Tujh Se Gile Karun Tujhe Jaanaa Manaaun Main

Tujh se gile karun tujhe jaanaa manaaun main,
Ek baar apne-aap mein aaun to aaun main..

Dil se sitam ki be-sar-o-kaari hawa ko hai,
Wo gard ud rahi hai ke khud ko ganwaaun main..

Wo naam hun ke jis pe nadamat bhi ab nahin,
Wo kaam hain ke apni judaai kamaaun main..

Kyunkar ho apne khwab ki aankhon mein waapsi,
Kis taur apne dil ke zamaanon mein jaaun main..

Ek rang si kamaan ho khushbu sa ek teer, 
Marham si wardaat ho aur zakgm khaaun main..

Shikwa sa ek dareecha ho nashsha sa ek sukoot,
Ho shaam ek sharaab si aur ladkhadaun main..

Phir us gali se apna guzar chahta hai dil,
Ab us gali ko kaun si basti se laaun main.!! 

"Jaun Eliya"
__________

Be-sar-o-kaari = quality of being unrelated;unconcerned,