Duniya Ki Riwayat Se Begana Nahin Hun

Duniya ki riwayat se begana nahin hun,
Chhedo na mujhe main koi deewana nahin hun..

Is kasrat-e-ghum par bhi mujhe hasrat-e-ghum hai,
Jo bhar ke chhalak jaaye wo paimana nahin hun..

Rudaad-e-ghum-e-ishq hai taaza mere dam se,
Unwaan-e-har-afasana hun afsana nahin hun..

ilzam-e-junoon dein na mujhe ahl-e-mohabbat,
Main khud ye samajhta hun ke deewana nahin hun..

Main qaayel-e-khuddaari-e-ulfat sahi lekin,
Aadab-e-mohabbat se to begana nahin hun..

Hai barq-e-sar-e-toor se dil shola-ba-daaman,
Shaam-e-sar-e-mahfil hun main parwana nahin hun..

Hai gardish-e-saaghar meri taqdeer ka chakkar,
Mohtaj-e-tawaaf-e-dar-e-may-khana nahin hun..

Kaanton se guzar jaata hun daaman ko bacha kar,
Phoolon ki siyasat se main begana nahin hun..

Lazzat-kash-e-nazzara 'Shakeel' apni nazar hai,
Mahrum-e-jamaal-e-rukh-e-jaanana nahin hun.!!

"Shakeel Badayuni"
____________________

دنیا کی روایات سے بیگانہ نہیں ہوں
چھیڑو نہ مجھے میں کوئی دیوانہ نہیں ہوں..

اس کثرت غم پر بھی مجھے حسرت غم ہے
جو بھر کے چھلک جائے وہ پیمانہ نہیں ہوں..

روداد غم عشق ہے تازہ مرے دم سے
عنوان ہر افسانہ ہوں افسانہ نہیں ہوں..

الزام جنوں دیں نہ مجھے اہل محبت
میں خود یہ سمجھتا ہوں کہ دیوانہ نہیں ہوں..

میں قائل خوددارئ الفت سہی لیکن
آداب محبت سے تو بیگانہ نہیں ہوں..

ہے برق سر طور سے دل شعلہ بداماں
شمع سر محفل ہوں میں پروانہ نہیں ہوں..

ہے گردش ساغر مری تقدیر کا چکر
محتاج طواف در مے خانہ نہیں ہوں..

کانٹوں سے گزر جاتا ہوں دامن کو بچا کر
پھولوں کی سیاست سے میں بیگانہ نہیں ہوں..

لذت کش نظارہ شکیلؔ اپنی نظر ہے
محروم جمال رخ جانانہ نہیں ہوں..