Tujh Ko Paane Ki Ye Hasrat Mujhe Le Doobegi

Tujh ko paane ki ye hasrat mujhe le doobegi,
Lag raha hai ke mohabbat mujhe le doobegi..

Haalat-e-ishq mein hun aur ye haalat hai ke ab,
Ek lamhe ki bhi fursat mujhe le doobegi..

Ab main samjha hun ke ye dard-e-mohabbat kya hai,
Ye tere pyar ki shiddat mujhe le doobegi..

Meri betaabi-e-dil chain na lene degi,
Teri khamosh tabiyat mujhe le doobegi..

Teri aankhon ke samandar mein khyaalon ki tarah,
Doob jaane ki ye aadat mujhe le doobegi..

Doobti nabz kahin ka nahin chhodegi mujhe,
Dard le doobega wahshat mujhe le doobegi..

Teri aankhon ka ye jaadu kahin le jayega,
Ye teri saada si surat mujhe le doobegi..

Tere ashkon se kaleja mera kat jayega,
Meri hassas tabiyat mujhe le doobegi

Har qadam par main tera bojh uThaun kaise
Zindagi teri zaroorat mujhe le doobegi.!!

"Jawed Saba"