Nigah-e-yaar Jise Aashna-e-raaz Kare

Nigah-e-yaar jise aashna-e-raaz kare,
Wo apni khoobi-e-qismat pe kyun na naaz kare..

Dilo'n ko fikr-e-do-aalam se kar diya aazad,
Tere junoon ka khuda silsila daraaz kare..

Khirad ka naam junoon pad gaya junoon ka khirad,
Jo chaahe aap ka husn-e-karishma-saaz kare..

Tere sitam se main khush hun ke ghaaliban yoon bhi,
Mujhe wo shaamil-e-arbaab-e-imtiyaaz kare..

Ghum-e-jahaan se jise ho faraagh ki khwahish,
Wo un ke dard-e-mohabbat se saaz-baaz kare..

Ummid-waar hain har samt aashiqon ke giroh,
Teri nigah ko Allah dil-nawaaz kare..

Tere karam ka saza-waar to nahin 'Hasrat',
Ab aage teri khushi hai jo sarfaraaz kare.!!

"Hasrat Mohani"
__________

Shaamil-e-arbaab-e-imtiyaaz = included among the distinguished,
Faraagh = leisure, repose, freedom from care or business,
Saaz-baaz = conspiracy, intrigue,
Sarfaraaz = exalted, eminent, distinguished,