Seena dahak raha ho to kya chup rahe koi,
Kyun cheekh cheekh kar na gala chheel le koi..
Saabit hua sukoin-e-dil-o-jaan kahin nahin,
Rishto'n mein dhundhhta hai to dhundha kare koi..
Tark-e-ta'alluqaat koi mas'ala nahin,
Ye to wo raasta hai ke bas chal pade koi..
Deewar jaanta tha jise main wo dhool thi,
Ab mujh ko aitimaad ki daawat na de koi..
Main khud ye chahta hun ke haalaat hun kharaab
Mere khilaaf zahar ugalta phire koi..
Ai shakhs ab to mujh ko sabhi kuchh qubool hai,
Ye bhi qubool hai ke tujhe chheen le koi..
Haan theek hai main apni ana ka mareez hun,
Aakhir mere mizaaj mein kyun dakhl de koi..
Ek shakhs kar raha hai abhi tak wafa ka zikr,
Kaash us zabaan-daraaz ka munh noch le koi.!!
"Jaun Eliya"
No comments:
Post a Comment