Qismat-e-shauq Aazma Na Sake

Qismat-e-shauq aazma na sake,
Un se hum aankh bhi mila na sake..

Hum se yaan ranj-e-hijr uth na saka,
Waan wo majboor the wo aa na sake..

Darr ye tha ro na dein kahin wo, unhein,
Hum hansi mein bhi gudguda na sake..

Hum se dil aap ne utha to liya,
Par kahin aur bhi laga na sake..

Ab kahaan tum kahaan wo rabt-e-wafa,
Yaad bhi jis ki hum dila na sake..

Dil mein kya kya the arz-e-haal ke shauq,
Us ne poochha to kuchh bata na sake.. 

Hum to kya bhoolte unhein 'Hasrat',
Dil se wo bhi humein bhula na sake.!!

"Hasrat Mohani"