Shaam Dhhale Jab Basti Waale Laut Ke Ghar Ko Aate Hain

Shaam dhhale jab basti waale laut ke ghar ko aate hain,
Aahat aahat dastak dastak kya kya hum ghabraate hain,

Ahl-e-junoon to dil ki sada par jaan se apni ja bhi chuke,
Ahl-e-khirad ab jaane hum ko kya samjhane aate hain,

Jaise rail ki har khidki ki apni apni duniya hai,
Kuchh manzar to ban nahin paate kuchh peechhe rah jaate hain,

Jis ki har ek eent mein jazb hain un ke apne hi aansu,
Waaye ke ab wo ahl-e-dua hi is mehraab ko dhhaate hain,

Aaj ki shab to kat hi chali hai khwaabon aur saraabon mein,
Aane waale din ab dekhein kya manzar dikhlaate hain,

Saari umr hi dil se apna aisa kuchh bartaao raha,
Jaise khel mein haarne waale bachche ko bahlaate hain,

Na-mumkin ko mumkin 'Amjad' ahl-e-wafa hi kar sakte hain,
Paani aur hawa par dekho kya kya naqsh banaate hain.!!

"Amjad Islam Amjad"
___
Waaye = alas, expression of pain, ah! oh!