hai koi aur mere bhes mein,
Kis se poochhun koi surat-aashna milta nahin..

Naqsh-e-hairat hi na tha pursaan-e-haal-e-ghum bhi tha,
Tum ne jo toda hai ab wo aaina milta nahin..

Na-ummidi harf-e-tohmat hi sahi kya kijiye,
Tum qareeb aate nahin ho aur khuda milta nahin..

Us ke dil se apna andaaz-e-taghaful poochhiye,
Jis ke dil ko dard ka bhi aasra milta nahin..

Ek na ek rishta isi duniya se tha apna kabhi,
Sochta hun aur koi silsila milta nahin..

Koi saaye ki tarah chalta hai 'Akhtar' saath saath,
Dostdaar-e-dil hai lekin barmala milta nahin.!!

"Akhtar Saeed Khan"

Yaad Aayen Jo Ayyaam-e-bahaara'n To Kidhar Jaayen

Yaad aayen jo ayyaam-e-bahaara'n to kidhar jaayen,
Ye to koi chaara nahin sar phod ke mar jaayen..

Qadmon ke nishaan hain na koi meel ka patthar,
Is raah se ab jin ko guzarna hai guzar jaayen..

Rasmein hi badal di hain zamane ne dilon ki,
Kis waz'a se us bazm mein ai deeda-e-tar jaayen..

Jaan dene ke daawe hon ke paimaan-e-wafa ho,
Ji mein to ye aata hai ke ab hum bhi mukar jaayen..

Har mauj gale lag ke ye kahti hai thehar jao,
Dariya ka ishaara hai ke hum paar utar jaayen..

Shishe se bhi naazuk hain inhein chhu ke na dekho,
Aisa na ho aankhon ke haseen khwab bikhar jaayen..

Tareek hue jaate hain badhte hue saaye,
'Akhtar' se kaho shaam hui aap bhi ghar jaayen.!!

"Akhtar Saeed Khan"

Yaad Aayen Jo Ayyaam-e-bahaara'n To Kidhar Jaayen

Yaad aayen jo ayyaam-e-bahaara'n to kidhar jaayen,
Ye to koi chaara nahin sar phod ke mar jaayen..

Qadmon ke nishaan hain na koi meel ka patthar,
Is raah se ab jin ko guzarna hai guzar jaayen..

Rasmein hi badal di hain zamane ne dilon ki,
Kis waz'a se us bazm mein ai deeda-e-tar jaayen..

Jaan dene ke daawe hon ke paimaan-e-wafa ho,
Ji mein to ye aata hai ke ab hum bhi mukar jaayen..

Har mauj gale lag ke ye kahti hai thehar jao,
Dariya ka ishaara hai ke hum paar utar jaayen..

Shishe se bhi naazuk hain inhein chhu ke na dekho,
Aisa na ho aankhon ke haseen khwab bikhar jaayen..

Tareek hue jaate hain badhte hue saaye,
'Akhtar' se kaho shaam hui aap bhi ghar jaayen.!!

"Akhtar Saeed Khan"

Zindagi Kya Hue Wo Apne Zamane Waale

Zindagi kya hue wo apne zamane waale..
Yaad aate hain bahut dil ko dukhane waale.!

Raaste chup hain naseem-e-sahri bhi chup hai..
Jaane kis samt gaye thokarein khaane waale.!

Ajnabi ban ke na mil umr-e-gurezaa'n hum se..
The kabhi hum bhi tere naaz uthane waale.!

Aa ke main dekh lun khoya hua chehra apna..
Mujh se chhup kar meri tasveer banane waale.!

Hum to ek din na jiye apni khushi se ai dil..
Aur honge tere ahsaan uthane waale.!

Dil se uthte hue sholon ko kahaan le jaayen..
Apne har zakhm ko pahlu mein chhupane waale.!

Nikhat-e-subah-e-chaman bhool na jaana ke tujhe..
The humin neend se har roz jagaane waale.!

Hans ke ab dekhte hain chaak-e-garebaa'n mera..
Apne aansu mere daaman mein chhupane waale.!

Kis se poochhun ye siyah raat kategi kis din..
So gaye ja ke kahaan khwab dikhane waale.!

Har qadam door hui jaati hai manzil hum se..
Raah-e-gum-karda hain khud raah dikhane waale.!

Ab jo rote hain mere haal-e-zaboo'n par 'Akhtar'..
Kal yahi the mujhe hans hans ke rulane waale.!!

"Akhtar Saeed Khan"
__________

Naseem-e-sahri = morning breeze,
Umr-e-gurezaa'n = Fleeting Life,
Nikhat-e-subah-e-chaman = fragrance of morning of garden,
Raah-e-gum-karda = lost way,
Haal-e-zaboo'n = bad condition,