Ji Hi Ji Mein Wo Jal Rahi Hogi

Ji hi ji mein wo jal rahi hogi,
Chandni mein tahal rahi hogi..

Chaand ne taan li hai chadaar-e-abr,
Ab wo kapde badal rahi hogi..

So gayi hogi wo shafaq-andaam,
Babz qindeel jal rahi hogi..

Surkh aur sabz waadiyon ki taraf,
Wo mere saath chal rahi hogi..

Chadhte chadhte kisi pahaadi par,
Ab wo karwat badal rahi hogi..

Ped ki chhaal se ragad kha kar,
Wo tane se phisal rahi hogi..

Neel-goo'n jheel naaf tak pahne,
Sandalin jism mal rahi hogi..

Ho ke wo khwab-e-aish se bedaar,
Kitni hi der shal rahi hogi.!!

"Jaun Eliya"
__________

Shafaq-andaam = like, resembling rainbow,,
Qindeel = paper lantern,
Neel-goo'n = blue, azure,