Teri Aankhon Ka Ajab Turfa Samaa'n Dekha Hai

Teri aankhon ka ajab turfa samaa'n dekha hai,
Ek aalam teri jaanib nigraa'n dekha hai..

Kitne anwaar simat aaae hain in aankhon mein,
Ek tabassum tere honthon pe rawaa'n dekha hai..

Hum ko aawara o bekaar samajhne waalo,
Tum ne kab us but-e-kaafir ko jawaan dekha hai..

Sehn-e-gulshan mein ke anjum ki tarab-gaahon mein,
Tum ko dekha hai kahin jaane kahaan dekha hai..

Wahi aawara o deewana o aashufta-mizaaj,
Hum ne 'Jalib' ko sar-e-ku-e-butaa'n dekha hai.!!

"Habeeb Jalib"
__________

Turfa = wonderful, rare,
Nigraa'n = guard,
Anwaar = very bright light,
Tarab-gaahon = places of joyous excitement, joy, mirth, cheerfulness,
Aashufta-mizaaj = one who has a distressed temperament,
Sar-e-ku-e-butaa'n = towards the lover's street,