Khoon Thookegi Zindagi Kab Tak

Khoon thookegi zindagi kab tak,
Yaad aayegi ab teri kab tak..

Jaane waalon se poochhna ye saba,
Rahe aabaad dil-gali kab tak..

Ho kabhi to sharaab-e-wasl naseeb,
Piye jaaun main khoon hi kab tak..

Dil ne jo umr-bhar kamaai hai,
Wo dukhan dil se jayegi kab tak..

Jis mein tha soz-e-aarzu us ka,
Shab-e-ghum wo hawa chali kab tak..

Bani-aadam ki zindagi hai azaab,
Ye khuda ko rulayegi kab tak..

Haadsa zindagi hai aadam ki,
Saath degi bhala khushi kab tak..

Hai jahannum jo yaad ab us ki,
Wo bahisht-e-wajood thi kab tak..

Wo saba us ke bin jo aai thi,
Wo use poochhti rahi kab tak..

Meer-'Jauni' zara batayen to,
Khud mein thehrenge aap hi kab tak..

Haal-e-sahn-e-wajood thehrega,
Tera hangaam-e-rukhsati kab tak.!!

"Jaun Eliya"