Jab se us ne shahr ko chhoda har rasta sunsaan hua..
Apna kya hai saare shahr ka ek jaisa nuqsaan hua.!
Ye dil ye aaseb ki nagri maskan sochun wahmo'n ka..
Soch raha hun is nagri mein tu kab se mehmaan hua.!
Sahra ki munh-zor hawaen auron se mansoob huin..
Muft mein hum aawara thehre muft mein ghar veeraan hua.!
Mere haal pe hairat kaisi dard ke tanha mausam mein..
Patthar bhi ro padte hain insaan to phir insaan hua.!
Itni der mein ujde dil par kitne mahshar beet gaye..
Jitni der mein tujh ko pa kar khone ka imkaan hua.!
Kal tak jis ke gird tha raqsaa'n ek amboh sitaaron ka..
Aaj usi ko tanha pa kar main to bahut hairaan hua.!
Us ke zakhm chhupa kar rakhiye khud us shakhs ki nazro'n se..
Us se kaisa shikwa kijiye wo to abhi nadaan hua.!
Jin ashko'n ki pheeki lau ko hum bekaar samajhte the..
Un ashko'n se kitna raushan ek tareek makaan hua.!
Yoon bhi kam-aamez tha 'Mohsin' wo is shahr ke logon mein..
Lekin mere saamne aa kar aur bhi kuchh anjaan hua.!!
"Mohsin Naqwi"
No comments:
Post a Comment