Kya Karun Ranj Gawaara Na Khushi

Kya Karun Ranj Gawaara Na Khushi Raas Mujhe,
Jeene Degi Na Meri Shiddat-e-Ahsaas Mujhe,

Main Kisi Bazm Ke Qaabil Na Raha Tere Baad,
Hans Pada Hoon To Hua Jurm Ka Ahsaas Mujhe,

Hum Ne Ek Doosre Ko Pursa-e-Furqat Na Diya,
Meri Khaatir Thi Tujhe Aur Tera Paas Mujhe,

Ek Thehra Hua Dariya Hai Meri Aankho'n Mein,
Jaane Kis Ghaat Pe Maaregi Teri Pyaas Mujhe,

Jaise Pahloo-e-Tarb Mein Koi Nashtar Rakh De,
Aaj Tak Yaad Hai Teri Nigaah-e-Yaas Mujhe,

Reza Reza Hua Jaata Hai Mera Sang-e-Wajood,
Yoon Sada De Na Pas-e-Parda-e-Infaas Mujhe,

Shaakh Se Barg-e-Chakeeda Ka Taqaaza Jaise,
Kuch Isi Tarah Abhi Tak Hai Teri Aas Mujhe,

Rooh Ke Dasht Mein Ek Hu Ka Samaa'n Hai Ai shaaz, 
De Gaya Kaun Bhare Shahar Mein Banbaas Mujhe..!!

Shaaz Tamkanat

کیا کروں رنج گوارا نہ خوشی راس مجھے
جینے دے گی نہ مری شدت احساس مجھے
میں کسی بزم کے قابل نہ رہا تیرے بعد
ہنس پڑا ہوں تو ہوا جرم کا احساس مجھے
ہم نے اک دوسرے کو پرسۂ فرقت نہ دیا
میری خاطر تھی تجھے اور ترا پاس مجھے
ایک ٹھہرا ہوا دریا ہے مری آنکھوں میں
جانے کس گھاٹ پہ مارے گی تری پیاس مجھے
جیسے پہلوئے طرب میں کوئی نشتر رکھ دے
آج تک یاد ہے تیری نگہ یاس مجھے
ریزہ ریزہ ہوا جاتا ہے مرا سنگ وجود
یوں صدا دے نہ پس پردۂ انفاس مجھے
شاخ سے برگ چکیدہ کا تقاضا جیسے
کچھ اسی طرح ابھی تک ہے تری آس مجھے
روح کے دشت میں اک ہو کا سماں ہے اے شاذ
ؔدے گیا کون بھرے شہر میں بن باس مجھے..

شاذؔ تمکنت