Tu Rang Hai, Ghubaar Hain Teri Gali Ke Log

Tu rang hai, ghubaar hain teri gali ke log,
Tu phool hai, sharaar hain teri gali ke log..

Tu raunaq-e-hayat hai to husn-e-kayenaat,
Ujda hua dayaar hain teri gali ke log..

Tu paikar-e-wafa hai mujassam khuloos hai,
Badnaam-e-rozgaar hain teri gali ke log.. 

Raushan tere jamaal se hain mahr-o-maah bhi,
Lekin nazar pe baar hain teri gali ke log..

Dekho jo ghaur se to zameen se bhi past hain,
Yoon aasman-shikaar hain teri gali ke log..

Phir ja raha hun tere tabassum ko loot kar,
Har-chand hoshiyaar hain teri gali ke log.. 

Kho jayenge sahar ke ujaalon mein aakhirash,
Shama sar-e-mazaar hain teri gali ke log.!!

"Habeeb Jalib"