Kuch der saadgi ke tasawwur se hat ke dekh,
Likkha hua waraq hun mujhe phir ulat ke dekh..
Maana ke tujh se koi ta'alluq nahin magar,
Ek baar dushmanon ki tarah hi palat ke dekh..
Phir poochhna ke kaise bhatakti hai zindagi,
Pahle kisi patang ki maanind kat ke dekh..
Ta-umr phir na hogi ujaalon ki aarzu,
Tu bhi kisi charaagh ki lau se lipat ke dekh..
Sajde tujhe karegi kisi roz khud hayat,
Baanhon mein hadsaat-e-jahaan ki simat ke dekh..
Tanhaiyon mein saikdon saathi bhi hain 'Nazeer',
Hai shart apni zaat ke hisso!n mein bat ke dekh.!!
"Nazeer Baaqri"
No comments:
Post a Comment