Ek Ek Qadam Fareb-e-tamanna Se Bach Ke Chal

Ek ek qadam fareb-e-tamanna se bach ke chal,
Duniya ki aarzu hai to duniya se bach ke chal..

Khud dhundh lega tujh ko tera munfarid maqaam,
Rah-e-talab mein naqsh-e-kaf-e-pa se bach ke chal..

Baaqi hai mere dil mein abhi azmat-e-wajood,
Qatre se kah raha hun ke dariya se bach ke chal..

Milti nahin hai rah-e-sukoon khauf-o-yaas mein,
Gulshan ki justuju hai to sahra se bach ke chal..

Munh jaada-e-wafa se na mod ai wafa-shiaar,
Lekin hudood-e-chashm-e-tamasha se bach ke chal..

Kitni haseen hain un ke sitam ki masarratein,
Shukr-e-karam ki zahmat-e-be-ja se bach ke chal..

Lamhe udaas udaas fazaaen ghuti ghuti,
Duniya agar yahi hai to duniya se bach ke chal..

Apne adab pe naaz hai tujh ko agar 'Shakeel',
Maghrib-zada adeeb ki duniya se bach ke chal.!!

"Shakeel Badayuni"
____________________

اک اک قدم فریب تمنا سے بچ کے چل
دنیا کی آرزو ہے تو دنیا سے بچ کے چل..

خود ڈھونڈ لے گا تجھ کو ترا منفرد مقام
راہ طلب میں نقش کف پا سے بچ کے چل..

باقی ہے میرے دل میں ابھی عظمت وجود
قطرے سے کہہ رہا ہوں کہ دریا سے بچ کے چل..

ملتی نہیں ہے راہ سکوں خوف و یاس میں
گلشن کی جستجو ہے تو صحرا سے بچ کے چل.. 

منہ جادۂ وفا سے نہ موڑ اے وفا شعار
لیکن حدود چشم تماشا سے بچ کے چل..

کتنی حسیں ہیں ان کے ستم کی مسرتیں
شکر کرم کی زحمت بے جا سے بچ کے چل..

لمحے اداس اداس فضائیں گھٹی گھٹی
دنیا اگر یہی ہے تو دنیا سے بچ کے چل..

اپنے ادب پہ ناز ہے تجھ کو اگر شکیلؔ
مغرب زدہ ادیب کی دنیا سے بچ کے چل..