Aaj unhein kuchh is tarah ji khol kar dekha kiye,
Ek hi lamhe mein jaise umr bhar dekha kiye..
Dil agar betaab hai dil ka muqaddar hai yahi,
Jis qadar thi hum ko taufeeq-e-nazar dekha kiye..
Khud-faroshana ada thi meri surat dekhna,
Apne hi jalwe ba-andaaz-e-digar dekha kiye..
Na-shanaas-e-ghum faqat daad-e-hunar dete rahe,
Hum mata-e-ghum ko ruswa-e-hunar dekha kiye..
Dekhne ka ab ye aalam hai koi ho ya na ho,
Hum jidhar dekha kiye pahron udhar dekha kiye..
Husn ko dekha hai main ne husn ki khaatir 'Hafeez',
Warna sab apna hi meyaar-e-nazar dekha kiye.!!
"Hafeez Hoshiyarpuri"
No comments:
Post a Comment