Hum Hain Aur Un Ki Khushi Hai Aaj Kal

Hum hain aur un ki khushi hai aaj kal,
Zindagi hi zindagi hai aaj kal..

Ghum ka har aalam naya hai in dino'n,
Dil ki har duniya nayi hai aaj kal..

Un ka zikr un ki tamanna un ki yaad,
Waqt kitna qeemti hai aaj kal..

Chaand bhi hai sogwaar-e-hijr dost,
Pheeki pheeki chaandni hai aaj kal..

Jal rahi hai dil mein sham-e-aarzu,
Ghum-kade mein raushni hai aaj kal..

Tu hai aur dariya-dili hai saaqiya,
Main hun aur tishna-labi hai aaj kal..

Be-qaraari karwato'n par karwatein,
Dil ka aalam deedni hai aaj kal..

Arz-e-ghum par muskuraate bhi nahin,
Barhami si barhami hai aaj kal..

Haasil-e-tark-e-mohabbat dekhna,
Anjuman sooni padi hai aaj kal..

Dil mein aur mayoosiyon mein ai 'Shakeel',
Ittihaad-e-baahami hai aaj kal.!!

"Shakeel Badayuni"
____________________

ہم ہیں اور ان کی خوشی ہے آج کل
زندگی ہی زندگی ہے آج کل..

غم کا ہر عالم نیا ہے ان دنوں
دل کی ہر دنیا نئی ہے آج کل..

ان کا ذکر ان کی تمنا ان کی یاد
وقت کتنا قیمتی ہے آج کل..

چاند بھی ہے سوگوار ہجر دوست
پھیکی پھیکی چاندنی ہے آج کل..

جل رہی ہے دل میں شمع آرزو
غم کدے میں روشنی ہے آج کل..

تو ہے اور دریا دلی ہے ساقیا
میں ہوں اور تشنہ لبی ہے آج کل..

بے قراری کروٹوں پر کروٹیں
دل کا عالم دیدنی ہے آج کل..

عرض غم پر مسکراتے بھی نہیں
برہمی سی برہمی ہے آج کل..

حاصل ترک محبت دیکھنا
انجمن سونی پڑی ہے آج کل..

دل میں اور مایوسیوں میں اے شکیلؔ
اتحاد باہمی ہے آج کل..