Wo kaafir aashna na-aashna yoon bhi hai aur yoon bhi..
Humari ibtida ta intiha yoon bhi hai aur yoon bhi.!
Ta'ajjub kya agar rasm-e-wafa yoon bhi hai aur yoon bhi..
Ke husn o ishq ka har mas'ala yoon bhi hai aur yoon bhi.!
Kahin zarra kahin sahra kahin qatra kahin dariya..
Mohabbat aur us ka silsila yoon bhi hai aur yoon bhi.!
Wo mujh se poochhte hain ek maqsad meri hasti ka..
Bataaun kya ke mera muddaa yoon bhi hai aur yoon bhi.!
Hum un se kya kahein wo jaanein un ki maslahat jaane..
Humara haal-e-dil to barmala yoon bhi hai aur yoon bhi.!
Na pa lena tera aasan na kho dena tera mumkin..
Musibat mein ye jaan-e-mubtala yoon bhi hai aur yoon bhi.!
Laga de aag o barq-e-tajalli dekhti kya hai..
Nigah-e-shauq zaalim na-rasa yoon bhi hai aur yoon bhi.!
ilahi kis tarah aql o junoon ko ek ja kar loon..
Ke mansha-e-nigah ishwa-za yoon bhi hai aur yoon bhi.!
'Majazi' se 'Jigar' kah do are o aql ke dushman,
Muqir ho ya koi munkir khuda yoon bhi hai aur yoon bhi.!!
"Jigar Muradabadi"
_______________
Muqir = one who asserts or confirms,
No comments:
Post a Comment