Muddat Ke Baad

Muddat ke baad tum se mila hun to ye khula...
Ye waqt aur faasla dhokha nazar ka tha,

Chehre pe umr bhar ki masafat raqam sahi...
Dil ke liye tamam safar lamha bhar ka tha,

Kaisi ajeeb saa'at-e-deedar hai ke hum...
Phir yoon mile ke jaise kabhi door hi na the,

Aankhon mein kam-sini ke wo sab khwab jaag uthe...
Jin mein nigaah o dil kabhi majboor hi na the,

Masoom kis qadar thin wo be-naam chahatein...
Bachpan se hum-kanaar tha ahd-e-shabab bhi,

Yoon aatish-e-badan mein thi shabnam ghuli hui...
Mahtab se zyaada na tha aaftab bhi,

Phir wo hawa chali ke sabhi kuchh bikhar gaya...
Wo mahfilein wo dost wo gul-rang qahqahe,

Ab raqs-e-gard-baad ki surat hai zindagi...
Ye waqt ka azaab kahaan tak koi sahe,

Ab tum milin to kitne hi ghum hain tumhaare saath...
Patthar ki tarah tum ne guzaari hai zindagi,

Kitna lahu jalaya to ye phool muskuraye...
Kis kis jatan se tum ne sanwaari hai zindagi,

Main ne bhi ek johd-e-musalsal mein kaat di...
Wo umr thi jo phool se arman liye hue,

Ab wo junoon raha hai na wo mausam-e-bahaar...
Baitha hun apna chaak-e-girebaa'n siye hue,

Ab apne apne khoon ki amanat hai aur hum...
Aur in amanaton ki hifazat ke khwab hain,

Aankhon mein koi pyas ho dil mein koi tadap...
Phaile hue ufuq se ufuq tak saraab hain,

Kis ko khabar thi lamha ek aisa bhi aayega...
Maazi tamaam phir simat aayega haal mein,

Mahsoos ho raha hai ke guzra nahin hai waqt...
Ek lamha bat gaya tha faqat maah o saal main,

Tum bhi wahi ho main bhi wahi waqt bhi wahi...
Haan ek bujhi bujhi si chamak chashm-e-nam mein hai,

Ye lamha jis ke sehr mein khoye hue hain hum...
Kitni masarraton ka suroor is ke ghum mein hai.!!

"Himayat Ali Shayer"
_________________________

مدت کے بعد تم سے ملا ہوں تو یہ کھلا
یہ وقت اور فاصلہ دھوکہ نظر کا تھا..

چہرے پہ عمر بھر کی مسافت رقم سہی
دل کے لیے تمام سفر لمحہ بھر کا تھا..

کیسی عجیب ساعت دیدار ہے کہ ہم
پھر یوں ملے کہ جیسے کبھی دور ہی نہ تھے..

آنکھوں میں کم سنی کے وہ سب خواب جاگ اٹھے
جن میں نگاہ و دل کبھی مجبور ہی نہ تھے..

معصوم کس قدر تھیں وہ بے نام چاہتیں
بچپن سے ہمکنار تھا عہد شباب بھی..

یوں آتش بدن میں تھی شبنم گھلی ہوئی
مہتاب سے زیادہ نہ تھا آفتاب بھی..

پھر وہ ہوا چلی کہ سبھی کچھ بکھر گیا
وہ محفلیں وہ دوست وہ گل رنگ قہقہے..

اب رقص گرد باد کی صورت ہے زندگی
یہ وقت کا عذاب کہاں تک کوئی سہے..

اب تم ملیں تو کتنے ہی غم ہیں تمہارے ساتھ
پتھر کی طرح تم نے گزاری ہے زندگی.. 

کتنا لہو جلایا تو یہ پھول مسکرائے
کس کس جتن سے تم نے سنواری ہے زندگی..

میں نے بھی ایک جہد مسلسل میں کاٹ دی
وہ عمر تھی جو پھول سے ارماں لیے ہوئے..

اب وہ جنوں رہا ہے نہ وہ موسم بہار
بیٹھا ہوں اپنا چاک گریباں سیے ہوئے..

اب اپنے اپنے خوں کی امانت ہے اور ہم
اور ان امانتوں کی حفاظت کے خواب ہیں..

آنکھوں میں کوئی پیاس ہو دل میں کوئی تڑپ
پھیلے ہوئے افق سے افق تک سراب ہیں..

کس کو خبر تھی لمحہ اک ایسا بھی آئے گا
ماضی تمام پھر سمٹ آئے گا حال میں..

محسوس ہو رہا ہے کہ گزرا نہیں ہے وقت
اک لمحہ بٹ گیا تھا فقط ماہ و سال میں..

تم بھی وہی ہو میں بھی وہی وقت بھی وہی
ہاں اک بجھی بجھی سی چمک چشم نم میں ہے..

یہ لمحہ جس کے سحر میں کھوئے ہوئے ہیں ہم
کتنی مسرتوں کا سرور اس کے غم میں ہے..