Zabt Kar Ke Hansi Ko Bhool Gaya

Zabt kar ke hansi ko bhool gaya,
Main to us zakhm hi ko bhool gaya..

Zaat-dar-zaat hum-safar rah kar,
Ajnabi ajnabi ko bhool gaya..

Subah tak wajah-e-jaan-kani thi jo baat,
Main use shaam hi ko bhool gaya..

Ahd-e-wabastagi guzaar ke main,
Wajah-e-wabastagi ko bhool gaya..

Sab daleelen to mujh ko yaad rahin,
Bahs kya thi usi ko bhool gaya..

Kyun na ho naaz is zehanat par,
Ek main har kisi ko bhool gaya..

Sab se pur-amn waaqia ye hai,
Aadmi aadmi ko bhool gaya..

Qahqaha maarte hi deewana,
Har ghum-e-zindagi ko bhool gaya..

Khwab-ha-khwab jis ko chaaha tha,
Rang-ha-rang usi ko bhool gaya..

Kya qayamat hui agar ek shakhs
Apni khush-qismati ko bhool gaya.!!

"Jaun Eliya"
__________

Wajah-e-jaan-kani = cause of agony before death,
Ahd-e-wabastagi = period of relationship, emotional attachment,
Wajah-e-wabastagi = cause; mode; manner of attachment; affection; relationship,