Na Sahi Gar Unhein Khyaal Nahin

Na sahi gar unhein khyaal nahin,
Ke humara bhi ab wo haal nahin..

Yaad unhein waada-e-wisaal nahin,
Kab kiya tha yahi khyaal nahin..

Aise bigde wo sun ke shauq ki baat,
Aaj tak hum se bol-chaal nahin..

Mujh ko ab ghum ye hai ke baad mere,
Khaatir-e-yaar be-malaal nahin..

Afw-e-haq ka hai may-kasho'n pe nuzool,
Rezish-e-abr-e-barshagaal nahin..

Hum pe kyun arz-e-haal-e-dil pe itaab,
Elchi ko kahin zawaal nahin..

Sun ke mujh se wo khwahish-e-pa-bos,
Hans ke kahne lage majaal nahin..

Dil ko hai yaad shauq ka wo hunar,
Jis se badh kar koi kamaal nahin..

Aap naadim na hon ke 'Hasrat' se,
Shikwa-e-ghum ka ehtimaal nahin.!!

"Hasrat Mohani"
__________

Afw-e-haq = forgiveness of truth,
Rezish-e-abr-e-barshagaal = pouring of the rain-bearing cloud,
Elchi = ambassador, emissary, representative,
Khwahish-e-pa-bos = desire to kiss feet,
Ehtimaal = doubt, uncertainity,