Jo Ho Sakta Hai Us Se Wo Kisi Se Ho Nahin Sakta

Jo ho sakta hai us se wo kisi se ho nahin sakta...
Magar dekho to phir kuchh aadmi se ho nahin sakta.!

Mohabbat mein kare kya kuchh kisi se ho nahin sakta...
Mera marna bhi to meri khushi se ho nahin sakta.!

Alag karna raqeebon ka ilaahi tujh ko aasan hai...
Mujhe mushkil ke meri bekasi se ho nahin sakta.!

Kiya hai waada-e-farda unhon ne dekhiye kya ho...
Yahaan sabr o tahammul aaj hi se ho nahin sakta.!

Ye mushtaq-e-shahadat kis jagah jaayen kise Dhundhein...
Ke tera kaam qaatil jab tujhi se ho nahin sakta.!

Laga kar tegh qissa paak kijiye daad-khwaho'n ka...
Kisi ka faisla kar munsifi se ho nahin sakta.!

Mera dushman ba-zaahir chaar din ko dost hai tera...
Kisi ka ho rahe ye har kisi se ho nahin sakta.!

Pursish kahoge kya wahaan jab yaan ye surat hai...
Ada ek harf-e-waada naazuki se ho nahin sakta.!

Na kahiye go ke haal-e-dil magar rang-aashna hain hum...
Ye zaahir aap ki kya khamushi se ho nahin sakta.!

Kiya jo hum ne zaalim kya karega ghair, munh kya hai...
Kare to sabr aisa aadmi se ho nahin sakta.!

Chaman mein naaz bulbul ne kiya jo apni naale par...
Chatak kar ghuncha bola kya kisi se ho nahin sakta.!

Nahin gar tujh pe qaabu dil hai par kuchh zor ho apna...
Karun kya ye bhi to na-taaqati se ho nahin sakta.!

Na rona hai tareeqe ka na hansna hai saleeqe ka...
Pareshaani mein koi kaam ji se ho nahin sakta.!

Hua hun is qadar mahjoob arz-e-muddaa kar ke...
Ke ab to uzr bhi sharmindagi se ho nahin sakta.!

Ghazab mein jaan hai kya kijiye badla ranj-e-furqat ka...
Badi se kar nahin sakte khushi se ho nahin sakta.!

Maza jo iztiraab-e-shauq se aashiq ko hai haasil...
Wo tasleem o raza o bandagi se ho nahin sakta.!

Khuda jab dost hai ai 'Dagh' kya dushman se andesha...
Humara kuchh kisi ki dushmani se ho nahin sakta.!!

"Dagh Dehlvi"
_______________

Tahammul = patience, endurance, toleration,
Mushtaq-e-shahadat = ardent for martyrdom,
Daad-khwaho'n = seekers of praise,
Munsifi = justice,
Pursish = questioning, enquiry, interrogation,
Na-taaqati = powerlessness,
Mahjoob = shy, coy, ashamed, bashful, lowly, modest,
Uzr = excuse, apology, plea,
____________________

جو ہو سکتا ہے اس سے وہ کسی سے ہو نہیں سکتا
مگر دیکھو تو پھر کچھ آدمی سے ہو نہیں سکتا..

محبت میں کرے کیا کچھ کسی سے ہو نہیں سکتا
مرا مرنا بھی تو میری خوشی سے ہو نہیں سکتا..

الگ کرنا رقیبوں کا الٰہی تجھ کو آساں ہے
مجھے مشکل کہ میری بیکسی سے ہو نہیں سکتا..

کیا ہے وعدۂ فردا انہوں نے دیکھیے کیا ہو
یہاں صبر و تحمل آج ہی سے ہو نہیں سکتا..

یہ مشتاق شہادت کس جگہ جائیں کسے ڈھونڈیں
کہ تیرا کام قاتل جب تجھی سے ہو نہیں سکتا.. 

لگا کر تیغ قصہ پاک کیجئے دادخواہوں کا
کسی کا فیصلہ کر منصفی سے ہو نہیں سکتا..

مرا دشمن بظاہر چار دن کو دوست ہے تیرا
کسی کا ہو رہے یہ ہر کسی سے ہو نہیں سکتا..

پرسش کہوگے کیا وہاں جب یاں یہ صورت ہے
ادا اک حرف وعدہ نازکی سے ہو نہیں سکتا..

نہ کہئے گو کہ حال دل مگر رنگ آشنا ہیں ہم
یہ ظاہر آپ کی کیا خامشی سے ہو نہیں سکتا..

کیا جو ہم نے ظالم کیا کرے گا غیر منہ کیا ہے
کرے تو صبر ایسا آدمی سے ہو نہیں سکتا..

چمن میں ناز بلبل نے کیا جو اپنی نالے پر
چٹک کر غنچہ بولا کیا کسی سے ہو نہیں سکتا..

نہیں گر تجھ پہ قابو دل ہے پر کچھ زور ہو اپنا
کروں کیا یہ بھی تو نا طاقتی سے ہو نہیں سکتا..

نہ رونا ہے طریقے کا نہ ہنسنا ہے سلیقے کا
پریشانی میں کوئی کام جی سے ہو نہیں سکتا..

ہوا ہوں اس قدر محجوب عرض مدعا کر کے
کہ اب تو عذر بھی شرمندگی سے ہو نہیں سکتا.. 

غضب میں جان ہے کیا کیجئے بدلہ رنج فرقت کا
بدی سے کر نہیں سکتے خوشی سے ہو نہیں سکتا..

مزا جو اضطراب شوق سے عاشق کو ہے حاصل
وہ تسلیم و رضا و بندگی سے ہو نہیں سکتا..

خدا جب دوست ہے اے داغؔ کیا دشمن سے اندیشہ
ہمارا کچھ کسی کی دشمنی سے ہو نہیں سکتا..