Kuchh Kiya Jaaye Na Socha Jaaye

#Nazm

Kuchh kiya jaaye na socha jaaye,
Mud ke dekhun to na dekha jaaye,

Meri tanhaai ki wahshat se hirasaa'n ho kar,
Mera saaya mere qadmon mein simat aaya hai,

Kaun hai phir jo mere saath chala aata hai,
Mera saya to nahin...

Kis ki aahat ka gumaa'n,
Yun mere paanw ki zanjeer bana jaata hai,

Door ta-hadd-e-nazar shahar ke aasaar nahin,

Aur dushman ki tarah,
Shaam talwaar liye sar pe chali aati hai,

Bolta hun to aachanak koi,
Meri aawaz mein aawaz mila deta hai,

Mujh ko khud mere hi lafzon se dara deta hai,

Kaun hai jis ne mere qalb ki dhadkan dhadkan,
Apne ahsaas ki sooli pe chadha rakkhi hai,

Meri raftaar ke pur-khauf-o-khatar raste mein,
Kis ne aawaz ki deewar bana rakkhi hai,

Sang-e-aawaz ki deewar giraaun kaise,
Kuchh kiya jaaye na socha jaaye,

Mud ke dekhun to na dekha jaaye.!!

"Amjad Islam Amjad"