Kya Kahein Tum Se Bood-o-baash Apni

Kya kahein tum se bood-o-baash apni,
Kaam hi kya, wahi talaash apni,

Koi dam aisi zindagi bhi karein,
Apna seena ho aur kharaash apni..

Apne hi tesha-e-nadamat se,
Zaat hai ab to paash paash apni,

Hai labo'n par nafas-zani ki dukaan,
Yaawa-goi hai bas ma'aash apni,

Teri surat pe hun nisaar pa ab,
Aur surat koi taraash apni..

Jism o jaan ko to bech hi daala,
Ab mujhe bechni hai laash apni.!!

"Jaun Eliya"
__________

Bood-o-baash = whereabouts,
Nafas-zani = self-abnegation, self-denial,
Yaawa-goi = absurd talking, vain, prating babbling,
Ma'aash = economy,