Na Dagmagaye Kabhi Hum Wafa Ke Raste Mein

Na dagmagaye kabhi hum wafa ke raste mein,
Charaagh hum ne jalaye hawa ke raste mein..

Kise lagayen gale aur kahaan kahaan thehre,
Hazaar ghuncha-o-gul hain saba ke raste mein..

Khuda ka naam koi le to chaunk uthte hain,
Mile hain hum ko wo rahbar khuda ke raste mein..

Kahin salaasil-e-tasbeeh aur kahin zunnaar,
Bichhe hain daam bahut muddaa ke raste mein..

Abhi wo manzil-e-fikr-o-nazar nahin aai,
Hai aadmi abhi jurm o saza ke raste mein..

Hain aaj bhi wahi daar-o-rasan wahi zindaan,
Har ek nigah-e-rumooz-aashna ke raste mein..

Ye nafraton ki faseelen jahaalaton ke hisaar,
Na rah sakenge humari sada ke raste mein..

Mita sake na koi sail-e-inqilaab jinhein,
Wo naqsh chhode hain hum ne wafa ke raste mein..

Zamana ek sa 'Jalib' sada nahin rahta,
Chalenge hum bhi kabhi sar utha ke raste mein.!!

"Habeeb Jalib"
__________

Salaasil-e-tasbeeh = chain of rosary,
Zunnaar = The Sacred Thread,
Manzil-e-fikr-o-nazar = destination of idea and perception,
Nigah-e-rumooz-aashna = Aspect; look of one acquainted with innuendos;secrets; ambiguity; enigmas,
Sail-e-inqilaab = storm of revolution,