Pyaas ki kaise laaye taab koi,
Nahin dariya to ho saraab koi..
Zakhm-e-dil mein jahaan mahakta hai,
Isi kyaari mein tha gulaab koi..
Raat bajti thi door shahnaai,
Roya pi kar bahut sharaab koi..
Dil ko ghere hain rozgaar ke ghum,
Raddi mein kho gayi kitaab koi..
Kaun sa zakhm kis ne bakhsha hai,
Is ka rakkhe kahaan hisaab koi..
Phir main sunne laga hun is dil ki,
Aane waala hai phir azaab koi..
Shab ki dahleez par shafaq hai lahu,
Phir hua qatl aaftaab koi.!
"Jawed Akhtar"
No comments:
Post a Comment